«Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك جۇمىس ساپارىمەن قىزىلوردا وبلىسىنا باردى. ساپار بارىسىندا ول پارتيانىڭ وبلىستىق اكتيۆىمەن كەزدەسىپ، الداعى ماقسات-مىندەتتەرگە توقتالىپ ءوتتى. سونداي-اق ايماقتىڭ بەلسەندى جاستارىمەن ارنايى كەزدەسىپ، پارتيانىڭ جاس بۋىنمەن جۇمىسى جاڭا دەڭگەيگە كوتەرىلەتىنىن جەتكىزدى.

قىزىلوردا جاستارى «نۇر وتان» پارتياسى توراعاسىنىڭ ءبىرىنشى ورىنباسارىمەن كەزدەسۋدە ۇلتتىق ونەردى جاڭعىرتۋ جولدارىن ۇسىندى.

قىزىلوردا جاستارى پارتيا توراعاسىنىڭ ءبىرىنشى ورىنباسارىمەن كەزدەسۋگە بىرنەشە ۇسىنىس دايىنداعان. سونىڭ ءبىرى – جوعارى سىنىپ باعدارلاماسىنا قارجىلىق ساۋاتتىلىق پەن ەكونوميكا ءپانىن قوسۋ. ال مەكتەپكە دەيىنگى دايىندىق مەكەمەلەرىندە قازاق تىلىندەگى مۋلتفيلمدەر سانىن ارتتىرۋ كەرەك دەپ ەسەپتەيدى. بۇل رەتتە انيماتسيالىق تۋىندىلاردىڭ تاربيەلىك ءمانى زور بولۋى ءتيىس. باۋىرجان بايبەك اسىرەسە ايتىستى جاڭعىرتۋعا قاتىستى ۇسىنىستى ەرەكشە قولدايتىنىن ءبىلدىردى.

«ايتىستى قولدايمىز. ەلباسى ايتتى، "Nur Otan" پارتياسى - حالىقتىڭ پارتياسى. ءبىز ايتپاي-اق ، "Nur Otan" پارتياسى حالىقتى بىرىكتىرۋ كەرەك. ەلباسى تاپسىرماسىمەن ايتىستى قولدادىق. قازىر دە ونى ءارى قاراي جاڭعىرتامىز. ءبىرىنشى ايتىس كۇزدە بىزدە الماتىدا باستالادى. قاراجات ماسەلەسى شەشىلدى. اي سايىن ايتىستى وڭىرلەردە وتكىزەمىز»، - دەدى "Nur Otan" پارتياسى توراعاسىنىڭ ءبىرىنشى ورىنباسارى باۋىرجان بايبەك.

سونداي-اق باۋىرجان بايبەك قازىرگى جاھاندانۋ جاعدايىندا ءاربىر ۇلت ءوزىن ساقتاپ قالۋ ءۇشىن كۇرەسىپ جاتقانىنا جانە بۇل رەتتە ءبىزدىڭ جاستارعا ۇلكەن مىندەت جۇكتەلىپ وتىرعانىنا نازار اۋداردى.

– ءبىز تاۋەلسىزدىك العان كەزدە بولاشاعىمىزعا سەنىمسىزدىكپەن قاراعاندار بولدى. ەلباسىنىڭ دانا ساياساتىنىڭ ارقاسىندا ءبىز مەملەكەت قۇرىپ، بۇكىل الەمگە ءوزىمىزدىڭ ەل بولا الاتىنىمىزدى دالەلدەدىك. ەندى وسى ەلدىگىمىزدى كۇشەيتىپ، ءوز قۇندىلىقتارىمىزدىڭ اياسىن كەڭەيتۋىمىز كەرەك. انا ءتىلىمىز بەن تاريحىمىزدى دارىپتەپ، الەمدىك دەڭگەيگە الىپ شىعۋ ءبىزدىڭ مىندەتىمىز. وسى رەتتە جاستارىمىز بەلسەندىلىك تانىتۋى ءتيىس، – دەدى «Nur Otan» پارتياسى توراعاسىنىڭ ءبىرىنشى ورىنباسارى.

وسىعان وراي بەلگىلى ايتىسكەر اقىن مۇحتار نيازوۆ ءتول ونەرىمىزدى قولداپ، ايتىستى قايتا جانداندىرۋ جايىندا ءوز ۇسىنىسىن ءبىلدىردى. مۇنداي ۇسىنىستى ريزاشىلىقپەن قابىل الاتىنىن ايتقان باۋىرجان بايبەك پارتيانىڭ الداعى ۋاقىتتا ايتىستى قولعا الىپ، ونىڭ دامۋىنا جاعداي جاسايتىنىن ايتتى.

– پارتيانىڭ قولداۋىمەن ەندى اي سايىن ءار وڭىردە ايتىس ۇيىمداستىرىلادى. ونىڭ العاشقىسى كۇزدە الماتىدا وتەدى. اقىندارىمىز قوعامداعى وزەكتى ماسەلەلەردى اشىق ايتۋى ءتيىس. بىراق بارلىعى كونسترۋكتيۆتى بولۋى قاجەت، – دەدى باۋىرجان بايبەك.

Abai.kz