29 قازان كۇنى استانا حالىقارالىق ۋنيۆەرسيتەتىنىڭ رەكتورى سەرىك ىرساليەۆ ارىس قالاسىندا زارداپ شەككەن 10 وتباسىنىڭ بالاسىنا گرانت بولگەن كاسىپكەر نۇركەن جارىلقاپۇلىنا العىس ايتتى.

24 ماۋسىمدا ارىس قالاسىندا اسكەري قويما جارىلىپ قالا حالقى قيىن جاعدايدا قالعان بولاتىن. رەسپۋبليكانىڭ تۇكپىر-تۇكپىرىنەن كومەككە اسىققان قازاقستان جۇرتى ارىس حالقىنا ۇلكەن قولداۋ ءبىلدىردى. سونداي ىزگى ءىستىڭ ءبىرىن تۇركىستان وبلىسىنىڭ تۋماسى، كاسىپكەر نۇركەن جارىلعاپۇلى اتقاردى. ول ارىستىق 10 بالانىڭ جوعارعى وقۋ ورنىنا ءتۇسىپ، 4 جىل بويى تەگىن وقىپ شىعۋىنا مۇمكىندىك بەردى.

استانا حالىقارالىق ۋنيۆەرسيتەتىنىڭ 1 كۋرس ستۋدەنتتەرى زاۋر، زارينا جانە زامير زۇلىپحاروۆتار ارىس قالاسىنان بيىل كەلگەن. اعايىندى (ۇشەم) ستۋدەنتتەردىڭ ارقايسى ءوز سالاسىنىڭ مامانى بولۋدى ارماندايدى. زارينا ءىز كەسۋشى بوپ ىشكى ىستەر سالاسىندا ەڭبەك ەتكىسى كەلەدى. ال، زاۋر پايدالى سايتتار مەن باعدارلامالار جاسايتىن بىلىكتى IT مامانى بولۋدى قالايدى. زاميردىڭ ارمانى Google كومپانياسىندا قىزمەت ەتۋ.

“ارىستا بولعان جاعدايدان ءبارىمىز حاباردارمىز. حالىق ۇلكەن قولداۋعا مۇقتاج بولدى. كاسىپكەر رەتىندە ءبىر وقپەن ەكى قويان اتتىڭىز. كومەككە مۇقتاج جانداردىڭ قاجەتىن وتەدىڭىز جانە جاس بۋىننىڭ ساپالى ءبىلىم الۋى ءۇشىن مۇمكىندىك اشتىڭىز. جاستار جانە جاڭا ۋنيۆەرسيتەت ءۇشىن ۇلكەن قولداۋ كورسەتتىڭىز. بۇل – الەمدىك تاجىريبە. الەمدە بىلىمگە ينۆەستيتسيا قۇيۋ دامىعان. قازاقستاندا بۇل ءۇردىس ەندى دامىپ كەلە جاتىر. كورسەتكەن ازاماتتىعىڭىز ءۇشىن سىزگە ۇلكەن العىس بىلدىرەمىن”، – دەدى سەرىك ىرساليەۆ كاسىپكەر نۇركەن جارىلقاپۇلىنا.

استانا حالىقارالىق ۋنيۆەرسيتەتىنىڭ رەكتورى سەرىك ىرساليەۆتىڭ ايتۋىنشا، پەداگوگ دايىنداۋ جونىندە ۋنيۆەرسيتەتكە ەڭ ۇلكەن قولداۋدى ء“بىلىم-يننوۆاتسيا” حالىقارالىق قوعامدىق قورى كورسەتىپ جاتىر.

“وزدەرىڭىز بىلەسىزدەر ء“بىلىم-يننوۆاتسيا” حقق-نا قازاقستاننىڭ ەڭ ۇزدىك مەكتەپتەرى كىرەدى. ءۇشتىلدى وقىتۋشىلار، دامىعان ءادىس-تاسىلدەر، اعىلشىن تىلىندەگى ۇزدىك وقۋلىقتار بارلىعى وسى بيل-دىڭ ءبىر ءوزى اتقارىپ وتىرعان شارۋا”، – دەدى رەكتور.

سونىمەن قاتار، ستۋدەنتتەرگە “4 جىلدان كەيىن وقۋدى ءتامامداپ قازاقستاننىڭ بولاشاعىنا پايدالى مامان اتانىپ شىعاسىڭدار دەگەن سەنىمدەمىن”، – دەدى.

ارىستىق 10 بالاعا گرانت تاعايىنداعان كاسىپكەر كىم؟

اسانوۆ نۇركەن جارىلقاپۇلى 1980 جىلى 25 مامىر كۇنى تۇركىستان وبلىسى، شاردارا اۋدانى، قىزىلقۇم ەلدى مەكەنىندە تۋعان.  1997-2001 جىلدارى الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتىندە “حالىقارالىق ەكونوميكالىق قاتىناستار” ماماندىعى بويىنشا ءبىلىم العان. 2002-2004 جىلدارى گەرمانيانىڭ فرايبۋرگ قالاسىنداعى “ۆۋپپەرتال” ۋنيۆەرسيتەتىندە “حالىقارالىق باسقارما” ماماندىعى بويىنشا ءبىلىمىن جەتىلدىرگەن. 2014-2016 جىلدارى شۆەيتساريانىڭ “يۋبيس” ۋنيۆەرسيتەتىندە “مۆا” ماماندىعى بويىنشا ءبىلىم العان.

نۇركەن جارىلقاپۇلى وقۋ ورنىنداعى ارىستىق ستۋدەنتتەرمەن كەزدەسىپ، اعالىق اقىلىن ايتتى. ستۋدەنتتەرگە ءبىلىمنىڭ ماڭىزدىلىعىن ءتۇسىندىرىپ، ساپالى مامان اتانۋعا تىلەكتەستىك ءبىلدىردى.

استانا حالىقارالىق ۋنيۆەرسيتەتى تۋرالى نە بىلەمىز؟

جوعارى وقۋ ورنى رەكتورىنىڭ ايتۋىنشا استانا حالىقارالىق ۋنيۆەرسيتەتى قازاقستاننىڭ ءبىرىنشى پرەزيدەنتى نۇرسۇلتان نازارباەۆتىڭ تىكەلەي جوباسى. 7 باعىت بويىنشا ساپالى مامان دايارلاۋ جوعارى وقۋ ورنىنىڭ باستى ميسسياسى.

“ۋنيۆەرسيتەتىمىزدىڭ اشىلعانىنا 2 جىل بولدى. وتكەن جىلى 200-گە جۋىق ماگيسترانتتار ءبىتىرىپ شىقتى. قازىر، ۋنيۆەرسيتەتىمىزدە 350 ستۋدەنت ءبىلىم الىپ جاتىر. ولاردىڭ ىشىندە 300-دەن اسا باكالاۆريات، قالعانى ماگيستراتۋرا بىلىمگەرلەرى”، – دەدى استانا حالىقارالىق ۋنيۆەرسيتەتىنىڭ الەۋمەتتىك جانە تاربيە باعىتىنداعى ۆيتسە-پرەزيدەنتى الىمجان بەكەجانۇلى.

يگەنباەۆ ءالىمجان بەكەجانۇلى. استانا حالىقارالىق ۋنيۆەرسيتەتىنىڭ الەۋمەتتىك جانە تاربيە باعىتىنداعى ۆيتسە-پرەزيدەنتى جوعارى ءبىلىم بەرۋ مەكتەبى پەداگوگيكالىق فاكۋلتەتىنىڭ دەكانى.

“بيىل باكالاۆرعا تۇسكەن 10 ستۋدەنت ارىس قالاسىندا زارداپ شەككەن وتباسىلاردىڭ بالالارى. مەتسەنات اسانوۆ نۇركەن جارىلقاپۇلى ارنايى 10 بالاعا جاردەماقى تاعايىنداعان بولاتىن. سول بالالار قۇقىق، پەداگوگيكا جانە IT سالاسى بويىنشا بىلىممەن قوسا شاكىرتاقى دا الىپ جاتىر. ارىستاعى ارنايى وكىلدەرىمىز كونكۋرس ارقىلى جاعدايى كەلمەيتىن، مۇمكىندىگىنشە كوپبالالى وتباسىنان شىققان 10 بالانى ىرىكتەپ الدى. سونىمەن قاتار ۇبت-دا جيناعان ۇپايلارىن دا ەسكەردىك. نۇركەن اسانوۆ ەل بولاشاعىنىڭ جاناشىرى عوي. ارىستاعى حالىقتىڭ جاعدايىنا الاڭداپ، جاستار ساپالى ءبىلىم السىن، بولاشاعى جارقىن بولسىن دەپ وسىنى ءوز موينىنا الدى. جاقسى ءىستىڭ باستاۋى دەپ ويلايمىن”، – دەدى الىمجان بەكەجانۇلى.

“بارىمىزگە بەلگىلى قوعامدا مۇعالىمدەردىڭ تاپشىلىعى بار. جىلىنا استانا قالاسىنىڭ وزىنە 850-گە جۋىق مۇعالىم قاجەت. استانا حالىقارالىق ۋنيۆەرسيتەتى الداعى جىلدارى ەلوردانى پەداگوگيكا ماماندارىمەن قامتاماسىز ەتۋدى جوسپارلاپ جاتىر. بىزدە استانا قالاسى اكىمدىگىنىڭ قولداۋىمەن 200-دەي بالا گرانتپەن وقىپ جاتىر. 50 شاقتى ماگيسترانتتىڭ 36-سى مەملەكەتتىك گرانتپەن ءبىلىم الۋدا”، – دەپ اتاپ ءوتتى AIU ۆيتسە-پرەزيدەنتى.

دەرەككوز: kazaknews.kz/

Abai.kz