Jwma, 22 Qaraşa 2019
Dabıl 1748 37 pikir 8 Qaraşa, 2019 sağat 15:06

Aylıq köbeymese de, azıq-tülik qımbattap jatır

Qaraşa ayında Qazaqstanda azıq tülik bağası qımbattadı. EnergyProm saytınıñ habarlauınşa, qazir birinşi swrıptı wn bağası 4%-ke ösken. Säykesinşe, öñirlerdegi nan bağası da aytarlıqtay qımbattadı. Mäselen, Aqtöbede bir bölke nan 7 teñgege, Atırau men Pavlodarda 20 teñgege qımbattağan.

Alayda, qazan ayınıñ ortasında Auıl şaruaşılığı ministrligi eldegi astıq pen wn qorlarınıñ jağdayı twraqtı ekenin, nan bağası belgilengen deñgeyde qalatının aytqan. Biraq, ministrliktiñ bwl sözin öñirlerdegi jağday joqqa şığarıp twr.

Odan bölek, jwmırtqa bağası 3,1%-ke, süt önimderi 3%-ke, qaraqwmıq jarması - 8,6%, tarı bağası - 1,9%, arpa jäne jarma önimderiniñ bağası- 1,5% jäne 1,2% ösken. Al, siır etiniñ bağası birden 2,2%-ke köterilse, qoy eti 1,2%-ke qımbattağan.

Sonımen qatar, qazir elimizde elektr energiyasınıñ bağası da qımbattağan. Mäselen, qazan ayında Oral qalasında tarifterdiñ bağası 10,7%-ke ösken. YAğni, qalada 100 kVt/sağattıñ qwnı - twtınu deñgeyine baylanıstı 1,1 mıñ teñgeden 1,7 mıñ teñgege deyin köterilgen. Al, Öskemen men Semeyde tarifter orta eseppen 6%-ke ösken. Söytip, üş aymaqta ğana tarifter ortaşa eseppen 8%-ke köterildi.

Al, elektr energiyası men azıq-tülik bağası osılay qımbattağanda, jalaqınıñ jayı qanday?

Juırda BAQ ökilderi elimizdegi ortaşa aylıq jalaqı 191,1 mıñ teñgege jetti dep jazdı. Al elimizde tek bes aymaq qana ortaşa deñgeyden joğarı jalaqı aladı eken. Ol bestik - Atırau oblısı, Nwr-Swltan qalası, Mañğıstau oblısı jäne Almatı qalası men Batıs Qazaqstan oblıstarı.

Mäselen, Atırau oblısınıñ twrğındarınıñ ortaşa aylıq jalaqısı - 361,5 mıñ teñge.Nwr-Swltan qalasındağı ortaşa jalaqı - 308,1 mıñ teñge. Mañğıstau oblısındağı ortaşa jalaqı - 297,3 mıñ teñge bolsa, Almatı qalası men Batıs Qazaqstandağı ortaşa aylıq jalaqı 222 mıñ jäne 191,3 mıñ teñgeni qwraytın körinedi.

Al, Qazaqstannıñ qalğan 12 aymağında aylıq jalaqı ortaşa respublikalıq deñgeyge jetpeydi.

Ärine, bwl resmi statistika elimizdegi şınayı äleuemettik jağdaymen säykes kelmeui mümkin. Sebebi, QR Eñbek jäne halıqtı äleumettik qorğau ministrligi bıltırdıñ özinde 500 mıñğa juıq adam 42 mıñ 500 teñgeden tömen jalaqı alatının aytqan bolatın.

Al, mwnday jağdayğa qoğam ökilderi de qarsılıq tanıtıp, öz oyların  äleumettik jelide jazıp jatır.

Jänibek Köpjasar, jurnalist: Narazılıq tanıtpaq tügili, jaybaraqat jürmiz.

-Wnnıñ bağası eki ese östi! Bıltır osı uaqıtta 4000 tg bolğan bir möşek wn qazir 8000 tg. üstinde! Al biz narazılıq tanıtpaq tügili, "oybay, tağı qımbattaydı dep jatır, 12000 teñge boladı eken, eki-üş möşek alıp alayıq" dep jaybaraqaaaaat jürmiz. Jalaqımızdıñ bir tiınğa da öspegeninde şaruamız joq!

Örkenietti, azamattıq qoğamı damığan elderdi aytpay-aq qoyayın, bıltır Iranda jwmırtqanıñ bağası 10000 twmannan 18000 twmanğa öskende ne bolğanı esteriñizde şığar. Ötkende Çili halqı metro biletiniñ bağası 800 pesodan 830 pesoğa öskende ne istegenin estigen bolarsızdar?

Al bizde halıq jii twtınatın wn, nan, et 30-100% aralığında qımbattadı soñğı bir jılda, qıñq etken joqpız. Twrmısqa äser etpedi deyin deseñ, aş jürgen halıq (keşe ğana Tarazda aştıqtan qaltırağan eki bala auruhanağa tüsti), aşuın bir-birinen alıp, meyirimsiz bolıp bara jatqan qazaq. Äser etti deyin deseñ, bir-eki qazaqtan basqası ünsiz...
Bwğa berseñ, swğa bermey me!? Kim kinäli? Feodal bilik pe, joq qwl halıq pa?

Bella Orınbetova, jurnalist: Zañ ayasında qızmet etetin bilik kerek

-Sizder nannıñ bağasın bilesizder me? Bälkim on-jiırma teñgege qımbattauı bireuler üşin bilinbes. Biraq nan ketse, oğan qosılıp basqa da azıq-tülik bağası şarıqtaydı.

Qazan ayınıñ basında bir qap wnnıñ köterme saudadağı bağası 6500 teñge bolğan. Bügin - 8700 teñge. Mına türimen jeltoqsanğa qaray 11-12 mıñğa jetedi dep otır bazardağılar. Bıltır jeltoqsanda bir qap wn 3800 teñge şamasında bolğan. Ötkende ükimette janarmay bağasınıñ qımbattaytını da aytılıp qaldı ğoy. Ol köterilgende jağday ne bolmaq?

Oñtüstik audandarda egin şığımınıñ naşarlığına baylanıstı deydi bireuler. Esesine biıl batıs pen soltüstikte egin bitik şıqqan. Biraq bağanıñ qımbattağanınan şarua qojalıqtarınıñ auzı aqqa kenelgeni şamalı. Ortadağı deldaldardıñ qaltası ğana qampayıp jatır.

Toqaev äleumettik nannıñ qımbattauına qatıstı ükimet pen äkimderge şaralar qabıldap, subsidiyanı qarastırudı tapsırdım depti tuitterde. Qit etse subsidiyalatu jaqsı nışan emes. Narıqtı retke keltiretin zañ, zañ ayasında qızmet etetin bilik kerek.
It itti, it qwyrığın jwmsaytın jağday bolmasa deymiz...

Tüyin. Qazir elimizdegi eñ kürdeli mäsele - äleumettik jağday. Eger qazir qımbatşılıq pen jalaqınıñ azdığı öz şeşimin tappasa, bwl jalpıhalıqtıq narazılıqqa wlasıp ketui mümkin. Sebebi, aylığı şaylığına jetpey jürgen halıqqa kündelikti twtınatın tauarlardıñ qımbattauı ülken soqqı.

Al, biliktiñ resmi esebinde aytılğan ädemi sandarğa qazirgi qoğam sene me?

Nwrbike Bekswltanqızı

Abai.kz

37 pikir