Beysenbi, 27 Aqpan 2020
Bilik 724 0 pikir 2 Jeltoqsan, 2019 sağat 10:32

Memleket basşısı Franciya biznesiniñ ökilderimen kezdesti

Qasım-Jomart Toqaev öz sözinde Franciya Qazaqstannıñ Europalıq odaq ayasındağı negizgi seriktesi ekenin jäne elimizdiñ ekijaqtı ıqpaldastıqtı damıtuğa basa män beretinin ayttı. 

– Eki memleket arasındağı özara qarım-qatınastar twraqtı äri joğarı deñgeyde. Biz Franciya Prezidenti Emmanyuel' Makronnıñ Qazaqstanğa jasaytın aldağı saparı ekijaqtı ıntımaqtastıqtı damıtuğa tıñ serpin beredi dep sanaymız, – dedi Memleket basşısı.

Qazirgi uaqıtta Qazaqstanda francuz kapitalınıñ qatısuımen Orano, Alstom, Air Liquide, Airbus siyaqtı 160-tan astam transwlttıq kompaniya jwmıs isteydi. 2018 jılı elderimiz arasındağı tauar aynalımı 32 payızğa artıp, 4,5 milliard dollarğa jetti.

– Men mwnı jaqsı körsetkiş dep esepteymin. Soğan qaramastan onı jaqsartuğa ünemi wmtıluımız kerek. Biılğı körsetkişterde de oñ qarqın bayqaladı. 9 aydıñ işinde tauar aynalımı 5,5 payızğa ösip, 3,4 milliard dollarğa jetti. Jalpı Qazaqstan ekonomikasına salınğan francuz investiciyasınıñ kölemi 16 milliard dollarğa juıq, – dedi Prezident.

Qasım-Jomart Toqaev Qazaqstanda tabıstı biznes jürgizu üşin jağday jasalğanın atap ötip, biznes-ahualdı jaqsartuğa, kedergilerdi azaytuğa jäne  elimizdiñ investiciyalıq tartımdılığın jaqsartuğa bağıttalğan jüyeli reformalar jüzege asırılıp jatqanın ayttı.

Prezident francuz biznesmenderiniñ nazarın eki el arasındağı ıntımaqtastıqtı nığaytuğa negizdelgen köptegen bağıttarğa audarıp, olardı agroönerkäsiptik keşen jäne ekonomikanıñ basqa da sektorlarındağı birlesken jobalardı jüzege asıru üşin seriktes boluğa şaqırdı.

– Qazaqstannıñ bäsekege qabiletti auıl şaruaşılığı önimderin öndirude mümkindigi zor. Elimizde 25 million gektar egistik pen 186 million gektardan astam  jayılımdıq jer bar. Bwl orasan zor resurs jäne rezerv. Geografiyalıq twrğıdan biz ülken äri joğarı tölemqabilettiligi bar Qıtay, Europa, Tayau Şığıs jäne Indiya narıqtarına jaqınbız, – dedi Memleket basşısı.

Qazaqstan Prezidenti öz sözinde innovaciya, cifrlıq ekonomika salalarındağı ıntımaqtastıqtıñ mañızı zor ekenin atap ötti. Qasım-Jomart Toqaev qarjı sektorındağı is-qimıldardı keñeytuge jäne «Astana» halıqaralıq qarjı ortalığınıñ jwmısına qatısuğa şaqırdı.

– Elimizde Nazarbaev Universiteti jäne Innovaciyalıq tehnologiyalar parki sekildi innovaciyalıq klasterler jwmıs isteydi. Astana Hub IT-startaptar halıqaralıq tehnoparki aşıldı. Biz Qazaqstanda francuzdıq innovaciyalar men tehnologiyalardı engizu üşin meylinşe qolaylı jağday jasauğa dayınbız, – dedi Prezident.

Kölik-tranzit infraqwrılımın damıtu mäselesine toqtalğan Memleket basşısı Qazaqstan arqılı Aziya men Europanı jalğaytın halıqaralıq kölik dälizi ötetinin, Qıtaydıñ «Bir beldeu, bir jol» jahandıq bastamasımen wştasatın «Nwrlı jol» bağdarlamasınıñ jüzege asırılıp jatqanın ayttı. Bwdan bölek köliktik jäne turistik äleuetti arttıru maqsatında elimizdiñ jetekşi äuejaylarında «aşıq aspan» jüyesi engizildi.

– Men Qazaqstannıñ aspanı aşıq boluı kerek degen şeşim qabıldadım. Osı jüye 11 äuejayğa engizilip, barlıq äue kompaniyaları arasında, onıñ işinde qazaqstandıqtar da bar, tiisti bäsekelestik wyımdastırıladı. Bwl jolauşılar tasımalı twrğısınan ğana emes, sonday-aq, Qazaqstan men Europa arasında jük tasımalın wyımdastıratın elimizdiñ aviaciyalıq mümkindikterine oñ ıqpal etedi, – dedi Qasım-Jomart Toqaev.

Prezident Franciyanıñ turizm salasındağı tabıstı täjiribesin zertteuge jäne engizuge elimizdiñ müddeliligin atap ötip, Qazaqstannıñ franciyalıq turisterdi qabıldauğa dayın ekenin mälimdedi.

Qazaqstan-Francuz iskerlik keñesiniñ teñ törağası Iv-Lui Darrikarrer investorlardıñ birlesken jobalardı damıtuğa nietti ekenin jetkizdi.

– Men francuz kompaniyalarınıñ Qazaqstannıñ käsiporındarımen wzaq merzimge negizdelgen ıntımaqtastıqtı damıtuğa nietti ekenin aytqım keledi. Olar qosımşa jobalardı damıtuğa ümitti jäne qazaqstandıq bilikpen jwmıs isteuge äzir, – dedi Iv-Lui Darrikarrer.

Kezdesu barısında Qazaqstandağı Total kompaniyasınıñ basşısı Alem Friga-Noy, Air Liquide kompaniyasınıñ vice-prezidenti Filipp Kristodolu, Alstom kompaniyasınıñ Tayau Şığıs elderi boyınşa ağa vice-prezidenti Did'e Flejer, Renault käsipornınıñ ağa vice-prezidenti Nikolya Mor, Idemia kompaniyasınıñ ağa vice-prezidenti Izabel' Lozon, Orano mining kompaniyasınıñ bas direktorı Nikolya Maes, Vicat kompaniyasınıñ aymaqtıq direktorı P'etro Kala jäne basqa da francuz biznesiniñ ökilderi söz söyledi.

Kezdesu soñında Qasım-Jomart Toqaev osı is-şaranıñ Qazaqstan men Franciya arasındağı baylanıstardı nığaytuğa septigin tigizetinine, özara tiimdi jaña jobalardıñ bastauı bolatınına senim bildirdi.

Abai.kz

0 pikir