"كونستيتۋتسياعا سايكەس، ازاماتتارىمىز ءوز ەركىن بىلدىرۋگە قۇقىلى. ەگەر بەيبىت اكتسيالار زاڭدى جانە ەلدىڭ شىرقىن بۇزۋدى كوزدەمەسە، وندا بەلگىلەنگەن زاڭ شەڭبەرىندە ميتينگىلەرگە رۇقسات بەرىپ، ارنايى ورىن ءبولۋ كەرەك" دەدى توقاەۆ. پرەزيدەنت ونداي ورىنداردىڭ قالانىڭ شەتىندە بولماۋى كەرەكتىگىنە نازار اۋداردى.

بۇعان قوسا ول "كونستيتۋتسياعا قايشى، بۇزاقىلىق اكتسيالاردىڭ كەز كەلگەنىنە" زاڭ اياسىندا تويتارىس بەرىلەتىنىن ەسكەرتتى.

توقاەۆ پرەزيدەنت اكىمشىلىگىندە مەملەكەتتىك ورگانداردىڭ ازاماتتاردىڭ شاعىم-وتىنىشتەرىن قاراۋ ساپاسىن قاداعالايتىن ءبولىم اشىلاتىنىن حابارلادى. ونىڭ سوزىنشە، ادەتتە جەرگىلىكتى جانە ورتالىق ورگاندارداعى شەنەۋنىكتەردىڭ "كەرەڭدىگىنەن" حالىق پرەزيدەنتكە جۇگىنۋگە ءماجبۇر بولادى.

قازاقستاندا جاڭا كونسۋلتاتيۆتىك كەڭەسۋ ورگانىن قۇرۋ قاجەتتىگى تۋرالى قاسىم-جومارت توقاەۆ 12 ماۋسىمدا نۇر-سۇلتاندا وتكەن يناۋگۋراتسياسى كەزىندە مالىمدەگەن. ەلدى 30 جىلعا جۋىق ۇزدىكسىز باسقارعان نۇرسۇلتان نازارباەۆ بيىل ناۋرىز ايىندا پرەزيدەنتتىك وكىلەتىن مەرزىمىنەن بۇرىن توقتاتىپ، ورنىنا توقاەۆتى قالدىرعان. ماۋسىمداعى كەزەكتەن تىس سايلاۋدىڭ رەسمي جەڭىمپازى بولىپ جاريالانعان توقاەۆ قوعاممەن ديالوگ ورناتۋ ءۇشىن ۇلتتىق سەنىم كەڭەسىن (قۇرامىنا پرەزيدەنت اكىمشىلىگى ىرىكتەگەن 44 ادام ەنگەن) قۇراتىنىن جاريالاعان. كەڭەس تۋرالى قوعامدا ءارتۇرلى پىكىر بار. كەيبىرەۋلەر ونى ساياسي وپىردەگى "جىلىمىققا" بالاسا، ەندى بىرەۋلەر ونىڭ "ەشقانداي پايداسى جوق" دەپ سانايدى. پرەزيدەنت اكىمشىلىگىنىڭ حابارلاۋىنشا، ۇلتتىق سەنىم كەڭەسىنىڭ العاشقى وتىرىسى 6 قىركۇيەكتە وتپەك.

قازاقستاندا بيىلعى جىلى بەيبىت شەرۋلەر مەن ميتينگىلەر جيىلەگەن. شىلدە ايىنا دەيىن ونداي اكتسيالاردىڭ سوڭى شەرۋگە قاتىسقانداردى ۇستاپ، اكىمشىلىك قاماۋعا الۋ جانە ايىپپۇل سالۋمەن اياقتالاتىن.

Abai.kz