الماتى وبلىسىنىڭ ورتالىعى تالدىقورعان قالاسىندا "100 تومدىق جەتىسۋ كىتاپحاناسى" جوباسى بويىنشا جارىق كورگەن ۇزىن-ىرعاسى 41 كىتاپتىڭ تانىستىرىلىمى ءوتتى. 

ەلباسى نۇرسۇلتان ءابىشۇلى نازارباەۆ 2019 جىلدى - جاستار جىلى دەپ جاريالاعان ەدى. ال بيىل قاڭتاردا ەلباسى جاستار جىلىنىڭ اشىلۋ سالتاناتىقا قاتىسقان.

مەملەكەت باسشىسى قاسىم-جومارت كەمەلۇلى توقاەۆ تا ءوز كەزەگىندە شىعارماشىل دارىندى جاستاردى قولداۋ كەرەكتىگىن ايتقان ەدى.

وسىعان وراي الماتى وبلىسى اكىمدىگى "رۋحاني جاڭعىرۋ" باعدارلاماسى اياسىندا وبلىستاعى 20 قالامگەردىڭ جيناقتارىن شىعارىپ بەرگەن ەدى.

بۇدان بولەك تاعى 21 قالامگەردىڭ جيناعى  "100 تومدىق جەتىسۋ كىتاپحاناسى" جوباسى اياسىندا باسپا كورىپتى.

تالدىقورعان قالاسىنداعى ءتىل سارايىندا وبلىس اكىمدىگىنىڭ قولداۋىمەن جارىق كورگەن 41 كىتاپتىڭ تۇساۋكەسەرى ءوتتى. 

تۇساۋكەسەر راسىمىنە وبلىس اكىمىنىڭ ورىنباسارى اقان ابدۋاليەۆ، قر جازۋشىلار وداعى توراعاسىنىڭ ورىنباسارى باقىت بەدەلحان، وسى وداقتىڭ وبلىستىق فيليالىنىڭ باسشىسى ەرلان ءجۇنىس جانە زيالى قاۋىم وكىلدەرى قاتىستى.

اتالمىش يگى شارانى وبلىستىق مادەنيەت، ارحيۆتەر جانە قۇجاتتاما باسقارماسى، س.سەيفۋللين اتىنداعى امبەباپ كىتاپحانا ۇيىمداستىرعان.

اقان جىلقىشىبايۇلى، الماتى وبلىسى اكىمىنىڭ ورىنباسارى:

- بۇگىنگى وقىرمانعا  جول تارتىپ وتىرعان جاڭا باسىلىمداردىڭ بارلىعى وبلىس اكىمى اماندىق باتالوۆتىڭ قولداۋىمەن جارىق كوردى. سونىڭ  تەڭ جارىمى ەرتەڭىنەن ۇلكەن ءۇمىت كۇتتىرىپ وتىرعان  جاستاردىكى. ولاردىڭ اراسىندا ايماعىمىزدىڭ ماقتانىشىنا اينالعان وتكىر وي، شۇرايلى تىلىمەن بۇكىل ەلىمىزگە تانىمال بولا باستاعان نەبىر ۇزدىكتەر بار. سوندىقتان جالپى قالامگەرلەردىڭ قالامىنا قارىم، وزدەرىنە ەرەكشە دارىن تىلەيمىز.

وسىدان سوڭ  قازاقستان جازۋشىلار وداعى توراعاسىنىڭ ورىنباسارى باقىت بەدەلحان جالپى كىتاپ اۆتورلارىن كوڭىل قۋانىشىمەن قۇتتىقتاپ، ۇلتىمىزدىڭ ادەبيەتىمەن مادەنيەتىنىڭ وركەندەۋىنە ۇنەمى قولداۋ كورسەتىپ كەلە جاتقان ءوڭىر باسشىسىنا ايرىقشا العىسىن جەتكىزدى.

ەرلان ءجۇنىس، قازاقستان جازۋشىلار وداعى الماتى وبلىستىق فيليالىنىڭ باسشىسى:

- جىل سايىن الماتى وبلىسى اكىمىنىڭ قولداۋىمەن ايماعىمىزداعى اقىن-جازۋشىلاردىڭ كوپتەگەن كىتاپتارى جارىق كورەدى. ماسەلەن، وتكەن جىلى 37 كىتاپ جارىق كورسە، بيىلعى جىلدىڭ العاشقى جارتىسىندا مىنەكەي 41 كىتاپ باسپادان شىقتى.  بۇل كىتاپتاردىڭ  20-سى بيىلعى «جاستار جىلى» اياسىندا، جاس قالامگەرلەردى قولداۋ نەگىزىندە ارنايى باسىلىپ شىققان ولاردىڭ العاشقى كىتاپتارى. وسى كىتاپتار جاستاردىڭ العاشقى شىعارماشىلىق ومىرىندەگى التىن قازىعى، ءتىپتى، جەتىسۋدىڭ، قازاق ادەبيەتىنىڭ ومىرىندەگى ۇلكەن ءبىر تاريحي ساتتەردىڭ ءبىرى بولدى دەپ سانايمىن.

Abai.kz