حاكىم ابايدان قالعان قاناتتى، ۇلاعاتتى ءسوز تىركەسىن كەشەگى ۇكىمەتتىڭ كەڭەيتىلگەن ماجىلىسىندەگى پرەزيدەنت قاسىم-جومارت توقاەۆتىڭ سويلەگەن سوزدەرى مەن ۇكىمەتكە جۇكتەگەن تاپسىرمالارىنىڭ ءتۇيىنى رەتىندە الۋعا بولادى. تەك "تىڭداۋشىم" دەگەننىڭ ورنىنا "ۇكىمەت" ءسوزىن اۋىستىرسا بولدى.
پرەزيدەنت ءسوزدىڭ ادامى ەمەس، ءىستىڭ ادامى ەكەنىن تانىتتى. ونى ول كەلەلى ماسەلەلەرگە اشۋ-ىزا نەمەسە ەرەكشە ءشۇيىلۋ ارقىلى نازار سالۋ ادىسىمەن ەمەس، ەل مۇددەسى، حالىق تالابى سالماقتى، سىندارلى، سۇراۋى بار ماسەلەلەر ەكەنىن ۇكىمەت مۇشەلەرىنە تانىتا ءبىلدى.

پرەزيدەنت ەكونوميكا، الەۋمەتتىك سالالاردا ورىن الىپ كەلگەن تۇيىتكىلدى ماسەلەلەردى سىناي كەلە، ونى دەرەۋ شەشۋ قاجەتتىگىن ايتتى. مۇنىمەن شەشىم قابىلداعان تۇلعالاردىڭ جاۋاپتىلىعى ماسەلەسى نازاردان تىس قالمايتىنىن اتاپ ءوتتى. يندۋستريالدى-يننوۆاتسيالىق باعدارلامانىڭ ءىى بەسجىلدىعى كەزەڭىندە ورىن العان ىسىراپسىزدىق، كوپىرمە ءسوز، وراشولاقتىقتان تۋىنداعان ولقىلىقتاردى سىنادى. پرەزيدەنتشە ايتساق، "كوكتە ساراي سالۋدى" نەمەسە "اۋىزبەن وراق ورۋدى" توقتاتۋ قاجەت. شىندىعىندا، كوپ نىسانداردىڭ اتى بار دا زاتى جوق. حالىق مۇنى كورىپ، ءبىلىپ وتىر. تەك ۇكىمەت كورمەگەن سىڭاي تانىتاتىن.

مەملەكەت باسشىسىنىڭ نازارىنان استاناداعى اتى-شۋلى LRT قۇرىلىسى دا تىس قالمادى. اناۋ-مىناۋ كىسىنىڭ ءتىسى باتپايتىن، ءتىلى جۇرمەيتىن قۇرىلىستى سىناعان پرەزيدەنت داۋدىڭ حالىقارالىق سيپاتىن ەسكەرە كەلە، شىعىنى وتە كوپ قۇرىلىستى قالاي دا بولسا اياقتاۋ قاجەتتىگىن العا تارتتى. بىراق شىعىن سۇراۋسىز قالمايتىنىن ەسكەرتتى. الداعى ۋاقىتتا مۇنداي جوبالارعا جول بەرىلمەيتىندىگىن ساناسىندا ساڭىلاۋى بار تۇلعالارعا ەسكەرتتى.

حالىقتىڭ كورىپ-ءتۇيىپ وتىرعان الەۋمەتتىك ماسەلەلەرىنىڭ ءبىرى - جۇمىسسىزدىق. بۇل باعىتتا دا كوپىرمە ءسوز، كوپشىك ساندار كوپ ەكەندىگىن كۇندەلىكتى ءومىردىڭ ءوزى كورسەتىپ وتىر. قاسىم-جومارت توقاەۆ مىرزا اكىمدەردىڭ جاقسى جۇمىس كورسەتكىشتەرىنىڭ ءبىرى جۇمىس ورىندارىن اشۋ دەپ قاداعالاپ ايتتى. بۇل ورايدا، ەكس-مينيستر تامارا دۇيسەنوۆانىڭ الەۋمەتتىك سالاعا قايتا كەلۋى - جوعارى بيلىك تاراپىنان سيمۆوليكالىق نىشانى بار قادام.

پرەزيدەنت توقاەۆ اكىمدەر كورپۋسىن جەرگىلىكتى جەردىڭ "امىرلەرى" دەپ تۇيرەپ ءوتتى. ولار كىمنىڭ الدىندا ءəمىر؟ ارينە، حالىقتىڭ جانە ينۆەستورلاردىڭ الدىندا. سەبەبى ولار جەرگىلىكتى جەردە - ءوزى بي، ءوزى قوجا. بيۋدجەت اشسا - الاقانىندا، جۇمسا - جۇدىرىعاندا. وڭىرلىك əلەۋمەتى مەن جۇرتى ازاماتتىق بەلسەندىلىگى تومەن ورتا. نە ايتسا دا، باسىن شۇلعي بەرەدى، بيزنەس جۇرگىزۋگە قاجەت تەتىكتەر ءوز قولىندا، باقىلاۋىندا، ولار ءامىر بولماي، كىم ءامىر بولادى؟ وسىندايدان əمىرلىك سانا قالىپتاسادى.

ۇكىمەت مۇشەلەرىنە الەۋمەتتىك جەلىلەر ارقىلى جۇرتشىلىقپەن جۇمىس جۇرگىزۋ قاجەتتىگىن ەرەكشە اتاپ ءوتتى. ءححى عاسىردا ءومىر سۇرە وتىرىپ، الەۋمەتتىك جەلىنىڭ ەكپىنىن ەسكەرمەۋ - كوزسىزدىك. كوكىرەگىندە وي كوزى بار باسشى الەۋمەتتىك جەلىنى ءوزىنىڭ كومەكشىسى دەپ تانۋى ءتيىس.

مەملەكەت باسشىسى حالىقتى مازالاعان جەر ساتۋ مəسەلەسىنە ءوز كوزقاراسىن ءبىلدىرىپ، جەر شەتەلدىكتەرگە ساتىلمايدى دەدى.
پرەزيدەنت ءبىلىم مەن عىلىم سالاسىنداعى تۇيىتكىلدەرگە دە توقتالدى. عىلىمعا ءبولىنىپ وتىرعان قارجىنىڭ ماردىمسىزدىعىن اتاپ ءوتىپ، ونى الەمدىك دەڭگەيدەگى كورسەتكىشتەرمەن سالىستىرا سىنادى. "عىلىمسىز العا باسۋ مۇمكىن ەمەس" دەگەن ويدى ۇكىمەتتىڭ نازارىنا سالدى.

ەندىگى ءۇمىت - ۇكىمەتتە. ۇكىمەت پرەزيدەنت تۇزەگەن قۇندىلىقتاردى باسشىلىققا الا ما ەكەن، الدە ەسكى ادەتىنە سالىپ "ايتىلدى، سول جەردە ۇمىتىلدى" دەگەن ەسكى سارىنىنا بوي بەرىپ كەتە مە ەكەن؟

ساۋال كوپ، بىراق سۇراۋى بار زامان تۋىپ كەلە جاتقان سىندى. لايىم، سولاي بولعاي!

الماسبەك ابسادىق

Abai.kz