بەلگىلى قالامگەر تىنىشتىقبەك ابدىكاكىمۇلى: «ءتىلى مەن قىزدارىنىڭ ەتەگى اشىلعان ەلمىز» دەگەن قاناتتى ءسوزدى ومىرگە اكەلگەن بولاتىن. وسى ەتەكتىڭ اشىلۋى ورىس ءتىلدى اقپاراتتىق شابۋىلعا وزەك بولا باستادى. رف مەدياسايتتارى قازاقتىڭ بەلگىلى ءبىر بولىگىن ءدىل مەن سالتا-داستۇردەن قول ۇزگەندەر ساناتىنا جاتقىزىپ، وزگە ۇلتتان قالىڭدىق ىزدەگەن ورىس جىگىتتەرىنە قازاق قىزدارىنا ۇيلەنۋگە كەڭەس بەرە باستادى.

ءيا، الەمدىك نەكە نارىعىندا ورىس كۇيەۋلەردىڭ ءباسى ءماز بولماس دا، ولارعا ورىس ءتىلدى قازاق قىزدارى كەت ءارى ەمەس ەكەن. وتباسىلىق جاعدايىمىزدى بىزدەن جاقسى بىلەتىن سولتۇستىكتەگى كورشىمىزدىڭ ساراپشىلارى ورىستارمەن نەكەگە تۇرۋعا بەيىل قازاق قىزدارىنىڭ ءۇش باستى سەبەبىن العا تارتادى. ونىڭ ءبىرىنشىسى – انا ءتىلىن تارك ەتكەن قالالىق قازاقتار اراسىنداعى ورىستانۋ پروتسەسىنىڭ جوعارى ەكەندىگى جانە ءورىستىلدى اقپاراتتى تۇتىنۋشىلىق باستى ورىندا تۇرۋ بولسا، ەكىنشىسى – ەلدەگى ەكونوميكالىق جاعدايدىڭ تومەندەۋى جاعدايلارىن شەشىپ الۋدى قالاعان بيكەشتەرگە ءوزى بىلەتىن تىلدەگى ورىس جىگىتتەرىنە ۇيلەنىپ، رف تۇراقتاپ قالۋعا مۇمكىندىك بەرەدى ەكەن.

ۇشىنشىدەن، قازاق قىزدارىنىڭ بۇنداي قادامعا بارۋىنا ۇلتتىق سالت-ءداستۇرىمىزدىڭ ءوز كۇشىنە ەنە باستاۋى ماجبۇرلەيدى-ءمىس. ەگەر ولار ورىس جىگىتتەرىنە ۇيلەنەتىن بولسا، سالت-ءداستۇردىڭ تەمىر نوقتاسىنان ازات بولادى ەكەن. ورىسقا شىققان قازاق كەلىندەرى تاماق دايىنداۋ جاعىنان وزگە ۇلتتاردى ارتتا قالدىراتىن باستى قاسيەتىن ورىس ساراپشىلارى كوككە كوتەرە وتىرىپ دارىپتەيدى.

وسىلايشا ءتىلى مەن مادەني قۇندىلىقتارى ۇيلەسكەن جاس وتباسى جاڭا ومىرگە نىق سەنىممەن اياق باسا الادى. ءارى كوپبالالى بولۋعا قازاق كەلىنشەكتەرىنىڭ قارسى بولمايتىندىعىن العا تارتادى. تاريحتا ورىس-قازاق نەكەسىنەن دۇنيەگە كەلگەن گەنەرال كورنيلوۆ ت.ب. اتاقتى تۇلعالاردى ءسوز ەتۋدى پيعىلى جات جاندار ەش ۇمىتپاپتى.

وسىلايشا ورىس ءتىلدى قازاق قىزدارىن رف ازاماتتىعىن الۋعا نەكە ارقىلى شاقىرۋدىڭ ارتىندا نە بۇعىپ جاتقانىن ءوزىڭىز-اق پايىمداي بەرىڭىز!؟

ءابىل-سەرىك الىاكبار

Abai.kz