اتىراۋ وبلىسى پوليتسيا دەپارتامەنتىنىڭ قىزمەتكەرلەرى قازاقتىڭ ۇلى اقىنى اباي قۇنانبايۇلىنىڭ 175 جىلدىق مەرەيتويىنا وراي جالعاسىپ جاتقان «اباي ولەڭدەرىن جاتقا وقۋ» ەستافەتاسىنا قاتىستى. 

«ءبىز قازاق ۇلتى ەجەلدەن ءسوز قادىرىن ۇعاتىن حالىقپىز. ابايدىڭ ەرگە قاجەت قاسيەتتەردى كورسەتىپ، جىگىتتەرگە وي سالارلىق ولەڭىن تاڭدادىق» دەگەن اتىراۋ وبلىسى پوليتسيا دەپارتامەنتى باستىعىنىڭ ورىنباسارى پوليتسيا پولكوۆنيگى سۇلتان مولداشەۆ ەستافەتانى باستادى.

اتىراۋلىق پوليتسەيلەر ابايدىڭ «جىگىتتەر، ويىن ارزان، كۇلكى قىمبات» ولەڭىن جاتقا وقىپ، ەستافەتانى قاراعاندى، ماڭعىستاۋ وبلىسى ىشكى ىستەر ورگاندارى قىزمەتكەرلەرىنە جولدادى.

«اباي ولەڭدەرىن جاتقا وقۋ» ەستافەتاسىنىڭ كەڭ كولەمدە جالعاسۋىنا 9 جاستاعى مەكتەپ وقۋشىسى ءلايلىم-شىراق ەرلانقىزى تۇرتكى بولدى. ول ۇلى اقىننىڭ ولەڭىن وقىپ، ونى پرەزيدەنت قاسىم-جومارت توقاەۆقا جولداعان بولاتىن.

مەملەكەت باسشىسى ەستافەتاعا قولداۋ ءبىلدىرىپ، اقىننىڭ «عىلىم تاپپاي ماقتانبا» ولەڭىنەن ءۇزىندى وقىدى. ءارى ەستافەتانى ودان ءارى ءبىلىم جانە عىلىم ءمينيسترى اسحات ايماعامبەتوۆكە، مادەنيەت جانە سپورت ءمينيسترى اقتوتى رايىمقۇلوۆاعا جانە بۇكىل الەمدى مويىنداتقان تالانتتى ءانشى ديماش قۇدايبەرگەنگە جولداعان.

الەمگە ايگىلى قازاق ءانشىسى ديماش قۇدايبەرگەن دە مەملەكەت باسشىسى ۇسىنعان ەستافەتانى قۋانىشپەن قابىل الىپ، ۇلى اقىننىڭ «قاقتاعان اق كۇمىستەي كەڭ ماڭدايلى» ولەڭىن وقىدى. ديماش بۇل challenge-ءدى جالعاستىرۋدى اقتوبە وبلىسىنىڭ اكىمى وڭداسىن سەيىلۇلى ورازالينگە، رف-نىڭ حالىق ءارتiسi يگور كرۋتويعا جانە ءوزىنىڭ بارلىق تىڭدارمانىنا تاپسىرعان ەدى. وسىعان وراي رەسەيلىك ونەرپاز دا ۇلى ابايدىڭ ولەڭىن وقىعان بولاتىن.

يگور كرۋتويدان بولەك، الەمنىڭ ءار تۇكپىرىنەن ديماش قۇدايبەرگەننىڭ تىڭدارماندارى اباي ولەڭدەرىن جاتقا وقىپ جارىسقان. وسىلايشا، «اباي ولەڭدەرىن جاتقا وقۋ» ەستافەتاسى رەسپۋبليكالىق دەڭگەيدەن اسىپ، حالىقارالىق دەڭگەيگە دەيىن جەتتى.

Abai.kz