سەنبى, 29 اقپان 2020
ءبىزدىڭ شەنەۋنىك 4478 0 پىكىر 17 مامىر, 2016 ساعات 11:53

مينيستر اباەۆ "ەۋرازيا" ارناسىنىڭ اينالاسىندا قالىپتاسقان احۋالعا الاڭداۋلى

 

اقپارات جانە كوممۋنيكاتسيالار ءمينيسترى داۋرەن اباەۆ «ەۋرازيا» ارناسىنىڭ  اينالاسىندا قالىپتاسقان احۋالعا الاڭدايتىندىعىن ءبىلدىردى,-دەپ حابارلايدى «Exclusive.kz» پورتالى.

قازاقستان ۇكىمەتىنىڭ قازاق جەرىن ساتۋ جانە ونى جالعا بەرۋ تۋرالى باستاماسىنا نارازىلىق ءبىلدىرىپ،  بەيبىت شەرۋگە شىققان ءاربىر ازاماتقا اقش پەن باتىس ەلدەرى، سوسىن الدەبىر «بەسىنشى كولوننا» باسشىلارى 50 دوللاردان 150 دوللارعا دەيىن اقشا ۇلەستىرىپ بەرىپتى دەپ جالعان اقپارات تاراتقان «ەۋرازيا» ارناسىنىڭ ماسەلەسىن ەندى مينيستر داۋرەن اباەۆ قارايتىن بولادى.

ەستەرىڭىزگە سالا كەتەيىك، وسىنىڭ الدىندا «Abai.kz» پورتالى «ەلىمىزدەگى تەلەارنالار كىمنىڭ ساياساتىن ۇستانادى: نازارباەۆتىڭ با، الدە ءپۋتيننىڭ بە؟» اتتى ماقالا جاريالاعان بولاتىن. وندا  اتالعان ارنانىڭ (ءبىرىنشى باسشىسى كونستانتين ەرنسترف ازاماتى)  قر جەر كودەكسى بويىنشا، جەردىڭ مەنشىككە ساتىلۋى مەن شەتەلدىكتەرگە جالعا بەرىلۋىن قامتاماسىز ەتەتىن باپتارىنا قارسى نارازىلىق ءبىلدىرىپ، شەرۋگە شىققاندارعا  كوپە كورنەۋ جالا جاۋىپ، جالعان اقپارات ارقىلى  حالىقتى ارانداتىپ وتىرعانى (ءتىپتى, الاڭعا شىقساڭ 150 دوللار بەرەدى ەكەن دەگەندەي حالىققا استىرتىن ۇندەۋ جاساپ) ايتىلىپ، قر باس پروكۋراتۋراسى مەن ۇقك نازارىنا ۇسىنىلعان ەدى .

قازاقستاننىڭ اقپارات كەڭىستىگىندەگى دەزينفورماتسيالىق «كوپىرمەلەردىڭ» كوبىسى رەسەيلىك پوزيتسيانى ۇستاناتىن باق وكىلدەرى تاراپىنان جاسالاتىنى ايتپاسا دا تۇسىنىكتى. وسىلايشا اشىق  پروۆوكاتسيا جاساپ وتىرعان ارنا جانە ونىڭ تىلشىلەرى (ا. شاۋكەنتاەۆ مەن ر.سمىكوۆ) كوگىلدىر ەكران الدىندا  كوسىپ سويلەيمىز دەپ كوپكە توپىراق شاشقاندارىن وزدەرى دە اڭعارماي قالسا كەرەك. «كەلدى. ۋكراينا جانە باسقا دا ەلدەردە حالىقتى الاڭعا شىعارۋ ءۇشىن اقشا بەرىپ، سۇيرەپ شىعارعاندار ەندى بىزگە دە جەتتى. بۇل كىم، ءدال سول بەسىنشى كولوننا. بىزگە جەتكەن مالىمەتتەر بويىنشا، ءاربىر ادامعا الگى بەسىنشى كولوننا 50 دوللاردان 150 دوللارعا دەيىن ۇلەستىرىپ جاتىر ەكەن» دەپ ايدى اسپاننان ءبىر-اق، شىعارىپ ەدى الگى ەكى ارىپتەسىمىز. بەسىنشى كولوننانىڭ كىم ەكەنىن بىلەتىن ارنانىڭ تىلشىلەرىنىڭ بۇل سوزدەرى قوعامدىق ورتا مەن باق ىشىندە قىزۋ تالقىعا ءتۇستى.

ارتىنان اقتالعانداي بولىپ، قولدان ۇيىمداستىرىلعان ءام تۇسىنىكسىز جاعدايدا تۇسىرىلگەن بەينە جازبانى كورسەتتى. بۇل شاۋكەنتاەۆا مەن سمىكوۆتىڭ سوزدەرىنىڭ «جالعان» ەمەس ەكەندىگىنىڭ دالەلى-مىس.

وسىدان كەيىن قازاقستاندىق زاڭگەر نۇرحان جۇمابەكوۆ «ەۋرازيا» ارناسىنىڭ ۇستىنەن سوتقا شاعىم ءتۇسىرىپ، حالىقتىڭ دەموكراتيالىق تاڭداۋىن قورلاپ، جالا جاپقان ارنانىڭ زاڭ الدىندا جازالانۋىن تالاپ ەتتى.

ەندى بەلگىلى بولعانداي، جاڭادان قۇرىلعان مينيسترلىكتىڭ تىزگىنىن ۇستاعان اقپارات جانە كوممۋنيكاتسيالار ءمينيسترى داۋرەن اباەۆ مىرزا «ماسكەۋلىك» ارنانىڭ  اينالاسىندا قالىپتاسقان احۋالعا الاڭدايتىنىن بىلدىرۋدە. ارينە، مينيستر «ەۋرازيا» ارناسىنىڭ جالعان اقپارىن راستاپ، جانى اۋىرمايتىن شىعار. ءسىرا، اباەۆتى الاڭداتىپ وتىرعان ماسەلە اتالعان ارناعا دەگەن حالىقتىڭ نارازىلىعىنان تۋىنداسا كەرەك.

نۇرگەلدى ابدىعانيۇلى

Abai.kz

 

 

 

0 پىكىر