ءوز ىسىنە ادال ۆولونتەر جاستار وسكەلەڭ ۇرپاقتىڭ اراسىندا ايتارلىقتاي ارتىپ كەلەدى. بۇل تۋرالى «ۆولونتەرلەر ليگاسى» قق ءتورايىمى ايسۇلۋ ەرنيازوۆا مالىمدەدى. 

«بيىل مامىر ايىندا قوستانايدا وتكەن قازاقستان-رەسەي جاستارىنىڭ فورۋمىنا قاتىسقان بولاتىنمىن. وسى جيىن بارىسىندا ۆولونتەرلەر الداعى جىلدى ەرىكتىلەر قوزعالىسىن قولداۋ جىلى دەپ جاريالاۋعا ۇسىنىس جاساپ، پرەزيدەنت قاسىم-جومارت توقاەۆ بۇل باستاماعا قولداۋ ءبىلدىردى»، - دەدى ول.

سونىمەن قاتار ا. ەرنيازوۆا جاستار جىلىنىڭ اشىلۋىندا ەلباسى ۆولونتەر ستۋدەنتتەردىڭ شاكىرتاقىسىن ءوسىرۋدى تاپسىرعانىن ەسكە سالدى.

«وسى ىسپەتتى شارالار ءبىزدىڭ ۆولونتەرلەردى ىنتالاندىرۋعا ىقپال ەتتى، ياعني قانداي دا ءبىر ماتەريالدىق مۇددە تۇرعىسىندا ەمەس، مەملەكەت تاراپىنان قولداۋ جاسالىپ وتىرعاندىعى جانە ۆولونتەرلەرگە جاسالعان قامقورلىق كوڭىل-كۇيدى ءبىر سەرپىلتتى. ال 15 شىلدە كۇنى وتكەن ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ كەزەكتى رەت ۆولونتەرلىك قوزعالىستىڭ ءرولى تۋرالى اتاپ ءوتتى. ۆولەنتەرلىك ۇيىمنىڭ ءتورايىمى رەتىندە ءوز ىسىنە ادال ەرىكتىنى انىقتاۋ وڭاي ەكەنىن ايتا الامىن. وسىنداي جاستار وسكەلەڭ ۇرپاقتىڭ اراسىندا ايتارلىقتاي ارتىپ كەلەدى»، - دەدى ليگا ءتورايىمى.

ونىڭ سوزىنە قاراعاندا، «ۆولونتەرلەر جىلى» اياسىندا جاستارعا ۇلكەن جاۋاپكەرشىلىك جۇكتەلەدى.

«ءبىز قازىردەن باستاپ «ۆولونتەرلەر جىلى» اياسىندا «قانداي يگى شارالاردى ۇسىنا الامىز؟» دەگەن وي مازالاۋدا. تاياۋ كۇندەرى ءبىز ۆولونتەرلەر گيمنىن جازدىق جانە ونى قازاقستانداعى بارشا ارىپتەستەرىمىزگە ارنادىق. ونى ءبىزدىڭ ۇيىمنىڭ ينستاگرامم پروفيلىنەن سىلتەمە بويىنشا كوشىرىپ الۋعا بولادى. جالپى، ەرىكتىلەر قوزعالىسىنا ەرەكشە ءمان بەرىپ وتىرعان مەملەكەت باسشىسىنا العىس ايتقىمىز كەلەدى. ويتكەنى ەلىمىزدىڭ بولاشاعى ءۇشىن تۇرعىنداردى جاۋاپكەرشىلىككە شاقىرۋدا، ادامداردىڭ ءبىر-بىرىنە قامقورلىقپەن قاراۋىنا ۆولونتەرلىك قوزعالىستان ۇيرەنەتىن تۇستارى كوپ. وسى ورايدا ءبىز ءوزىمىزدىڭ كۇش-جىگەرىمىز ارقىلى ەلىمىزدىڭ گۇلدەنۋىنە ەلەۋلى ۇلەسىمىزدى قوسا الامىز»، - دەدى ايسۇلۋ ەرنيازوۆا.

ايتا كەتەيىك، ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ كەلەسى جىل «جاستار جىلىنىڭ» جالعاسى رەتىندە «ۆولونتەرلەر جىلى» بولاتىنىن، جاستارىمىزدى بەلسەندى ۆولونتەرلىك جۇمىسقا تارتۋ قاجەت ەكەنىن اتاپ ءوتتى.

دەرەككوزى: inform.kz

Abai.kz