ەلىمىزدە كاسىپكەرلىككە ۇمتىلعان ازاماتتاردى مەملەكەت تاراپىنان جان-جاقتى قولداۋ قارقىندى جۇزەگە اسىپ كەلەدى. وسى باعىتتا ءار وڭىردە دە ىرگەلى ىستەر اتقارىلۋدا. ماسەلەن، كەشە ءونىم جانە قىزمەت كورسەتۋ سالاسىنداعى جەتىستىكتەرگە ارنالعان تمد سىيلىعىنىڭ ساراپشىلارى قىزىلوردا وبلىسىندا بولدى، - دەپ حابارلايدى وبلىستىق كاسىپكەرلەر پالاتاسىنىڭ ءباسپاسوز قىزمەتى.

قىرعىزستاننان كەلگەن دينارا ايمۇرزاەۆا مەن مولدوۆادان كەلگەن ناتاليا نەدەلچەۆا وڭىردەگى تمد سىيلىعىنا ۇمىتكەر «ابزال جانە ك» تولىق سەرىكتەستىگىنىڭ جۇمىسىمەن تانىسىپ شىققان.اتالعان سەرىكتەستىك  2017 جىلى «اتامەكەن» ۇكپ-نىڭ ۇيىمداستىرۋىمەن وتكەن قر پرەزيدەنتىنىڭ «التىن ساپا» سىيلىعىنىڭ  يەگەرى اتانعان بولاتىن. كومپانيا ەندى حالىقارالىق ساپا سالاسىنداعى بايقاۋدىڭ كەلەسى كەزەڭىنە ءوتىنىم بەرىپ وتىر.

ايتا كەتەيىك، ءونىم جانە قىزمەت كورسەتۋ سالاسىنداعى جەتىستىكتەرگە ارنالعان تمد سىيلىعى - ساپالى ءونىم شىعارىپ، قىزمەت كورسەتكەن، سونداي-اق وسى سالاداعى قاۋىپسىزدىك سالاسىنا اسا ءمان بەرەتىن، باسقارۋدىڭ جاڭا، زاماناۋي ادىستەرىن ەنگىزگەن كاسىپكەرلىك سۋبەكتىلەرىنە ارنالعان، ەكى جىلدا ءبىر رەت بەرىلەتىن ماراپات.

اتالعان سىيلىقتىڭ ماقساتى -  تمد ەلدەرى اۋماعىندا وندىرىلەتىن ونىمدەردىڭ ەكسپورتتىق الەۋەتىن ارتتىرۋ، كاسىپكەرلەردى ىنتالاندىرۋ. سىيلىققا قاتىسۋعا ءوتىنىم بەرگەن كاسىپكەرلىك سۋبەكتىسى شىعارىپ وتىرعان ونىمدەرىنىڭ ساپالى ەكەنىن ەڭ كەمى ەكى جىل دالەلدەۋى ءتيىس. جانە ونىمدەرىن تمد ەلدەرىنىڭ كەم دەگەندە ەكى ەلىنە ەكسپورتقا شىعارۋى كەرەك.

«ابزال جانە ك» تس-ءنىڭ جۇمىسىمەن تانىسۋعا كەلگەن حالىقارالىق ساراپشىلار كومپانيانىڭ نەگىزگى قىزمەتى – كۇرىشتى ەگۋدەن باستاپ وڭدەۋىنە دەيىنگى بارلىق پروتسەسىمەن، سونداي-اق بيزنەستىڭ الەۋمەتتىك جاۋاپكەرشىلىگى اياسىندا ناعي ءىلياسوۆ اۋىلىن اباتتاندىرۋ اياسىنداعى جاساعان تىرلىكتەرىن كورىپ شىقتى.

ساراپشىلارمەن بىرگە كەلگەن «اتامەكەن» ۇكپ-نىڭ ساراپشىسى ءمادينا مۇقاتوۆا: 

-«ابزال جانە ك» كومپانياسى «التىن ساپانىڭ» جەڭىمپازى اتانا وتىرىپ، ساپا سالاسىنداعى سىيلىقتىڭ ەكىنشى دەڭگەيىنە ءوتىپ وتىر. تمد سىيلىعىنا بەرىلگەن وتىنىشتەردىڭ بارلىعىنا ساراپشىلار بارا بەرمەيدى. ەڭ الدىمەن كومپانيانىڭ جولداعان قۇجاتتارى الدىن الا ساراپتاۋدان وتەدى.  قۇجاتتار تالاپقا ساي بولعان جاعدايدا بارىپ ساراپشىلار كاسىپكەرلىك نىسانىنا كەلىپ جۇمىسىن كورەدى.  مۇنداي دەڭگەيگە جەتۋ ەكىنىڭ ءبىرىنىڭ قولىنان كەلە بەرمەيدى»، - دەدى.

ايتا كەتەيىك، «ابزال جانە ك» تس-ءى 1994 جىلى قۇرىلعان. قىزىلوردا قالاسى سىرداريا اۋدانى ناعي ءىلياسوۆ اۋىلىندا كۇرىش ەگىپ، الىنعان ءونىمدى كومپانيا زاۋىتىندا وڭدەيدى. كومپانيانىڭ ەكى زاۋىتى بار: وڭتۇستىك كورەيا جانە گەرمانيادان اكەلىنگەن. ءار زاۋىتتىڭ قۋاتتىلىعى ساعاتىنا 5 توننا. كومپانيا جىلىنا تازا اقتالعان 25 مىڭ توننا كۇرىش وندىرەدى.

ونىڭ 50 % استامى رەسەي، ۋكراينا، تاجىكستان، وزبەكستان، موڭعوليا تاعى باسقا ەلدەرگە ەكسپورتقا شىعارىلادى.

كومپانيا كۇرىش وندىرۋشىلەردىڭ ۇزدىك ۇشتىگىنىڭ قاتارىندا. «ابزال جانە ك» تس-ءى بيزنەستىڭ الەۋمەتتىك جاۋاپكەرشىلىگى اياسىندا ناعي ءىلياسوۆ اۋىلىنا سوڭعى جىلدارى 1 ملرد.تەڭگەدەن استام قارجى سالعان.

Abai.kz