رەسپۋبليكالىق ەسەپ كوميتەتىنىڭ ءتورايىمى ناتاليا گودۋنوۆانىڭ قىزىلوردا وبلىسىنا جۇمىس ساپارى اياسىندا ەسەپ كوميتەتى مەن وڭىرلەردىڭ تەكسەرۋ كوميسسيالارى قىزمەتكەرلەرىنىڭ قاتىسۋىمەن "تەكسەرۋ كوميسسيالارىنىڭ قىزمەتىن جەتىلدىرۋدىڭ نەگىزگى ماسەلەلەرى" اتتى ءبىرىنشى كوشپەلى سەمينار ءوتتى.

سەميناردى اشقان وبلىس اكىمى قۋانىشبەك ىسقاقوۆ قىزىلوردا وبلىسىندا وتكىزىلگەن ءىس-شارا ءۇشىن ناتاليا گودۋنوۆاعا العىس ءبىلدىردى.

"وزدەرىڭىزگە بەلگىلى، قىزىلوردا وبلىسى اگرارلىق ايماق بولىپ تابىلادى. بۇگىنگى تاڭدا ءبىز ءوڭىردى اگرارلىق ايماقتان يندۋستريالىق-اگرارلىق ايماققا اينالدىرۋ ءۇشىن جۇمىس ىستەپ جاتىرمىز. اعىمداعى جىلدىڭ مامىر ايىندا ەلباسى ن. ءا. نازارباەۆتىڭ تاپسىرماسى بويىنشا ازىرلەنگەن "2019-2020 جىلدارعا ارنالعان قىزىلوردا وبلىسىنىڭ الەۋمەتتىك-ەكونوميكالىق دامۋىنىڭ كەشەندى جوسپارى" قابىلداندى. كەشەندى جوسپاردى ىسكە اسىرۋ ناتيجەسىندە جالپى وڭىرلىك ءونىم كولەمى 2 ترلن 62 ملرد تەڭگەگە دەيىن ۇلعايتىلاتىن بولادى. سونىمەن بىرگە، الدىمىزدا مەملەكەت باسشىسىنىڭ ايقىنداپ بەرگەن ەل قاجەتىنە باعىتتالعان، ەل مۇددەسىنە قىزمەت ەتەتىن 10 تارماقتان تۇراتىن مەجەلى مىندەت بار", - دەدى وبلىس اكىمى.

سونداي-اق، ايماق باسشىسى، وبلىس اكىمدىگى بيۋدجەت قاراجاتىن ماقساتتى جانە ءتيىمدى پايدالانۋدى قامتاماسىز ەتۋ بويىنشا ءتيىستى جۇمىستاردى جۇرگىزەتىنىن ايتىپ، سەمينار ۇيىمداستىرۋشىلارى مەن قاتىسۋشىلارىنىڭ جۇمىسىنا ساتتىلىك تىلەدى.

رەسپۋبليكالىق ەسەپ كوميتەتىنىڭ ءتورايىمى ناتاليا گودۋنوۆا كوميتەت پەن تەكسەرۋ كوميسسيالارىنىڭ جۇمىسىنداعى زاڭدى كۇشىنە ەنگەن جانە الداعى وزگەرىستەر تۋرالى ايتىپ بەردى.

"ەگەر بۇرىن ءبىز تەك بيۋدجەت يگەرىلۋىن تەكسەرەتىن بولساق، قازىر ەسەپ كوميتەتىنىڭ قاراۋىنا مەملەكەتتىك باعدارلامالاردىڭ ءاۋديتى، جەكەلەگەن سالالار ءاۋديتى، مەملەكەتتىك مۇلىك پەن اكتيۆتەردى پايدالانۋ ءاۋديتى سياقتى وكىلەتتىكتەر بەرىلدى.  سونىمەن قاتار، مەملەكەت باسشىسى بيۋدجەت قاراجاتىن ءتيىمسىز جوسپارلاۋ مەن پايدالانۋشىلاردى جاۋاپكەرشىلىككە تارتۋدى كۇشەيتۋدى تاپسىردى", - دەدى ناتاليا گودۋنوۆا.

سونداي-اق، رەسپۋبليكالىق ەسەپ كوميتەتىنىڭ ءتورايىمى قىزىلوردا وبلىسىنىڭ تەكسەرۋ كوميسسياسى ەلىمىزدەگى ەڭ مىقتىلاردىڭ ءبىرى ەكەنىن ايتىپ، وتكەن 2 جىل ىشىندەگى ءوڭىردىڭ دامۋ ناتيجەلەرىن تاڭقالارلىق دەپ باعالادى.

سەمينار بارىسىندا ەسەپ كوميتەتىنىڭ قىزمەتكەرلەرى ستراتەگيالىق ماقساتتار مەن نەگىزگى كورسەتكىشتەرگە قول جەتكىزۋ قۇرالى رەتىندەگى تيىمدىلىك ءاۋديتى تۋرالى، مەملەكەتتىك ءاۋديتتى قۇقىقتىق سۇيەمەلدەۋ تۋرالى، ساپانى باقىلاۋدى جۇرگىزۋ ءتارتىبىن جەتىلدىرۋ تۋرالى ايتىپ بەردى، سونداي-اق ءىس-شارالاردى ۇيىمداستىرۋ مەن وتكىزۋ تاجىريبەسىمەن جانە تيىمدىلىك ءاۋديتىنىڭ ادىسنامالىق قۇجاتتارىن قولدانۋمەن تانىستىرىپ، قاتىسۋشىلاردىڭ سۇراقتارىنا جاۋاپ بەردى.

14-15 تامىزدا رەسپۋبليكالىق ەسەپ كوميتەتىنىڭ ءتورايىمى ناتاليا گودۋنوۆا باستاعان دەلەگاتسيا قىزىلوردا وبلىسىندا جۇمىس ساپارىمەن بولىپ، ايماقتىڭ تەكسەرۋ كوميسسياسىنىڭ ۇجىمىمەن كەزدەسىپ، تەكسەرۋ كوميسسيالارىنىڭ قىزمەتىن جەتىلدىرۋ ماسەلەلەرى بويىنشا كىشى كوميتەتتىڭ وتىرىسىن جانە رەسپۋبليكالىق كوشپەلى سەمينار وتكىزدى، سونداي-اق شيەلى كەنتىندەگى ورتالىق اۋداندىق اۋرۋحانانىڭ جۇمىسىمەن جانە سىرداريانىڭ سول جاق جاعالاۋىنداعى قۇرىلىس بارىسىمەن تانىستى.

Abai.kz