حالىقتىڭ الەۋمەتتىك ماسەلەسىنە نازار اۋدارۋ مەملەكەتتىك ساياساتتىڭ باسىم باعىتىنا اينالدى. ءادىلىن ايتقاندا، ەلىمىزدە ءار ازاماتتىڭ تۇرمىس-تىرشىلىگى مەن يگىلىگى ءۇشىن ءتيىستى باعدارلامالار قابىلدانىپ، جۇمىس جۇيەلى جۇزەگە اسۋدا. 

قازاقستان پرەزيدەنتى قاسىم-جومارت توقاەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا حالىقتىڭ الەۋمەتتىك ماسەلەسىنە باسىمدىق بەردى. جەكەلەگەن ازاماتتاردىڭ ءوتىنىش-تىلەكتەرى مەن تالاپتارى مىندەتتى تۇردە ورىندالاتىنىن مالىمدەدى.

راسىندا، حالىققا قىزمەت ەتۋدەن اسقان عازيز نارسە جوق. جۇرتتىڭ قاراپايىم تالاپ-تىلەگىن ورىنداۋ – كەز كەلگەن سالاعا جاۋاپتى تۇلعانىڭ اسىل بورىشى. ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «ارالارىڭدا ەڭ جاقسىلارىڭ – اينالاسىنا پايدالى بولعاندارىڭ», – دەپ قوعامعا شۋاعىن شاشىپ، جاقسىلىعىن جايىپ جۇرەتىن كوپشىل كىسىنىڭ مارتەبەسىن ەرەكشە اتاپ وتكەن.

وسىندايدا حالىق دانالىعىندا ايتىلاتىن:

«جامان ەردىڭ قايعىسى،

ءوز وتىنىڭ قاسىندا.

جاقسى ەردىڭ قايعىسى،

اۋىلىنىڭ باسىندا»، – دەگەن ورامدار ويعا ورالادى...

پرەزيدەنت قازاق حالقىنىڭ مەملەكەت قۇراۋشى ۇلت رەتىندەگى ءرولىن بەكەمدەپ، ەتنوسارالىق تاتۋلىق پەن دىنارالىق تۇسىنىستىكتى قالىپتاستىرا بەرۋ قاجەتتىگىن اتاپ ءوتتى. راسىندا، بۇل – وتە وزەكتى ماسەلە. ءبىز تاۋەلسىزدىك جىلدارىندا قانداي اسۋدان اسىپ، نەندەي بەلەستى باعىندىرساق تا بىرلىگىمىزدىڭ ارقاسىندا قول جەتكىزدىك.

قاسىم-جومارت توقاەۆ الەم مويىنداعان عۇلاما ءال-ءفارابيدىڭ 1150, حاكىم ابايدىڭ 175 جىلدىق مەرەيتويىنا وراي تۇلعالارىمىزدىڭ ەڭبەكتەرىن حالىق اراسىندا دارىپتەۋدى تاپسىردى. بۇل باستامانى ەلىمىزدەگى ءدىن عالىمدارى مەن مۇسىلمان قاۋىمى دا ۇلكەن قۋانىشپەن قابىلدادى. يسلام ءدىنىنىڭ ادامگەرشىلىك قۇندىلىقتارىن ناسيحاتتاۋدا ءال-فارابي، اباي، شاكارىم، ت.ب. تۇلعالارىمىزدىڭ ءومىرى مەن وشپەس مۇراسى قۇندى قۇرال بولا الادى.

قازاقستان مۇسىلماندارى ءدىني باسقارماسى بىرنەشە جىلدان بەرى «ءدىن مەن ءداستۇر جىلى» باستاماسى اياسىندا ۋاعىز-ناسيحات جۇمىستارىندا قازاق حالقىنىڭ بي-شەشەندەرى مەن اقىن-جىراۋلارىنىڭ، عۇلاما-عالىمدارىنىڭ ۇلاعاتتى سوزدەرىن، تاعىلىمدى تۇجىرىمدارىن ناسيحاتتاپ كەلەدى. بۇل يگى ءىس ءاردايىم جالعاسىن تابا بەرمەك.

مەملەكەت باسشىسى جولداۋدا ەكونوميكالىق الەۋەتىمىزدى ارتتىرۋمەن قاتار، ءبىلىم ساپاسىن كوتەرۋگە ايرىقشا ءمان بەردى.

ءيا، ءبىلىم – باعا جەتپەس قازىنا. ءىلىمسىز وركەنيەت جوق. بۇگىندە كۇش پەن قۋات – بىلىمدە. عىلىمنان اسقان قىمبات دۇنيە جوق. پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «ءبىلىم مەن حيكمەت مۇسىلمانداردىڭ جوعالتقان قازىناسى، قاي جەردەن تاپسا دا يەمدەنىپ السىن», – دەگەن. وقۋ ورىندارىندا وقىپ جۇرگەن ۇل-قىزدارىمىز، باۋىرلارىمىز ەل-جۇرتقا پايدا اكەلەر ءبىلىم ىزدەنسە، الەمنىڭ ەڭ وزىق تەحنولوگيالارىن ۇيرەنىپ، ونى وزگەگە ۇيرەتسە – ەلگە قوسقان ۇلەسى وسى بولماق.

اللا تاعالا مەملەكەتىمىزدىڭ بولاشاعىن باياندى ەتىپ، حالىقتىڭ ءال-اۋقاتىن كوتەرۋ جولىنداعى يگى ىستەرىمىزگە بەرەكە بەرگەي! ءامين!

سەرىكباي قاجى وراز

قازاقستان مۇسىلماندارى  ءدىني باسقارماسىنىڭ توراعاسى، باس ءمۇفتي

Abai.kz