Beysenbi, 20 Mausım 2019
Jañalıqtar 2011 0 pikir 30 Mausım, 2009 sağat 21:48

Aşıq aspan astındağı ayqas

 

 

«ZHERSU», «Sät&Ko» korporaciyaları jäne Marat Mäzimbaevtıñ promouterlik kompaniyasınıñ wyımdastırumen Almatıda käsipqoy boksşılardıñ matçtıq kezdesui ötti. Bwl jolı Qazaqstan men Qırğızstannıñ bılğarı qolğap şeberleri ädettegidey Almatıdağı memlekettik cirkte emes, «Abılay han» sport keşeninde küş sınastı.
Ayqastar aşıq aspan astında ötti. Jäne de bwl jolı şarşı alañğa şıqqandardıñ deni jastar bolğanına qaramastan kezdesudi tamaşalau üşin kelgender az bolğan joq. Türli twjırımdardıñ täji üşin ayqas nege ötpegeni jayında belgili promouter Marat Mäzimbaevtan swrağanımızda, ol: «Jaz uaqıtında beldi boksşılarğa biraz demalıs berudi jön sanadıq. Bälkim, bäzbireuler qatarda mıqtılar bolmasa, jarıstıñ säni ketedi dep oylauı mümkin. Biraq sol pikirdiñ janasaq ekenine bügin közimiz jetti. Al bile bilgiñiz kelse, biz tek ataqtılardı ayqastırıp qoyumen şekteludi qwp körmeymiz. Jas buın ökilderi arasınan darındılardı iriktep alu, olardı qatarğa qosu, ülken sportqa joldama beru bwl – «ZHERSU korporaciyası men Marat Mäzimbaevtıñ promouterlik kompaniyasınıñ wstanıp otırğan basım bağıtı», – dep öziniñ köregendigin bayqattı. Rasında da sol keşte «Abılay handı» betke alğan janküyerler jarıstıñ säni de, mäni de ketpegenine kuä boldı.
69, 9 keli salmaqta sınğa tüsken almatılıq Ğalımjan Mırzabaevtıñ jankeştiligi körermenderdi süysindirdi. Qarsılası qırğızstandıq Aleksandr Bahov ta osaldar sanatınan emes eken. Eki raund boyı ol jerlesimizdi äbden sastırdı. Key sätterde törtpaq jigit ayqın basımdılıq tanıtatınday bolıp körindi bizge. Ğalımjan birazğa deyin Bahovtıñ osal twsın taba almadı. Üşinşi kezeñde şabuılın üdetken qandasımız tizgindi berik qolğa alsa, törtinşi raun Mırzabaevtıñ ekpindi şabuılımen ötti. Qarsılası, tipten, ringtiñ besinşi bwrışın izdep kete jazdadı. Nätijesinde qaptaldağı üş töreşiniñ üşeui de jeñisti Ğalımjan Mırzabaevtqa berdi.
59 keli salmaqta küş sınasqan pavlodarlıq Farhad Ospanov pen şımkenttik Arman Uıtjanov arasındağı bäseke öte şielenisti ötti. Alğaşqı eki raundta kerekulik boksşı alımdı körindi. Oñtüstik Qazaqstan oblısınıñ ökili säl seskeniñkirep jürgendey äser qaldırdı. Alayda bwl onıñ taktikalıq qulığı eken. Arman «bir barmağın işine bügip» jüripti. Aqırında Uıtjanov Ospanovtı sabap tastadı. Törtinşi raundta birneşe auır soqqıların darıtıp, qan josa etti. Biraq töreşiler jeñisti Ospanovqa berdi. Onıñ sebebin bilsek, töreşiler: «Farhadtıñ alğaşqı kezeñderde jiğan wpay qorı onıñ jeñiske jetui üşin jetkilikti boldı», – dep til qattı.
63 keli salmaqtağı kökşetaulıq Änuar Mwsağwlov pen taldıqorğandıq Eljan Boqanovtıñ arasındağı tartıs asa äserli bolmadı. Tört raund boyı jigitter bir-biriniñ osal twsın taba alğan joq. Aqırı töreşiler säl ğana basımdılıqpen Kökşe öñiriniñ tülegi jeñiske jetkenin jariya etti.
79 keli salmaqta şeberlik bayqasqan Mihail Krinicindı janküyer qauım jaqsı biledi. Osıdan biraz uaqıt bwrın Islam dinin qabıldap, esimin «Äl-Hattab» dep özgertkennen keyin onıñ jolı oñğarıla bastadı. Qarağandı qalasınıñ tülegi sol küni qırğızstandıq Ömirbek Rıskeldievten basım tüsti. İle-şala pavlodarlıq Aleksandr Juravskiy tağı bir «ayır qalpaqtı ağayınımızdı» tezge saldı.
Käsipqoy bokstıñ qamıtın kigenine asa köp uaqıt bolmasa da, Mirjan Jaqsılıqovtıñ (57 keli) öneri jwrtqa wnadı. Ayaköz qalasınıñ tuması qay jağınan alsañız da, maqtauğa twrarlıq jigit. Onıñ boyında bolaşaq çempionğa qajet barlıq qasiet bar deydi mamandar. Rasın da solay eken. Bwğan deyingi jekpe-jekteriniñ denin ayqın jeñispen ayaqtağan Jaqsılıqov bwl jolı da özin jaqsı qırınan körsetti. Qarsılası almatılıq Erbol Nwrışevqa qarağanda äldeqayda jıldam, äldeqayda şiraq qimıldağan Mirjannıñ üstemdigi eş kümän tuğızğan joq.
Eñ soñğı jekpe-jek 53,3 keli salmaqtılar arasında ötti. Ringke Mirat Särsembaev köterilgende janküyerler du ete qaldı. Olardıñ Miratqa osınday qoşemet köretetindey jöni bar. Jetisudiñ öreni äuesqoy ringte talay belesti bağındırğan tarlanboz. Alıp Aziyanı moyındatıp, älemdik deñgeydegi boksşılar sanatına erkin engen. Al elişilik jarıstarda küni büginge deyin Särsembaevtıñ aldın orağan boksşı joq. Soğan qaramastan ol käsipqoy ringti tañdadı. Bwl rettegi alğaşqı qadamı jaman emes. Osıdan bir ay bwrın öziniñ alğaşqı bäsekesin jeñispen ayaqtağan taldıqorğandıq ören «Abılay handa» ötken turnirde de şabısınan jañılğan joq. Bişkekten kelgen Äzizbek Qalmamatov qanşa tırısqanımen, qandasımızğa eş qayrat körsete almadı. Tört raund boyı Mirat onı tömpeştep, wpay sanımen wttı.
– Men Qalmamatovtı wrıp qwlatudı maqsat twtqan joqpın. Öytkeni, qazir men üşin ayqın jeñisten göri funkcionaldıq dayarlığımdı bayqap köru mañızdı. Qanşa degenmen äuesqoy jäne käsipqoy bokstıñ arasında alşaqtıq köp. Sondıqtan da bastapqı bäsekeler arqılı barınşa mol täjiribe jiyu qajet. Al ayqın jeñis pen ataq-dañq öz uaqıtında keledi, – dep jekpe-jekten soñ Mirat ağınan jarıldı.
Sonımen, «Abılay han» sport keşeninde ötken jekpe-jekter janküyer köñilinen şıqtı. Endi «ZHERSU korporaciyası men Marat Mäzimbaevtıñ promouterlik kompaniyası öziniñ kelesi turnirin şilde ayınıñ soñında Istıq köldiñ jağalauında wyımdastırudı közdep otır.

 

 

«Ayqın» gazeti 30 mausım 2009 jıl

0 pikir