سوت وعان 18 اي سىناق مەرزىمىن بەرگەن: ەگەر بۇل ۋاقىت ارالىعىندا زاڭ بۇزسا، شارتتى جازا تۇرمە جازاسىنا اينالماق. سوت ۇكىمىنە سايكەس، ول 140 ساعات قوعامدىق جۇمىس ىستەۋى ءتيىس، ەسىرتكىگە تاۋەلدىلىكتەن ارىلۋ بويىنشا 20 سەسسياعا قاتىسۋعا مىندەتتى. بۇعان قوسا، سوت ونى مىڭ فۋنت كولەمىندە (شامامەن 1100 دوللار) ايىپپۇل تولەپ، 5000 فۋنت كولەمىندە شىعىندى وتەۋگە مىندەتتەدى.

ماۋسىم ايىندا قازاقستاننىڭ ءبىرىنشى پرەزيدەنتى نۇرسۇلتان نازارباەۆتىڭ جيەنى، داريعا نازارباەۆانىڭ ۇلى ايسۇلتان نازارباەۆ لوندوندا ەسىرتكىنىڭ كۇشىمەن پوليتسيا قىزمەتكەرلەرىنە قارسىلىق كورسەتىپ، ولاردىڭ ءبىرىن تىستەپ الدى دەپ ايىپتالعان ەدى. تەرگەۋ ورىندارىنىڭ دەرەگىنشە، پوليتسەيدىڭ قولىندا كادىمگىدەي ءىز قالىپ، قان اققان.

نازارباەۆ ەسىرتكىدەن ەمدەلگەن Priory ەمحاناسىنىڭ دەرەگىنە سايكەس، ناۋقاس دارىگەرلەردىڭ نۇسقاۋلىعىن مۇقيات ورىنداپ، ەمدەۋ كەزىندە ودان ىلگەرىلەۋشىلىك بايقالعان. سۋديا سونى ەسكەرىپ، ونىڭ تۇرمەدەن گورى بوستاندىقتا ءجۇرىپ ەمدەلگەنى دۇرىس بولادى دەپ ۇكىم شىعارعان. نازارباەۆتىڭ ادۆوكاتىنىڭ ايتۋىنشا، ەكس-پرەزيدەنتتىڭ جيەنى "سوت ۇكىمىن ەستىگەن سوڭ اۋىر جۇك موينىنان تۇسكەندەي سەزىنگەن". نازارباەۆتىڭ ءوزى BBC-گە تۇسىنىكتەمە بەرۋدەن باس تارتقان.

ايسۇلتان نازارباەۆ – داريعا نازارباەۆا مەن اۆستريا تۇرمەلەرىنىڭ بىرىندە كوز جۇمعان راحات اليەۆتىڭ ۇلى. ول - ۇلىبريتانيا كورولدىگىنىڭ "ساندحەرست" اسكەري اكادەمياسىنىڭ تۇلەگى. ايسۇلتان نازارباەۆ وقۋىن ءبىتىرىپ، قازاقستانعا ورالعان سوڭ ەلدىڭ قورعانىس مينيسترلىگىنىڭ بارلاۋ باسقارماسىندا قىزمەت ەتكەن. 2017 جىلى جەتى ايداي قازاقستان فۋتبول فەدەراتسياسىنىڭ ۆيتسە-پرەزيدەنتى قىزمەتىن اتقارعان. سوڭعى ءبىر جارىم جىلداي ول جۇرت نازارىنا شىقپاي كەتكەن.

قازاقستاندى وتىز جىلعا جۋىق باسقارعان نۇرسۇلتان نازارباەۆ بيىل ناۋرىز ايىندا وتستاۆكاعا كەتكەنمەن قولىندا ءبىراز بيلىكتى ساقتاپ قالدى. نازارباەۆتىڭ زاڭمەن بەكىتىلگەن “ەلباسى” مارتەبەسى بار. وعان سايكەس، نازارباەۆ پەن ونىڭ وتباسى قانداي دا ءبىر قىلمىستىق يا اكىمشىلىك جاۋاپقا تارتىلمايدى.

نازارباەۆ وتباسى ايسۇلتاننىڭ ىسىنە بايلانىستى تۇسىنىكتەمە بەرگەن جوق.

Abai.kz