جاسۇلان قانباليەۆتىڭ سوزىنشە، بۇرعىلاۋشى كومەكشىلەرىنىڭ جالاقىسى نارازىلىق اكتسيالارىنان كەيىن 50 پايىزعا كوبەيگەن.
- بۇرىن قولىما 120 مىڭ تەڭگە (308 دوللار) الىپ ءجۇردىم. كەي كەزدە اي 28-30 كۇننەن بىتكەن كەزدە جالاقىم ءتىپتى ازايىپ قالاتىن. قازان ايىنان باستاپ جالاقىما 50 پايىز قوسىلاتىن بولسا، قولىما اي سايىن 200 مىڭ تەڭگە (514 دوللار) ءتيۋى كەرەك. ارينە، قىمباتشىلىق قىسپاققا الىپ تۇرعان كەزدە 200 مىڭ تەڭگە دە اسا كوپ اقشا ەمەس. دەگەنمەن بۇعان دا شۇكىر، - دەيدى جاسۇلان قانباليەۆ.
جۇمىسشىلار نارازىلىعىنان كەيىن قىتاي كومپانياسىنىڭ جالاقىنى كوبەيتكەنىن اقتوبە وبلىسىنىڭ اكىمدىگى دە راستادى. اقتوبە وبلىسى اكىمىنىڭ ورىنباسارى قايرات بەكەنوۆتىڭ ايتۋىنشا، "ۆوستوك نەفت ي سەرۆيسنوە وبسلۋجيۆانيە" كومپانياسىندا بۇرعىلاۋشىنىڭ كومەكشىسى بولىپ ەڭبەك ەتەتىن قازاقستاندىقتار جىلدار بويى ەڭ اۋىر جۇمىستى ىستەپ، ەڭ از جالاقى الىپ كەلگەن.
- ەكى ايعا سوزىلعان جۇمىسشىلار نارازىلىعى وبلىس اكىمدىگىن مەدياتور رەتىندە ارەكەت ەتۋگە ماجبۇرلەدى. نەگىزى بۇل اكىمدىك ارالاساتىن شارۋا ەمەس ەدى. جالاقى كومپانيانىڭ ىشكى رەزەرۆى ەسەبىنەن كوتەرىلەتىن بولدى. بىراق بارلىق جۇمىسشىنىڭ جالاقىسى 50 پايىزعا وسكەن جوق. دارەجەسىنە بايلانىستى 316 ادامنىڭ جالاقىسى 50 پايىزعا كوبەيدى، - دەيدى قايرات بەكەنوۆ.
جۇمىسشىلار 11 قازاندا كومپانياعا كەلىپ، جالاقى ءوسىرۋدى تاعى دا تالاپ ەتكەن ەدى. ەكى ايعا سوزىلعان جالاقى داۋى اقتوبەدەگى كومپانياعا پەكيننەن ارنايى دەلەگاتسيا كەلگەننەن كەيىن عانا شەشىلگەن. قايرات بەكەنوۆ پەكيننەن كەلگەن دەلەگاتسيامەن ۇزاق ءارى كۇردەلى كەلىسسوز جۇرگىزىلگەنىن ايتادى.
"ۆوستوك نەفت ي سەرۆيسنوە وبسلۋجيۆانيە" سەرىكتەستىگىنىڭ باس ديرەكتورى چجان باوتسزيۋن بۇرعىلاۋشى بريگادالارداعى جۇمىسشىلاردىڭ جالاقىسى ينجەنەرلىك-تەحنيكالىق قۇرامعا قاراعاندا از بولعانىن راستاپ وتىر. چجان باوتسزيان "جۇمىسشىلار تالابى ورىندى" دەپ سانايدى.
- بۇرعىلاۋشىلاردىڭ كومەكشىلەرى مەن دانەكەرلەۋشىلەردىڭ جالاقىسى قازان ايىنان باستاپ 50 پايىزعا ءوستى. سول سياقتى لابورانت-كوللەكتورلاردىڭ جالاقىسىنا 40 پايىزعا، بۇرعىلاۋشى قوندىرعىنىڭ ءماشينيسىنىڭ ايلىعى 30 پايىز، بۇرعىلاۋشىلاردىڭ ەڭبەكاقىسىنا 25 پايىز قوسىلدى. جاڭاجول، كەڭقياق پەن سەۆەرنايا ترۋۆا كەنىشتەرىندەگى بارلىق بۇرعىلاۋشى بريگادالار قايتا جۇمىسقا كىرىستى، -دەدى چجان باوتسزيان.
اقتوبەدەگى "ۆوستوك نەفت ي سەرۆيسنوە وبسلۋجيۆانيە" كومپانياسىنىڭ جۇمىسشىلارى ەكى ايدان بەرى جالاقى ءوسىرۋدى تالاپ ەتىپ جۇرگەن. كومپانيا نارازىلىقتان كەيىن جالاقىنى 20 پايىزعا وسىرەتىندەرىن مالىمدەگەن. بىراق جۇمىسشىلار بۇل شەشىممەن كەلىسپەي، 50 پايىزعا ءوسىرۋدى تالاپ قىلعان.
اقتوبە وبلىسى اكىمدىگىنىڭ دەرەگىنشە، "ۆوستوك نەفت ي سەرۆيسنوە وبسلۋجيۆانيە" - 100 پايىز اكتسياسى قىتايدىڭ Xibu (سيبۋ) كورپوراتسياسىنا تيەسىلى كومپانيا. "سنپس-اقتوبەمۇنايگاز" كومپانياسىنىڭ تاپسىرىسىمەن اقتوبە وبلىسىنداعى مۇناي كەنىشتەرىن بۇرعىلايتىن جۇمىس ىستەيدى. اكىمدىكتىڭ مالىمەتىنشە، كومپانياداعى 1200 ادامنىڭ ون پايىزى - قىتايدان كەلگەن مامان.
جالاقىنىڭ ازدىعىنا شاعىنىپ، نارازىلىق بىلدىرۋشىلەر اراسىندا قىتاي جۇمىسشىلارى جوق.
Abai.kz
