كەشەدەن بەرى جولدا كەلە جاتىپ جاكىشەۆتىڭ تۇرمەدەن بوساماۋىنا قاتىستى ءتۇرلى پىكىرلەر وقىدىم. كەي دانىشپاندار «ويباي، ءبىزدىڭ بيلىك وڭباعان ەكەن، سۋديالار تازا ەمەس، ت.ب.» دەپ جاتىر. مۇنىڭ بارلىعى دۇرىس. بىراق ويلاناتىن ءبىر ماسەلە بار.

جىگىتتەر، جاكىشەۆ تۇرمەگە كۇنى كەشە قامالعان جوق. ول تۇرمەدە وتىرعانىنا 10 جىل بولدى! سىزدەر وسى ون جىل ىشىندە ونى بوساتۋ ءۇشىن ناقتى نە ىستەدىڭىزدەر؟

وزدەرىڭىزگە وسى سۇراقتى قويىپ كورىڭىزدەر. ەشتەڭە ىستەمەدىڭىزدەر مە؟ وندا نەگە وكپەلەيسىزدەر؟ كوپپەن بىرگە شۋلاپ پوست جازدىڭىزدار، دوستارىڭىزعا جاقسى اتتاندىڭىزدار. جارايسىزدار! بىراق بۇل – از!

ۇنەمى تازا ءجۇرۋ ءۇشىن سىزدەر جۋىناسىزدار، سۋعا تۇسەسىزدەر عوي. تىستەرىڭىزدى كۇتۋ ءۇشىن ونى جۋاسىزدار. ءتىسىمىز تازا بولسىن، ءتانىمىز تازا بولسىن دەپ پوست جازبايسىزدار عوي. ال، وندا نەگە سىزدەر پوست جازعان سوڭ بارلىق سۋديالار تاۋەلسىز بولىپ، ءادىل شەشىم قابىلدايدى، جاكىشەۆتى بوساتىپ جىبەرەدى دەپ سانايسىزدار؟ ول ءۇشىن ناقتى ءبىر ىسپەن اينالىسۋ كەرەك!

بيلىك تە مۇنى ءبىلىپ وتىر، ەرتەڭ كۇن تارتىبىنە باسقا «حايپ» شىعادى، مىناۋ ۇمىتىلادى. شىنىندا دا ازىن-اۋلاق قۇقىققورعاۋشىلاردان باسقا ەشكىم ساياسي تۇتقىندار ماسەلەسىمەن جۇيەلى تۇردە اينالىسقان جوق قوي. دەموكراتيالى ەلدە، ءادىل سوت جۇيەسىمەن ءومىر ءسۇرۋ ءۇشىن الدىمەن ول ءۇشىن ارەكەت ەتۋ كەرەك.

بالتىق ەلدەرى، گرۋزيندەر، قىرعىزدار بىرنەشە جىل بۇرىن دەموكراتيا ءۇشىن شىن كۇش سالدى. ولارعا دەيىن پولياكتار، چەحتار، ۆەنگرلەر ارەكەت جاسادى. ولاردان بىرنەشە عاسىر بۇرىن فرانتسۋزدار، اعىلشىندارع گوللاندىقتار مەن امەريكاندىقتار ارەكەت جاسادى. ەشكىمگە اسپاننان ەشتەڭە تۇسە سالعان جوق. ال سىزدەردىڭ ول «ارەكەتتەرىڭىز» فەيسبۋككە پوست جازۋعا كەتكەن 15 مينۋت پا؟

بىرەۋلەر «وي مىناۋ ۇلتتىق كەڭەسكە مۇشە بولىپ، ءبىر رەت سەمەيگە جاكىشەۆتىڭ سوتىنا بارىپ كەلىپ ەدى ءبارىمىزدى تەرىستەپ جاتىر» دەۋى مۇمكىن. جوق، جىگىتتەر. مەن بۇلاي ايتا الامىن، ويتكەنى مەن ءوز بالالارىم شىن مانىندەگى قۇقىقتىق قازاقستاندا ءومىر ءسۇرۋى ءۇشىن قاجەتتى ارەكەتتەردى بۇرىن، مىنا ۇقسك قۇرىلعانعا دەيىن باستاعام! مىسال كەرەك پە، بىلتىر سايراگۇل سوتىندا بولدىم، مارقۇم جامپوزوۆ ىسىنە قاتىستىم، ماكسيموۆكا اۋىلى تۇرعىندارىنا كومەكتەسىپ كوكشەتاۋعا باردىم. 2016 جىلى اتىراۋعا ماكس پەن تالعاتتىڭ سوتىنا قاتىستىم (ول سوتتا فب جۇلدىزدارى از بولدى), ماكس پەن تالعات تۋرالى ۇكىمەتتىڭ رەسمي جيىنىندا تىكەلەي ەفيردەن ايتتىم. جاكىشەۆكە ءوزىم شىعارعان، ادۆوكاتىنىڭ شىعىنىن كوتەرگەن ارون اتابەكتىڭ بارلىق كىتاپتارىن جىبەرىپ كەلدىم، ءۇيىنىڭ رەمونتىنا كومەكتەستىم، جاڭاوزەن مەن شەتپەدەگى مۇنايشىلاردىڭ ادۆوكاتتارىنىڭ اقشاسىن تولەدىم، اقتاۋعا 6 رەت بارىپ، سوتقا قاتىستىم، سوندا وتىرعان سەرىك ساپارعاليعا كومەكتەستىم. تۇرابەك قۇسايىنوۆقا كومەكتەستىم...

ەگەر سىزدەر شىنىمەن جاكىشەۆتى جانە باسقالاردى تەزىرەك بوساتسىن دەسەڭىزدەر قۇر فب-دا پوست جازىپ وتىرا بەرمەي ماڭىزدىراق بىردەڭە ىستەڭىزدەر. جوق دەگەندە وسكەمەندە وتەتىن كەلەسى سوتقا ۋاقىت ءبولىپ، بيلەت الىپ نەمەسە ءوز كولىگىڭىزبەن بارىپ قاتىسىڭىز. نەمەسە ادۆوكات پەن قۇقىققورعاۋشىنىڭ گونورارىن تولەڭىز. ەگەر ول ءۇشىن شىن الاڭداپ جۇرسەڭىز سونداي ناقتى شارۋا ىستەڭىز. سوزگە (پوستقا) سەنبەيمىن. ءىس-ارەكەت كورىپ تۇرعانىم جوق.

مۇحتار تايجاننىڭ facebook پاراقشاسىنان

Abai.kz