وتكەندە بەلگىلى بوكسشى قانات يسلام الماتىدا كەزەكتى جەكپە-جەگىن وتكىزدى. بۇل كەزدەسۋدى جەكپە-جەك دەۋگە كەلسە، ارينە. ويتكەنى، جۇرت جەكپە-جەك كورگەن جوق. شارشى الاڭعا شىققان ساتتەن تۇپ-تۋرا 14 سەكۋنت وتكەندە دومينيكاندىق قارسىلاسى قۇلاشتاپ ۇرعان جالعىز سوققىدان سۇلاپ ءتۇستى. سەرەيىپ ءبىراز جاتتى. دارىگەرلىك كومەك تە كورسەتىلدى.

بوكس كەشى الماتىداعى بالۋان شولاق اتىنداعى سپورت سارايىندا ءوتتى. قازاقستاندىق بوكسشى قانات يسلام (26-0,21كو) مەن ونىڭ دومينيكاندىق قارسىلاسى حۋليو دە حەسۋستىڭ (27-2,25كو) كەزدەسۋى كەشتىڭ باستى جەكپە-جەگى ەدى. اي بۇرىن جارناماسى جاسالىپ، جۇرت اسىعا كۇتكەن كەزدەسۋ وسىلايشا باستالماي جاتىپ اياقتالدى. ءسويتىپ، قانات يسلام ورتا سالماقتاعى WBO Inter-Continental بەلدىگىن تاقتى.

ايتپاقشى، بۇل قانات يسلامنىڭ ەكى جىلدىق ۇزىلىستەن كەيىنگى شارشى الاڭعا العاش شىعۋى ەدى. ونىڭ قارسىلاسى ءوز ەلىنەن سىرتقا شىقپاپتى دەمەسەڭىز، ناتيجەسى تىم تومەن سپورتشى ەمەس. 28 كەزدەسۋ وتكىزگەن. ونىڭ 27-ىندە جەڭگەن. ءتىپتى 25-ءىن نوكاۋتپەن جەڭىپتى.

الايدا، قانات يسلامنىڭ بۇل جولعى كەزدەسۋى – ونىڭ ەكى جىلدىق ۇزىلىستەن كەيىنگى قارىم-قۋاتىن، مۇمكىندىگىن كورسەتە العان جوق. سەبەبى، جەكپە-جەك وتكەن جوق. جالعىز سوققى. جويقىن نوكاۋت – قانات يسلامنىڭ بارلىق پونتەنتسيالىن كورسەتۋگە جەتكىلىكسىز دەگەن اۋانداعى پىكىرلەر الەۋمەتتىك جەلىدە كوپتەپ ايتىلدى. وسى رەتتە ءبىز قانات يسلامنىڭ وسى جولعى كەزدەسۋىنە قاتىستى بەلگىلى سپورت ءجۋرناليسى رۋسلان مەدەلبەكپەن اڭگىمەلەسكەن ەدىك...

رۋسلان مەدەلبەك:

-نەگىزى قانات بۇل جەكپە-جەكتە ءوزىن تولىق كورسەتە العان جوق. قارسىلاسى كەزدەسۋگە دايىن بولمادى. بيلەت الىپ، باستى جەكپە-جەكتى، قاناتتىڭ جەكپە-جەگىن كورۋگە كەلگەن كورەرمەندەرگە وبال بولدى. ويتكەنى ولار ەشتەڭە كورگەن جوق. كاسىپقوي بوكس ءبىر جاعىنان – شوۋ. ال قانات كەلگەن ادامدار مەن تەلەەفير الدىندا شوۋ جاساۋى كەرەك ەدى. 

ەكىنشىدەن، بۇل بوكسشى قاناتتىڭ دەڭگەيى ەمەس. ءبىر جاعىنان كەلىسىپ ۇلگەرنگەنى دە وسى بولۋى مۇمكىن. سەبەبى، قازىر قانات ءۇشىن باسقا قارسىلاستارمەن كەلىسۋ وتە قيىن. سەبەبى، كەز كەلگەن بوكسشى پەرسپەكتيۆا ىزدەيدى. اقىرى جەكپە-جەك وتكىزگەننەن كەيىن رەيتينگ نەمەسە بەدەل الىپ كەلەتىن قارسىلاستارعا ءمان بەرەدى. ال قانات جاراقاتىنا بايلانىستى 1,5-2 جىل ۋاقىتىن وكتىزىپ الدى

اشىعىن ايتۋ كەرەك، قاناتتىڭ قازاقستانعا كەلگەندەگى نەگىزگى ءۇمىتى اقتالمادى. ول وليمپيادا ويىندارىنا قاتىسۋ ەدى. ەكىنشىدەن، ونىڭ پروموۋتەرى وتە ءساتسىز تاڭدالدى. لاتىن امەريكاسى ەلدەرىنەن شىققان، اقش-تا بازاسى بار. وكىنىشكە وراي بۇل پروموۋتەرلىك كومپانيانىڭ بەدەلى اسا جوعارى دەۋگە كەلمەيدى. سەبەبى، چەمپيون شىعارعانىن ەستىمەدىك. سوندىقتان بۇل قاناتقا باسپالداق بولۋى كەرەك ەدى. ءبىر-ەكى جىل جۇمىس ىستەپ، بەدەلى بولىپ تۇرعان كەزدە باسقا پروموۋتەرلىك كومپانياعا اۋىسىپ كەتۋى كەرەك ەدى.

قاناتىڭ كوماندالاستارى سىن ايتقاندارعا، «ءاي، بۇلار وتىرىپ الىپ ايتا بەرەدى» دەۋى مۇمكىن. بىراق، وسى جولعى جەكپە-جەكتەن بايقاعانىمىزداي حالىقتا اناۋ ايتقان اجيوتاج بولعان جوق. سەبەبى، قانات حالىقتىڭ ەسىنەن شىعا باستاعان ەكەن. وسىعان دەيىنگى جەكپە-جەكتەرىندە قاتتى اجيوتاج بولىپ ەدى. وسى جولى اجيوتاج بولعان جوق. اجيوتاجدىڭ ءوزى جاڭاعى سىني پىكىرلەر عوي. «نە بولىپ كەتتى، ءوزى» دەگەن اڭگىمەلەر عانا.

قانات وليمپيادانىڭ قولa جۇلدەگەرى. وليمپيادانىڭ قولa جۇلدەسىن الۋ كەز كەلگەن بوكسشىنىڭ قولىنان كەلمەيدى. وتە تاجىربيەلى. كاسىپقوي بوكستىڭ نارىعىن، اۋەسقوي بوكستىڭ قىر-سىرىن بىلەتىن ادام. ەندى شاكىرت تاربيەلەسە دۇرىس بولار ەدى. سول شاكىرتتەرى ارقىلى وليمپيادا التىنىنا، كاسىپقوي بوكس چەمپيوندىعىنا ۇمتىلسا دۇرىس. بۇل شىنايى تىلەك. ويتكەنى وتە قيىن بولادى. كاسىپقوي بوكس ايامايدى. چەمپيوندىق بەلبەۋ الۋ ءۇشىن قاناتقا 2019 جىل بىتپەي جاتىپ تاعى 3-4 كەزدەسۋ وتكىزۋ كەرەك. سول كەزدە عانا قاناتتا 2020 جىلى مىقتى-مىقتى قارسىلاستار الۋعا مۇمكىندىك بولادى. ول ءۇشىن بيىل كەم دەگەندە 3-4 كەزدەسۋ وتكىزۋ كەرەك. ول وتە قيىن. ال بىردەن چەمپيوندىق اتاق ءۇشىن قاناتپەن كەزدەسۋگە الۆارەس، دجەيكوبستاردىڭ كەلىسە سالۋى ەكىتالاي.

قاناتتا، اشىعىن ايتايىق، كاسىپقوي بوكستا قانداي دا ءبىر جەتىستىككە جەتۋى قيىن. بۇل - مەنىڭ ويىم. ەگەر ەرتەڭ «كانەلومەن» كەزدەسەتىن بولسا، جەڭۋى قيىن. بىراق بۇل قانات ءالسىز دەگەندى بىلدىرمەيدى. وتە تاجىريبەلى، جاس بوكسشىلارعا بەرەرى كوپ. ءتىپتى ونى ۇلتتىق قۇراماعا كەڭەسشى ەتىپ شاقىرسا دا ۇتىمدى بولار ەدى...

Abai.kz