قىزىلوردا وبلىسىندا بيىل تۇڭعىش رەت ۇكىمەتتىڭ قاۋلىسىنا سايكەس رەسمي تۇردە بەلگىلەنگەن سۋ شارۋاشىلىعى قىزمەتكەرلەرى كۇنى اتاپ ءوتىلدى،- دەپ حابارلايدى اباي-اقپارات.

وبلىس اكىمىنىڭ ورىنباسارى رۋسلان رۇستەموۆ ايماقتىڭ سۋ شارۋاشىلىعى قىزمەتكەرلەرىن كاسىبي مەرەكەلەرىمەن قۇتتىقتادى.

– ەلباسى، قر تۇڭعىش پرەزيدەنتى نۇرسۇلتان ءابىشۇلى نازارباەۆتىڭ دەر كەزىندە قابىلداعان شەشىمىنىڭ ارقاسىندا، كىشى ارال تەڭىزىن ساقتاپ قالدىق. بۇگىندە كۇن كورىسى اۋىل شارۋاشىلىعى وندىرىسىنە، ياعني سۋارمالى سۋعا تىكەلەي بايلانىستى اۋىلداعى اعايىننىڭ ارمان-تىلەگىن ورىنداۋ ماقساتىندا سۋ تاپشىلىعىنىڭ الدىن الۋ ءۇشىن وبلىستا بىرقاتار جۇمىستار جۇرگىزىلۋدە. بۇدان بولەك، وبلىستا 3 ملرد. تەكشە مەتر تاسقىن سۋ جينايتىن 6 سۋ قويماسىن سالۋ جوسپارلانىپ وتىر. سوڭعى 4 جىلدا اۋىز سۋ ينفراقۇرىلىمىن دامىتۋعا 12 ملرد. تەڭگەگە جۋىق قارجى ءبولىنىپ، 60 سۋ ۇڭعىماسى ىسكە قوسىلدى. وبلىس ورتالىعى – قىزىلوردا قالاسى 2015 جىلدان باستاپ تولىعىمەن جەراستى سۋ قورىن پايدالانۋعا كوشتى ،- دەدى ول.

ايتا كەتەتىن جايت، بيىلعى جىلدىڭ مامىر ايىندا قابىلدانعان قىزىلوردا وبلىسىنىڭ 2019-2022 جىلدارعا ارنالعان الەۋمەتتىك-ەكونوميكالىق دامۋىنىڭ كەشەندى جوسپارىندا ەكولوگيا جانە تابيعاتتى پايدالانۋ سالاسى، ونىڭ ىشىندە سۋ شارۋاشىلىعىن دامىتۋ بويىنشا بىرقاتار جوبالاردى ىسكە اسىرۋ قاراستىرىلعان. ونىڭ ىشىندە كوكارال بوگەتىن ساقتاۋ جانە سىرداريا وزەنىنىڭ ارناسىن قالپىنا كەلتىرۋ سىندى ايتۋلى جوبالار دا بار.

سونداي-اق، كەشەندى جوسپار شەڭبەرىندە "قۇمىسكەتكەن" جانە "قاراوزەك" سۋ قويمالارى سالىنادى. اتالعان سۋارمالى جەرلەردىڭ مەليوراتيۆتىك جاعدايىن جاقسارتۋعا جانە سۋارمالى سۋ قورىنىڭ 20 پايىزىن ۇنەمدەۋگە مۇمكىندىك بەرەدى.

بىلتىرعى جىلى ەلدىمەكەندەردى سۋمەن قامتاماسىز ەتۋ جانە كولدەردى سۋلاندىرۋ ءۇشىن وبلىستىق بيۋدجەتتەن 426,8 ملن تەڭگە ءبولىنىپ، 6 كانال (ارال اۋدانى اقيرەك اۋىلىنداعى "باسىقارا" كانالى، بوگەن اۋىلىنداعى "بالعاباي", "بەكەتاي", "ستان"كانالدارى، رايىم اۋىلدىق وكرۋگىندەگى "بەسجارما", قارماقشى اۋدانىنداعى "بالاجارما" كانالى) تازارتىلىپ، (قىزىلوردا قالاسىنىڭ بىرقازان مەن تالسۋات اۋىلدىق وكرۋگتەرى، جاڭاقورعان اۋدانى كەيدەن اۋىلدىق وكرۋگىنە) 3 سورعى قۇرىلعىلارىمەن قامتاماسىز ەتىلگەن بولاتىن. سونىڭ ارقاسىندا اۋىلداردى سۋارمالى سۋمەن قامتامۋعا، 180 گا كوكونىس جانە باقشا داقىلدارىن وسىرۋگە، ارال اۋدانىنىڭ تۇششى-1, تۇششى-2, قاراكول كولدەرىن سۋلاندىرۋعا مۇمكىندىك تۋدى.

ايتا كەتەيىك، بۇگىنگى تاڭدا مەملەكەت باسشىسىنىڭ سۋارمالى جەرلەردى اينالىمعا ەنگىزۋ جانە قالپىنا كەلتىرۋ تۋرالى تاپسىرماسىنا سايكەس قىزىلوردا وبلىسىندا جالپى قۇنى 164,2 ملرد تەڭگە تۇراتىن 3 جوبانى ىسكە اسىرۋ بويىنشا 158 مىڭ گا سۋارمالى جەردى قالپىنا كەلتىرۋ، 29 مىڭ گا پايدالانىلمايتىن جەردى اينالىمعا ەنگىزۋ جۇمىستارى قارقىندى جۇرۋدە. .

سالتاناتتى شارادا اتالعان سالانىڭ ارداگەرلەرى مەن سۋ شارۋاشىلىعى قىزمەتكەرلەرى وبلىس اكىمىنىڭ العىس حاتتارىمەن، قر ەكولوگيا، گەولوگيا

جانە تابيعي رەسۋرستار مينيسترلىگىنىڭ قۇرمەت گراموتالارىمەن، العىس حاتتارىمەن ماراپاتتالدى.

سونىمەن قاتار، قازاق سسر مەليوراتسيا جانە سۋ شارۋاشىلىعى ەكس-ءمينيسترى ناريمان قىپشاقباەۆ ارىپتەستەرىن كاسىبي مەرەكەلەرىمەن قۇتتىقتادى.

Abai.kz