بۇگىن، 21 تامىز كۇنى نۇر-سۇلتان قالاسىندا قر تۇڭعىش پرەزيدەنتى – ەلباسى نۇرسۇلتان نازارباەۆتىڭ توراعالىعىمەن «Nur Otan» پارتياسى ساياسي كەڭەسىنىڭ كەڭەيتىلگەن وتىرىسى ءوتتى.

وتىرىسقا نۇرسۇلتان نازارباەۆتان بولەك، مەملەكەت باسشىسى قاسىم-جومارت توقاەۆ جانە ۇكىمەت مۇشەلەرى، پرەزيدەنت اكىمشىلىگى، دەپۋتاتتار مەن اكىمدەر، سونداي-اق، ۇلتتىق كومپانيالار قاتىستى.

نۇرسۇلتان نازارباەۆ وتىرىستى اشىپ، پارتيانىڭ اتقارعان جۇمىستارى مەن الداعى جوسپارلارىنا توقتالدى.

"جاڭا ساياسي جاعدايلاردا پارتيانىڭ ءرولى ايتارلىقتاي ارتادى. بۇگىن ءبىزدىڭ كەڭەيتىلگەن وتىرىستا پارتيا الدىندا تۇرعان مىندەتتەردى تالقىلاپ، الداعى قادامدارىمىزدى بەلگىلەۋدى ۇسىنامىن", - دەدى ەلباسى.

سوىنمەن قاتار، ەلباسى بارلىق سايلاۋ كونستيتۋتسيالىق مەرزىمدە وتەتىنىن ايتتى.

"بارلىق سايلاۋ كونستيتۋتسيالىق مەرزىمدە وتەدى. قازىر ۇكىمەت پەن اتقارۋشى بيلىك سايلانعان پرەزيدەنت توقاەۆتىڭ سايلاۋالدى باعدارلاماسىن قولعا الۋى ءتيىس. مىنە، ءبىزدىڭ پارتيا وسىعان باعىتتالۋى قاجەت", - دەدى ەلباسى.

ەلباسى نۇرسۇلتان نازارباەۆ ەل ىشىندە ءتارتىپ بۇزىلۋىنىڭ سالدارى تۋرالى ويىمەن ءبولىستى.

"پوستكەڭەستىك ەلدەردەن باستاپ افريكاعا دەيىنگى ەلدەردى قاراپ كورىڭىز. ساياسي تۇراقسىزدىق كەزىندە ءبىرىنشى كەزەكتە كىم زارداپ شەگەدى؟ ەكونوميكا قۇلاعاندىقتان، حالىقتىڭ ءومىر ءسۇرۋ ساپاسى دا تومەندەيدى. جۇمىس ىستەۋگە ۋاقىت جوق – شۋلاپ، ورتاعا شىعادى. دەمونستراتسيا مەن شەرۋلەر... ءتارتىپ پەن بيلىك جوق جەردە – پروبلەما شەشىلمەيدى. ءاربىر ادامنىڭ قاۋىپسىزدىگى، ەلدىڭ تۇراقتىلىعى بۇزىلادى. وزەكتى ماسەلەلەرمەن اينالىسۋ شەتتە قالادى. ارقاشان شۋلاپ جۇرەتىن ادامدارعا تاعى دا ءبىر ايتا كەتەيىن، بارلىق سايلاۋلار كونستيتۋتسيالىق مەرزىمدە وتەتىن بولادى. وسى تاقىرىپتى جابايىق", - دەدى نۇرسۇلتان نازارباەۆ.