Senbi, 30 Mamır 2020
COVID-19 QAZAQSTANDA. Jwqtırğandar — 10382. Jazılğandar — 5057. Qaytıs bolğandar — 37
Aymaq 2713 3 pikir 13 Aqpan, 2020 sağat 14:51

«Ekibastwz qalalıq bilim bölimi mwğalimderge 120 mln teñge qarız»

Ekibastwzdıq pedagogtarğa, sonıñ işinde äsirese qazaq mektepteriniñ mwğalimderine tamız, qırküyek aylarınan beri zeynetaqı tölemderi dwrıs jürgizilmey keledi. Qwzırlı organdar esebinşe, Ekibastwz qalalıq bilim böliminiñ öz qaramağındağı mwğalimder aldındağı türli qarızı (jalaqı, issapar şığındarı, tağı basqa) oqu jılınıñ basınan sanağanda 120 million teñgege jetip jığılıptı. 

Mwğalimder qauımı jalaqınıñ bir ayda ekige, üşke bölinip jäne är türli kölemde berilip jürgenine tañğala qarağanımen, zeynetaqı audarımdarınıñ müldem tölenbey jürgeninen habarsız bolıp kelgen. Tek bankke nesie aluğa barğandarında zeynetaqı şottarınıñ soñğı aylarda qañırap twrğanı äşkere bolıptı. Mwnday jayttı №18 jalpı orta bilim beretin mektep mwğalimderi de bastan keşken. Olar bwl zañsızdıqqa şıdamay, toptasıp qalalıq prokuraturağa jäne bilim böliminiñ käsipodaq komitetine şağımdanıptı. «Jılamağan balağa emşek bermeydi» degen qazaq maqalınıñ bilim salasında asa özektiligin kim bilgen! Qazirgi uaqıtta şu şığarğan mwğalimderdiñ tölemderi biraz tügendelip qalğanğa wqsaydı. 

«Basşımızdı prokuratura şaqırdı, barğanımızda «mektep buhgalteri de, bilim bölimi de bwl mäselege kinäli emes, ayıptı jergilikti äkimdik eken», - degen uäj aytıldı. Bilim böliminiñ mamandarı şağımdı äleumettik jelige şığarmauımızdı, şulatpauımızdı ötindi», - deydi wstazdar. 

Al 6 aqpan küni Ekibastwz mektepterine tügel telefonogramma taradı. Onda bılay dep jazılıptı: «Oblıs äkiminiñ Qazaqstan Respublikası Bilim jäne ğılım ministrliginiñ 2020 jılğı 31 qañtardağı №3-10-2/289 – I hatına säykes bergen tapsırmasına oray, bilim qızmetkerlerine qañtar ayı üşin 10 aqpanğa deyin 25 payızdıq kötermeaqı tölensin. Jalaqınıñ tölengeni turalı aqparat 8 aqpanğa deyin habarlansın. Basqarma basşısınıñ orınbasarı S.Alekparova». Osı hattağı süyinşi habar mwğalimderge zeynetaqı keleñsizdikterin biraz wmıttırıp jibergendey boldı. Biraq jaybasar bilim bölimi 10 aqpanğa deyin mwnı orındap ülgerse jaqsı ğoy...

Jalpı, Ekibastwzdıñ bilim mekemelerinde zeynetaqı audarımdarı ğana emes, issapar şığındarın töleu jayı da tüsiniksiz, jüyesiz eken. Nege olay ekenin qarapayım mwğalimder wqpay dal. 

Osınıñ bäri Ekibastwz qalası äkiminiñ äleumettik mäseleler jönindegi orınbasarı Natal'ya Nefedova men bilim bölimi käsipodaq komitetiniñ törayımı Älima Rahımjanova üşin tañsıq jayt emestigin mwğalimderden bildik. Alayda äkim orınbasarı mäseleni şeşu joldarın izdeuge asıqpay, kemşilikti jasırın wstauğa tırısıp äbiger. 

Ötken jıldıñ jeltoqsan ayında oblıstan kelgen audit bilim böliminiñ astan-kesteñin şığarıp tekserip, auqımdı qarjılıq kemşilikter tapqan bolatın. Sonıñ nätijesinde tekseruşiler qala äkimine «bilim böliminiñ basşısı J.Hamzabaevanıñ jauapkerşiligin qarastırudı» qorıtındı anıqtamağa battita jazıp ketkenimen, özgeris az. Eldiñ aytuınşa, qala äkimi Erjan Imanzaipov Hamzabaevanıñ şäkirti eken-mıs. Bolsa bolsın, biraq qarapayım mwğalim qauımnıñ öz zeynetaqısına merziminde qol jetkize almaytınday ne jazığı bar edi?! 

Aslan Şayqıwlı,

Pavlodar oblısı

Qosımşa: Abai.kz aqparattıq portalı erkin aqparat alañı. Mwnda oy jarıstırıp, pikir almastıruğa ärkim qwqılı. Joğarıdağı spikerdiñ pikiri redakciya wstanımın bildirmeydi. Aldağı uaqıtta maqalada esim-soyları atalğan jekelegen azamattar redakciyamızğa jauap beruge nietti bolsa, olardıñ da pikirin beruge äzirmiz. 

Abai.kz

3 pikir