Seysenbi, 26 Mamır 2020
COVID-19 QAZAQSTANDA. Jwqtırğandar — 8969. Jazılğandar — 4515. Qaytıs bolğandar — 35
1916 11 pikir 5 Säuir, 2020 sağat 11:32

«Änwrandı deputat ta, diaspora da bile bermeydi»

Juırda äleumettik jelide astanadağı twrğın üy keşenderiniñ birinde twrğındardıñ «balkonğa» şığıp elimizdiñ  memlekettik Änwranın orındağan beynejazbası taradı. Köpşilik bwl ärekettiñ eldegi tötenşe jağday kezinde adamdardıñ bir-birin qoldauğa, köñilderin köteruge sep bolatının aytadı.

Elordalıqtardıñ Änwran orındauı äleumettik jeli qoldanuşılarımen qatar el prezidentin de bey-jay qaldırmağan eken. Memleket basşısı Qasım-Jomart Toqaev «Twitter» jelisinde bwl turalı:

«Elorda men elimizdiñ basqa qalaları twrğındarınıñ Änwranımızdı birge orındauı - Otanğa degen süyispenşiliktiñ körinisi. Halqımızdıñ bwl äreketi zor qwrmetke layıq», - dep jazdı.

Äsili, karantin kezinde terezege şığıp än aytıp, köñil köteru deytin çellendj italiyandardan bastau alğan. Italiyadağı indet kezinde el twrğındarı osılayşa bir-birine kömektesip, aynalasındağı adamdarğa jaqsı köñil-küy sıylauğa tırısatındarın aytqan.

Sonday-aq, Reseydiñ Krasnogorsk qalasında da twrğındar «balkonda» Änwran orındadı.

Qırğızstanda da bwl ürdis jalğasın taptı. 1 säuir küni keşke Bişkek qalasındağı twrğın üylerdiñ birinde el azamattarı birigip, Qırğızstannıñ Änwranın orındadı.

Ärine, qiın kezeñde el ruhın köteretin mwnday äreketter qajet-aq. Tipti, qarapayım azamattardıñ osı bir äreketi qazaq eliniñ Änwranı tügili tilin bilmeytin häm bilgisi kelmeytin biliktegi keybir şendilerge ülgi boluı tiis.

Al jazuşı, publicist Marat Toqaşbaev äleumettik jelidegi jazbasında deputattar men elimizdegi özge diaspora ökilderiniñ memlekettik Änwrandı bilmeytinin alğa tartadı. Onıñ aytuınşa, Prezident koronavirus keziniñ özinde türli diaspora ökilderiniñ Änwranğa közqarasın özgertuge baylanıstı ideologiyalıq şaralar qabıldauı tiis.

- «Qasım-Jomart Toqaev öziniñ «Twitter» paraqşasında balkonnan Änwran şırqağandarğa bağa beripti. Memleket basşısınıñ Änwran turalı aytqanı öte quanttı. Bwl kezinde «Gimn» sözine qazaqşa «Änwran» sözin balamağa wsınğan avtor retinde mağan da qımbat. Memlekettik rämizge baylanıstı özekti taqırıp bolğandıqtan köp jwrttı bey-jay qaldırması tağı anıq.

Erterekte, jiırma jılday bwrın «Ministrler Änwrandı bile me?» degen maqala jazğanım esimde. Ökinişke qaray bügingi ministrlerdiñ bäri Änwrandı jatqa biletindigine qazir de kümänim bar. Parlament deputattarı da sonday.

Anau Kosarev, qazaqşa eki sözdiñ basın qosa almaytın Qarağwsova, «ğaşıqtıq oqıtudı» nasihattaytın partiya qalaulıları Änwrandı jatqa aytadı degenge kim senedi?! Memlekettik til – Qazaq tiline şekeden qarau Änwranımızğa da salqının tigizip keledi. Äsirese biliktiñ «qazaqstandıq wlt» jasau ideyası köp närseni büldirdi. Bizde sanı 100 mıñnan asatın toğız diaspora twradı. Qazağıñdı da, Qazaqstannıñ Änwranın da kerek qılatındarı şamalı.

Aqtauda äskerdegi eki sarbazdıñ Änwran aytudan bas tartqanı üşin tayaq jegeni internette jür. Qazaqstanda Änwrandı qazaqtan basqa wlt ökilderiniñ jatqa aytatındarı neken-sayaq. Orıs tügili orıstildi qazaqtardıñ özi Änwranğa kelgende sipaqtap qaladı. Sondaylardıñ biri Qazaq Eliniñ Änwranın orısşa aytuğa wsınıs jasap halıqtıñ aşu-ızasın tuğızğanı este.

İs jüzinde Änwran - är adamnıñ Otanına degen közqarasınıñ lakmus qağazı. Mısalı, Almatıda jañadan salınğan ıqşamaudandarda balkonğa şığıp Änwran aytuşılar köp. Öytkeni olarda köbine jas qazaq otbasıları twradı. Al ortalıqtağı köne bes, toğız qabattı üylerde twratındardıñ işinde Änwranğa pısqırmaytındar jetip jatır. 

Sondıqtan Prezident koronavirus keziniñ özinde türli diaspora ökilderiniñ Änwranğa közqarasın özgertuge baylanıstı ideologiyalıq şaralardı dereu qolğa alğanı jön»,- dep jazdı.

Tüyin. Qazir Italiyadan bastalıp, körşi-qolañ elderi aynala jetken Änwran aytu çellendjine prezident Toqaevtıñ özi oñ bağa bergenin kördik. Al jurnalist, jazuşı Marat Baydildäwlı keybir deputattardıñ memlekettik Änwrandı jatqa biletinine kümänmen qaraytının jazdı.

Sonımen, bizdegi Senat pen Mäjiliste otırğan deputattar, är salanıñ tizginin wstağan ministrler elimizdiñ tölqwjatı - Änwranımızdı bile me?

Abai.kz

11 pikir