Düysenbi, 1 Mausım 2020
COVID-19 QAZAQSTANDA. Jwqtırğandar — 11308. Jazılğandar — 5404. Qaytıs bolğandar — 41
Twlğa 8901 59 pikir 6 Mamır, 2020 sağat 11:28

B.Momışwlına «Halıq qaharmanın» beruge bolmaydı! Nege?

Men Baukeñdi bwl ataqqa layıq emes dep otırğan joqpın. Kerisinşe, ol ataq Bauırjan Momışwlınıñ atına layıq emes. Baukeñe

«QAZAQTIÑ WLTTIQ BATIRI»

degen arnayı, erekşe ataq berilui kerek! Jäne onı keyinge qaldırmay, biılğı Jeñistiñ 75-jıldığında bersek tipti dwrıs bolar edi. Francuzdar Janna d Arkten keyin Şarl' de Golldi «Francuzdıñ Wlttıq Batırı» dep resmi tanıdı. Däl sol sekildi Bauırjan Momışwlı – Wlttıñ simvolı! Ar-namısı! Wlttıñ wyatı! Orısşa aytsaq – «Sovest' nacii!». Osı ataudıñ bärine bir özi layıq. («Wlttıñ wyatı» dep ol kisiden basqa tek Gerol'd Bel'gerdi atauğa bolatın şığar...)

Negizdeme kerek deseñizder:

1. Jürektiñ ğana emes, aqıl men bilimniñ de teñdessiz batırı – soğıs kezinde 5 ret qorşaudan batal'onın aman alıp şığıp qana qoymay, onıñ qwramın köbeytip alıp şığıp otırğan jalğız komandir.

2. Wlttıq müddeni ärqaşan tu etip biik wstağan, öz müddesinen joğarı qoyıp otırğan. Tım wltşıl bolmasa tez-aq köterilip ketetinin körip otırsa da, odan taymağan.

3. Wlttıq mäselede eşqaşan pendeşilik deñgeyge tüspegen. Tüskenderdi kim bolsa da keşirmegen. 1970 jılı, 9-mamırda, Jeñistiñ 25-jıldığınıñ qwrmetine ötip jatqan Äskeri paradqa şaqırılmağan soñ özi barıp, D.Qonaev pen B.Äşimovtıñ arasına tayağın tığıp, ekeuin eki jaqqa qaray iterip-iterip jiberip, ortasına twrıp alıp, Paradtı özi qabıldağan.

4. Adamgerşilik twrğıdan ärqaşan biikten köringen. Ağa swltan Eseney sekildi «Qwdaydıñ meniñ aldımda bolmasa, meniñ Qwday aldında künäm joq» dep ayta alatınday haqısı bolğan adam.

5. Jazuşılığı jağınan da teñdessiz «Wşqan wyanı» qaldırsa, «Añız ben aqiqattıñ» da beyresmi soavtorı bolğan.

Endi özderiñiz oylañızdarşı, «Halıq Qaharmanı» atağın alğan azamattarmen – bwrın Keñes Odağınıñ Batırı atağın ielengen Sağadat Nwrmağanbetovtey batır bolsın, Roza Bağlanovaday änşi bolsın, sovhoz direktorı bolsın, bäri de layıq jandar – qalay Baukeñdi bir deñgeyge qoyuğa boladı, obal emes pe?! Qazaqtı älemge däl Baukeñdey tanıtqan, tanığan jwrttıñ bärin tañğaldırğan, tamsandırğan, tänti etken basqa kimimiz bar? Qazaqtıñ kelbeti, tölqwjatı ğoy ol! Alla-Tağalağa Baukeñdi bergeni üşin sansız alğıs aytayıq-tağı, özimiz älemde sanaulı dara twlğanıñ qadırına jete bileyik te!

(Bauırjanı bolğanda, özbekter bwnday wsınıstı sol sätte quana-quana  iske asırar edi dep oylaymın. Sebebi, onsız da olar «Qwday darındı qazaqqa bergen, qadırın bizge bergen...» dep, äskiya aytadı bizge).

Ömirzaq Aqjigit

P.S. Bolaşaqta wrpağımız «Wlttıq Batır» degen ataqqa kimdi bolsın wsınğısı kelse, aldımen mıñ oylanıp, san tolğanıp barıp qimıldar. Baukeñniñ aruağı oylandırmay qoymas...

Abai.kz

59 pikir