كەڭسەسى ماسكەۋدە ورنالاسقان كومپانيانىڭ 31 شىلدە كۇنگى حابارلاماسىنداقازاقستان اۋماعىنداعى كوپ قولدانۋشىنىڭ پلاتفورما نەگىزىندە جاسالعان سايتتارعا كىرە الماي شاعىمدانعانى جازىلعان. ونلاين-سەرۆيس وزدەرىنىڭ ەكى IP-ادرەسىنە كىرۋ مۇمكىندىگى شەكتەلگەنىن جانە بۇل جايت مىڭداعان سايتتاردىڭ بۇعاتتالۋىنا اسەر ەتۋى ىقتيمال ەكەنىن ايتقان.
كومپانيا 1 تامىز كۇنگى حابارلاماسىندا IP-ادرەستىڭ "وكىلەتتى ورگاننىڭ قاۋلىسىمەن كىرۋگە بولمايتىن" rainbow-spa.kz سايتىنىڭ IP-ادرەسىمەن سايكەس كەلەتىنىن جازعان. بۇل حابارلامادا سەرۆيس قازاقستاندىق ۇلتتىق تەلەكوممۋنيكاتسيا وپەراتورىنىڭ اقپاراتىنا سىلتەمە جاساعان. قازاقستاندىق وپەراتوردىڭ دەرەگىنشە، بۇل سايت "بالا قۇقىعى" جانە "باق تۋرالى" زاڭ باپتارىن بۇزعان.
كومپانيا ءتۇرلى ەلدەگى مەملەكەتتىك ۇيىمدارمەن بىرلەسە جۇمىس ىستەيتىنىن، شارتتاردى بۇزبايتىنىن، دەگەنمەن "قازاقستانداعى بىردە-ءبىر ينستانتسيادان بۇل رەسۋرسقا بايلانىستى شاعىم الماعانىن" ايتادى. Tilda سايتتاردى IP-ادرەس بويىنشا بۇعاتتاۋ قازىرگى تەحنولوگيا مەن شەكتەۋ تالاپتارىنا ساي ەمەستىگىن العا تارتادى. سەرۆيس زاڭعا قايشى ارەكەتتەر بايقالعان جاعدايدا قولدانۋشىلارعا ارنايى انكەتا تولتىرىپ، جىبەرۋىن سۇرايدى.
Tilda - ۆيزۋالدى كونسترۋكتور كومەگىمەن دايىن "بلوكتار" نەگىزىندە سايت قۇراستىرۋعا مۇمكىندىك بەرەتىن تەگىن سەرۆيس. بۇل سەرۆيستە قازاقستاندىق ونداعان كاسىپورىن سايتى ورنالاسقان. وسى سەرۆيستە ورنالاسقان بىرقاتار سايتتار ءالى دە اشىلمايدى. ۇلتتىق وپەراتور ازىرگە بۇل جايتقا تۇسىنكتەمە بەرگەن جوق.
قازاقستاندا سايت، الەۋمەتتىك جەلى مەن بلوگ-پلاتفورمالاردىڭ بۇعاتتالۋى ءجيى كەزدەسەدى. ەلدە ءبىراز ۋاقىتقا دەيىن Tumblr جانە LiveJournal بلوگ-پلاتفورمالارى جابىق بولعان.
Abai.kz
