قوزعالىس بەلسەندىسى، سۋرەتشى رومان زاحاروۆتىڭ ازاتتىققا ايتۋىنشا، تاڭەرتەڭگى ساعات توعىزدىڭ كەزىندە ۇيىنە كەلگەن قۇقىق قىزمەتكەرلەرى ونى الماتى پوليتسياسى دەپارتامەنتىنە جەتكىزگەن. قوزعالىس بەلسەندىلەرى جانەل شاحانوۆا مەن اسەم جاپيشەۆاعا دا پوليتسيا شاقىرتۋ جىبەرگەن. زاحاروۆ پوليتسيا مەكەمەسىندە ونىمەن قالالىق اكىمدىك وكىلدەرى "پروفيلاكتيكالىق اڭگىمە" وتكىزىپ، الماتىدا 30 تامىزدا وتەدى دەپ حابارلانعان مارش جانە قازاقستاندا تىيىم سالىنعان "قازاقستاننىڭ دەموكراتيالىق تاڭداۋى" قوزعالىسى جايلى سۇراقتار قويعانىن ايتتى.
- "Oyan Qazaqstan" تۋرالى سۇرادى. "30 تامىزدا زاڭسىز مارشقا شاقىرىپ جاتىرسىڭدار" دەگەندى ايتتى. بىراق ءبىز الەۋمەتتىك جەلىدە تاراتقان اقپاراتتا مارش وتەتىن ەشقانداي ۋاقىت، مەكەنجاي جازىلماعان، - دەدى رومان زاحاروۆ.
اسەم جاپيشەۆا مەن جانەل شاحانوۆا دا پوليتسيا دەپارتامەنتىنە كىرىپ شىقتى. بەلسەندىلەردىڭ ادۆوكاتى ەرلان ەربولاتوۆ اكىمدىك وكىلدەرىنىڭ پوليتسيا عيماراتىنا شاقىرتۋى زاڭسىز دەپ سانايدى. ول بۇعان بايلانىستى باس پروكۋراتۋراعا ارىز تۇسىرەتىنىن ايتتى.
الماتى قالاسىنىڭ قوعامدىق دامۋ باسقارماسى باسشىسىنىڭ ورىنباسارى ايدار ەسەنبەكوۆتىڭ سوزىنشە، "Oyan Qazaqstan" قوزعالىسىنىڭ الەۋمەتتىك جەلىدە 30 تامىزدا مارش وتەتىن تۋرالى جاريالاعان جازبالارى "ەلدى زاڭسىز قاتىسۋعا شاقىرۋ" بولىپ سانالادى.
"سوندىقتان ولارمەن اڭگىمەلەسىپ، جيىن وتكىزۋ ءۇشىن رۇقسات الۋ كەرەكتىگىن ەسكەرتتىك" دەدى الماتى اكىمدىگىنىڭ وكىلى.
رومان زاحاروۆ بيىل كوكتەمدە الماتىداعى ءال-فارابي داڭعىلى بويىنداعى كوپىرگە قازاقستان كونستيتۋتسياسىنداعى باپتان "مەملەكەتتىك بيلىكتىڭ بىردەن-ءبىر باستاۋى - حالىق" دەگەن ءسوز جازىلعان باننەر ىلگەن سوڭ "قوعامدىق ورىندى بىلعاعانى" ءۇشىن اكىمشىلىك جاۋاپقا تارتىلعان. اۋەلى زاحاروۆتى اكىمشىلىك قاماۋعا الۋ تۋرالى شەشىم شىعارعان سوت كەيىن جازانى ايىپپۇلعا اۋىستىرعان.
بۇعان دەيىن "Oyan Qazaqstan" ازاماتتىق قوزعالىسىنىڭ بەلسەندىلەرى 30 تامىز، قازاقستان كونستيتۋتسياسى كۇنى بەيبىت شەرۋگە شىعۋدى جوسپارلاپ وتىرعانىن حابارلاعان.
Abai.kz
