Düysenbi, 23 Qırküyek 2019
Bizdiñ şeneunik 4199 0 pikir 17 Mamır, 2016 sağat 11:53

MINISTR ABAEV "EURAZIYA" ARNASINIÑ AYNALASINDA QALIPTASQAN AHUALĞA ALAÑDAULI

 

Aqparat jäne kommunikaciyalar ministri Däuren Abaev «Euraziya» arnasınıñ  aynalasında qalıptasqan ahualğa alañdaytındığın bildirdi,-dep habarlaydı «Exclusive.kz» portalı.

Qazaqstan Ükimetiniñ qazaq jerin satu jäne onı jalğa beru turalı bastamasına narazılıq bildirip,  beybit şeruge şıqqan ärbir azamatqa AQŞ pen Batıs elderi, sosın äldebir «besinşi kolonna» basşıları 50 dollardan 150 dollarğa deyin aqşa ülestirip beripti dep jalğan aqparat taratqan «Euraziya» arnasınıñ mäselesin endi ministr Däuren Abaev qaraytın boladı.

Esteriñizge sala keteyik, osınıñ aldında «Abai.kz» portalı «Elimizdegi telearnalar kimniñ sayasatın wstanadı: Nazarbaevtıñ ba, älde Putinniñ be?» attı maqala jariyalağan bolatın. Onda  atalğan arnanıñ (birinşi basşısı Konstantin ErnstRF azamatı)  QR Jer kodeksi boyınşa, jerdiñ menşikke satıluı men şeteldikterge jalğa beriluin qamtamasız etetin baptarına qarsı narazılıq bildirip, şeruge şıqqandarğa  köpe körneu jala jauıp, jalğan aqparat arqılı  halıqtı arandatıp otırğanı (tipti, alañğa şıqsañ 150 dollar beredi eken degendey halıqqa astırtın ündeu jasap) aytılıp, QR Bas prokuraturası men WQK nazarına wsınılğan edi .

Qazaqstannıñ aqparat keñistigindegi dezinformaciyalıq «köpirmelerdiñ» köbisi reseylik poziciyanı wstanatın BAQ ökilderi tarapınan jasalatını aytpasa da tüsinikti. Osılayşa aşıq  provokaciya jasap otırğan arna jäne onıñ tilşileri (A. Şaukentaev men R.Smıkov) kögildir ekran aldında  kösip söyleymiz dep köpke topıraq şaşqandarın özderi de añğarmay qalsa kerek. «Keldi. Ukraina jäne basqa da elderde halıqtı alañğa şığaru üşin aqşa berip, süyrep şığarğandar endi bizge de jetti. Bwl kim, däl sol besinşi kolonna. Bizge jetken mälimetter boyınşa, ärbir adamğa älgi besinşi kolonna 50 dollardan 150 dollarğa deyin ülestirip jatır eken» dep aydı aspannan bir-aq, şığarıp edi älgi eki äriptesimiz. Besinşi kolonnanıñ kim ekenin biletin arnanıñ tilşileriniñ bwl sözderi qoğamdıq orta men BAQ işinde qızu talqığa tüsti.

Artınan aqtalğanday bolıp, qoldan wyımdastırılğan äm tüsiniksiz jağdayda tüsirilgen beyne jazbanı körsetti. Bwl Şaukentaeva men Smıkovtıñ sözderiniñ «jalğan» emes ekendiginiñ däleli-mıs.

Osıdan keyin qazaqstandıq zañger Nwrhan Jwmabekov «Euraziya» arnasınıñ üstinen Sotqa şağım tüsirip, halıqtıñ demokratiyalıq tañdauın qorlap, jala japqan arnanıñ Zañ aldında jazalanuın talap etti.

Endi belgili bolğanday, jañadan qwrılğan ministrliktiñ tizginin wstağan Aqparat jäne kommunikaciyalar ministri Däuren Abaev mırza «mäskeulik» arnanıñ  aynalasında qalıptasqan ahualğa alañdaytının bildirude. Ärine, ministr «Euraziya» arnasınıñ jalğan aqparın rastap, janı auırmaytın şığar. Sirä, Abaevtı alañdatıp otırğan mäsele atalğan arnağa degen halıqtıñ narazılığınan tuındasa kerek.

Nwrgeldi Äbdiğaniwlı

Abai.kz

 

 

 

0 pikir