Jwma, 28 Aqpan 2020
Bilik 3305 1 pikir 11 Jeltoqsan, 2019 sağat 10:46

Jastar jılı ayaqtalıp, Eriktiler jılı bastaldı

Memleket basşısı Jastar jılınıñ jabılu jäne Volonter jılınıñ bastalu saltanatına qatıstı. Prezident öz sözinde Täuelsizdik küni qarsañında jastarmen kezdesuiniñ mañızdı ekenin atap ötti. Bwl turalı Aqordanıñ baspasöz qızmeti jazdı.

– Biz üşin bwdan asqan qasterli äri mañızdı mereke joq. Täuelsizdigimizdi nığaytıp, elimizdi odan äri örkendetu – qazirgi wrpaqtıñ qasietti borışı. Sondıqtan biz sizderge zor ümit artamız. Memleketimizdiñ keleşegi – özderiñiz! Bügingi jastar – elimizdiñ erteñi, wltımızdıñ bolaşağı, memleketimizdiñ märtebesi. Wrpağın ayalay bilgen halıq irgeli jwrtqa aynalatını belgili. Biz halqımızdı älemge tanıtqan eñ asıl qasietterdi sizderdiñ boylarıñızdan körgimiz keledi, – dedi Qasım-Jomart Toqaev.

Prezidenttiñ aytuınşa, Elbası Nwrswltan Nazarbaevtıñ bastamasımen ötken Jastar jılında memlekettik organdar öskeleñ wrpaqtı qoldau maqsatında köptegen jwmıs atqarğan, birneşe bağıttar boyınşa jobalar iske asqan, onıñ işinde, baspanamen jäne jwmıspen qamtu, sapalı äri qoljetimdi bilim beru isi qolğa alınğan.

– Elimizdiñ iri qalalarında jwmısşı jastarğa 9 mıñ päter beru turalı şeşim qabıldandı. Onı jalğa alu qwnı ayına 15 mıñ teñge ğana boladı. Biıl 5 mıñ azamat memleketten grant alıp, jas käsipker atandı. Aldağı üş jıl işinde olardıñ sanı 30 mıñğa deyin köbeyedi. Bwdan bölek 10 mıñ jas biznesmen şağın nesieniñ arqasında öz öndirisin keñeytti. Sonıñ basım köpşiligi audan jäne auıl twrğındarına arnaldı, – dedi Memleket basşısı.

Qasım-Jomart Toqaev jastardıñ nazarın olar üşin aşılıp jatqan jaña perspektivalarğa, jas buınnıñ älemdegi aldıñğı qatarlı universitetterde bilim alu mümkindikterine audardı. Sonday-aq jastardı jetekşi tehnologiyalıq kompaniyalarda jwmıs isteuge, öz jobaların ozıq ğılımi ortalıqtarda jüzege asıruğa şaqırdı.

– Kez kelgen eldiñ tabısı öz azamattarınıñ jekelegen jetistikterinen qwraladı. Eger ärqaysısıñız aldarıñızğa qoyğan maqsatqa qol jetkizip, öz qabiletteriñizdi arttırsañızdar, memleket te tabıstı boladı. Bügingidey joğarı bäsekege qabiletti älemde eşkim tuğannan tabıstı bola almaydı jäne oğan kepildik te berilmeydi. Ol üşin ünemi eñbektenu kerek, eñ aldımen, öz-öziñdi damıtuıñ qajet, – dedi Memleket basşısı.

Prezident jastardı qoldau jöninde birıñğay keşendi bağdarlama jasau qajettigin ayttı.

– Birıñğay bağdarlama öskeleñ wrpaqtıñ özekti problemaların şeşuge bağıttaladı. Eñ bastısı, onıñ mehanizmi jastarımız üşin qarapayım äri tüsinikti boluı tiis. Jeke jäne käsibi twrğıdan ösu, jwmısqa ornalasu nemese twrğın üy alu üşin Qazaqstannıñ qay jerinde, qanday mümkindikter bar ekenin ärkim biluge tiis, – dedi Qasım-Jomart Toqaev.

Qazaqstan Prezidenti bilim beru sapası men qol jetimdiligin arttıru isin negizgi mindetterdiñ biri retinde körsetti. Memleket basşısı diplom basıp şığaratın jäne taratatın mekemege aynalğan joğarı oqu orındarına qatıstı şara qabıldau qajettigin talap etti. Sonımen qatar Prezident Ükimetke joğarı oqu orındarı men kolledj studentteriniñ stipendiyasın köterudi tapsırdı.

– Joğarı oqu orındarı studentteriniñ stipendiyasın arttıru özekti mäselelerdiñ biri ekenin bilemin. Bwl mäselege köñil bölinbey qaldı. 2016 jıldan beri stipendiya köbeygen joq. Sondıqtan studentterdi qoldau üşin 2020 jıldıñ 1 qañtarınan bastap bakalavriat, magistratura men doktoranturada oqitın studentterdiñ stipendiyasın 25 payızğa ösiru jöninde şeşim qabıldadım. Bwl jalpı 130 mıñğa juıq adamdı qamtidı. Mwnday qoldau kolledj studentterine de körsetiletin boladı, – dedi Memleket basşısı.

Qasım-Jomart Toqaev aldağı Volonter jılınıñ mindetteri turalı ayta kelip,  birneşe negizgi bağıttarğa nazar audarudı wsındı.

«Sabaqtastıq» jobası ayasında eriktiler balalar üyiniñ tärbielenuşilerin öz qamqorlıqtarına ala aladı. «Saulıq» bağıtı boyınşa medicinalıq volonterlik damidı, olar auırğan adamdarğa järdem körsetedi. «Taza älem» jobası qorşağan ortanı qorğauğa bağıttalğan. «Asıl Mwra» bağıtı eriktilerdi materialdıq jäne ruhani, mädeni-tarihi mwralardı saqtau jwmıstarına tartadı. «Qamqor» bastaması qarttar üyindegi eriktiler jwmısın qamtamasız etedi. «Bilim» jobası auıl mektepterindegi joğarı sınıp oquşıların WBT-ğa dayındau jwmıstarına, ağılşın tilin üyretip, komp'yuterlik sauattılıqtı jetildiruge kömektesedi. «Ümit» jobası boyınşa eriktiler Ekinşi düniejüzilik soğıstağı Jeñistiñ 75 jıldığı ayasında otandastarımızdıñ erligin bayandaytın qwjattardı izdestirumen aynalısadı.

Prezident volonterlikti wlttıq masştabta ğana emes, ärbir qala men auılda damıtu kerek dep sanaydı. Sonımen qatar wjımdıq volonterlikti örkendetuge memlekettik apparattı da, wlttıq jäne iri kompaniyalardı da atsalısuğa şaqırdı.

– Dana halqımız «Jwmıla kötergen jük jeñil» degen. Qayırımdılıq pen meyirimdilik – qanımızğa siñgen qasiet. Qazaqta asar jasap, bir-birine kömektesip, qoldau körsetu dästüri bar. Onıñ volonterlikpen ündesetini sözsiz. Sondıqtan aldağı jılı sol dästürdi zamanğa say qayta jañğırtuımız qajet, – dedi Memleket basşısı.

Şara soñında Qasım-Jomart Toqaev jastardıñ belsendi ökilderin memlekettik nagradalarmen jäne alğıs hattarımen marapattadı. Sonday-aq EKSPO aumağında aşılğan «ArtHUB» şığarmaşılıq bastamalar ortalığınıñ jobalarımen tanıstı.

Memleket basşısınıñ söylegen söziniñ tolıq mätinimen mına jerden tanısuğa boladı.

Abai.kz

1 pikir