جۇمىس ساپارى بارىسىندا وبلىس اكىمى قۋانىشبەك ىسقاقوۆ ارىس قالاسىنداعى قالپىنا كەلتىرۋ جۇمىستارى مەن تۇركىستانداعى حالىققا قىزمەت كورسەتۋ كەشەنى قۇرىلىسىمەن تانىستى.

بۇگىن قىزىلوردا وبلىسىنىڭ اكىمى قۋانىشبەك ىسقاقوۆ جۇمىس ساپارىمەن تۇركىستان وبلىسىنا بارىپ، وندا ايماققا بولىنگەن ارىس قالاسىنداعى № 6 اۋماقتى ارالاپ كوردى.

ەستەرىڭىزگە سالا كەتەيىك، قىزىلوردا وبلىسىنا ارىس قالاسىنداعى 268 تۇرعىن ءۇي، 5 الەۋمەتتىك جانە 10 كاسىپكەرلىك نىسان ورنالاسقان № 6 اۋماق بولىنگەن. بۇگىنگى كۇنى قالپىنا كەلتىرۋگە جاتپايتىن ۇيلەردىڭ ءبىرى بۇزىلىپ، ونىڭ ورنىنا جاڭا ءۇي ساتىپ الىندى;  كەلىسىم بويىنشا قالانىڭ كوپقاباتتى ۇيلەرىنىڭ بىرىنەن تۇرۋعا جارامسىز دەپ تانىلعان جەكە ءۇي تۇرعىندارى (93 جاستاعى اجە، 60 جاستاعى مۇگەدەك ۇلى مەن 19 جاستاعى نەمەرەسى) مەن ءبىر اۋلادا ورنالاسقان تۇرۋعا جارامسىز ەكى ءۇيدىڭ تۇرعىندارى ءۇشىن جاڭا باسپانا ساتىپ الىندى. قالعان 264 ءۇي تولىعىمەن قالپىنا كەلتىرىلدى. قالپىنا كەلتىرۋ جۇمىستارىن ورىنداۋ ءۇشىن 20 قۇرىلىس كومپانياسى جۇمىلدىرىلعان بولاتىن. سىربويىلىق قۇرىلىسشىلار ارىس قالاسىندا وزدەرىنە بولىنگەن جۇمىستارىن تولىعىمەن اياقتادى.

سونداي-اق، ايماق باسشىسى تۇركىستانداعى حالىققا قىزمەت كورسەتۋ كەشەنىنىڭ (شىعىس مونشاسى) قۇرىلىس بارىسىمەن تانىسىپ، قازاقستان رەسپۋبليكاسىنىڭ پرەمەر-ءمينيسترى اسقار مامينگە قۇرىلىس جۇمىستارى تۋرالى باياندادى.

"بۇگىنگى تاڭدا كەشەن قابىرعالارى مەن باعانالارىن سالۋ جۇمىستارى تولىعىمەن اياقتالدى، عيماراتتى جىلۋ وقشاۋلاعىش ماتەريال – مينەرالدى ماقتامەن قاپتاۋ جانە ىشكى ارلەۋ جۇمىستارى جۇرگىزىلۋدە. كەستەدەن قالىس قالۋ جوق، قۇرىلىس جوسپارلانعان مەرزىمدە اياقتالادى", - دەدى قۋانىشبەك ىسقاقوۆ.

ەستەرىڭىزگە سالا كەتەيىك، تۇركىستان وبلىسى قۇرىلعاننان كەيىن جاڭا ايماققا سىي رەتىندە بىرقاتار الەۋمەتتىك-مادەني نىسان سالىپ بەرۋ تۋرالى شەشىم قابىلدانعان بولاتىن. ونىڭ ىشىندە قىزىلوردا وبلىسىنا تاۋلىگىنە 100 كەلۋشىگە ارنالعان حالىققا قىزمەت كورسەتۋ كەشەنى (شىعىس مونشاسى) قۇرىلىسى ءبولىندى. كەشەننىڭ جالپى اۋدانى-3 مىڭ ش.م استام، قۇرىلىستىڭ باس مەردىگەرى - "باق-بەرەكە 2030" جشس.

Abai.kz