Düysenbi, 3 Tamız 2020
COVID-19 QAZAQSTANDA. Jwqtırğandar — 92662. Jazılğandar — 62511. Qaytıs bolğandar — 793
Catira 3572 0 pikir 30 Qañtar, 2017 sağat 23:40

Ospanhan ÄUBÄKİROV. JARIQTIQ

Bastığımızdıñ aldın «küzetip» otırğan Jıltıñ degen şıñıltır qız esigimnen baptap alğan basın körsetip:
– Bolğan ağay kabinetine şaqırıp jatır! – dedi de, ayağınıñ arasında tauıq qıt-qıttap jürgendey ökşesi tıq-tıq etip, «nege?» degizbey tez ketti.
– Jarıqtıq aytatın sözin tağı wmıtıp qalmasa eken, – dep oyladım da, şaşımdı jığıp, jağamdı şertip, kirpigimdi qağıp-qağıp kirip bardım. Jigitter de kündegidey tügel jinalıp Bökeñniñ auzına qarap otır eken.
Bökeñ bizge «osılardı qaydan körip edim» degendey tañırqay qaraytın sekildi.
– Bäriñ birdey topırlap, jay jürsiñder me, tüge? – dedi Bolğan wzın müştegine kigizgen wzın sigarettiñ külin tüsirip.
Biz añ-tañbız.
– Siz şaqıradı degen soñ kelip otırmız, Böke, – dedi bireu.
Bökeñniñ de esi ekeu, tüsi törteu. «Osılardı şınımen özim şaqırıp pa edim?» degendey alıstan oylanıp otır. Temekisiniñ de küli wzarıp, qisıq tütindep, birge oylanğanday.
– Men şaqırdı deysiñder me, ey? – dedi sälden soñ Bökeñ.
– Iä, siz şaqırdı degen soñ...
– Kim ayttı?
– Jıltıñ ayttı.
– Äy, osı Jıltıñ da meni äbden jındı qılatın boldı. Şaqırşı özin beri!
Jıltıñ keldi.
– Jay ma, ağay?
– Sen qız, qarağım, jındımısıñ? Kim şaqırdı mınalardı?
– Öziñiz şaqır dediñiz ğoy.
– Qaşan?
– Jaña. «Oybuy, aljığan basım, kostyumimniñ sırtınan kostyum kiip kelippin» dep bireuin şeşip bılay, ekinşisin şeşip bılay qoydıñız. Küldiñiz. Men de küldim. Sosın «jigitterdi tez şaqıra qoyşı!» dediñiz. Men, mine, jinap keldim.
Bolğan Jıltıñnıñ bet baqtırmas däleline «ket, i» dep ayta almay, eki kostyumine kezek-kezek qarap otırıp qaldı. Biz ne köñil aytarğa, ne jönin aytarğa ep tappay qañtarılıp otırmız.
– Birdeme aytayın dep wmıtıp qalğamın da, bar, şarualarıñdı isteñder! – dep taratıp jiberdi. «Adam qartayğanda bir bala» degen ğoy, jarıqtıq ne aytqısı keldi eken?» dep bärimiz şığısımen dälizde temeki tartıp, şalımızdıñ qılığına mäz bolıp, dabırlasıp twr edik, Jıltıñ izimizşe jügirip kelip: «Bökeñ şaqırıp jatır, tez jüriñder!» – dedi.
Adam jaman oyğa jüyrik qoy, «Bökeñ talıp qaldı ma, älde odan da swmdıq birdemege duşar boldı ma, jarıqtıq» dep oyladıq ta, temekimizdi tastay salıp jügirdik. Jazımnan aman eken. Bökeñ eki qolın artına wstap, bölmede arı-beri ayañdap jür. Mine, qızıq, Bökeñniñ ayağın körip külip jiberdik. Bir ayağında – qızıl bäteñke, bir ayağında – qara bäteñke.
– Böke, modañız qwttı bolsın, jaña bäteñke alğansız ba? – dedi Poşım elden bwrın däldeñdep.
Bolğan ayağına qarap añ-tañ.
– Mwnısı nesi, a? Masqara! Tünde bir üyde qonaqta bolıp edim, keterde qalıñ bäteñkeniñ işinen ilip alıp jüre bergenmin ğoy. Wyat-ay, ä! Iesi tabanın qasıp jalañ-ayaq otırğan şığar, tez Dırdannıñ üyine aparıp, özimdikin ala kel! – dep qızıl bäteñkeni bauın ağıtpay, ökşesinen basıp şeşti de, Poşımğa nwsqadı. Beyim twrğan Poşım Bökeñniñ bwtınıñ arasınan qızıl bäteñkeni ilip ala jügirdi. Ol endi, kör de twr, osı qızmetin miyat twtıp, erteñ tüske deyin jwmısqa kelmeydi.
Bökeñ bir ayağında şwlıq, bir ayağında «qwlıp», säl aqsañqırap arı-beri jür. Jarıqtıqtıñ şwlığınan tüsken dımqıl izge qarap biz otırmız.
– Bireuden jasırınıp jürgendey sender osı meniñ kabinetime kelip, tığılasıñdar da otırasıñdar, jwmıs istemeysiñder me, tüge? – degen Bökeñ oqıs toqtap, betimizge qaraydı.
Biz «aqımaq» bolıp boldırdıq.
– «Aytaqtay-aytaqtay qasqırdan da wyat boldı» degendey, öziñiz qayta şaqıradı degen soñ kelip otırmız, – dedi bireu.
Bökeñ mañdayın ezgilep biraz oylanıp qaldı. Ernin şığardı, qabağın tüydi, közin jwmdı.
– Iä, aytpaqşı, – dedi bir kezde şoşıp oyanğanday. – Men, jigitter, wmıtşaq bolıp bara jatırmın, şaması, qartaysam kerek. Sodan qabırğammen aqıldasıp, aljımay twrğanda pensiyağa şığuğa toqtam jasadım. Senderge sonı aytayın dep...
Biz «adam şarşasa küledi» degendey, külip otırmız.
– Böke-au, jılda pensiyağa şığayın dep pe ediñiz? – dedi bireu.
– Jıldası nesi, jındı ma mınau?
– Böke, siz qazir pensiyada jürsiz ğoy. Endi qaydağı pensiyanı aytıp twrsız? – dedi işimizdegi kekse kisi.
– Äy, mınalar meni jındıhanağa tüsiretin şığar, – dep Bolğan bärimizge kezek-kezek qarap, qabaq qaqpay qalşiıp twr.
– Oy, jarıqtıq-ay, siz bıltır «Çermetten» şekpen kiip, pensiyağa şıqtıñız. Sodan «äli körseteri köp» dep, sizdi bizdiñ mekemeniñ meñgeruşisi etip sayladı ğoy. YAğni, pensiyağa şıqqannan keyin tağı jwmıs istep, jalaqı tauıp jürsiz. Qayta-qayta pensiyağa şığıp, eki jegiñiz kele me? – dep älgi kekse «şalğan» boldı.
– Şaqırşı älgi Jıltıñdı! – dep bwyırdı Bolğan.
Jıltıñ keldi.
– Äy, sen qız, anığın aytşı, men pensiyağa şıqtım ba?
– Iä, bıltır şıqqasız.
– Endi mwnda ne bitirip jürmin?
– Jwmıs istep jürsiz.
– Jaraydı, bar, ket ayda!
Jıltıñ «aydap» ketti.
– Men osı wmıtşaq bolıp baramın. Aytpaqşı, bıltır «Çermetten» pensiyağa şıqqan soñ osında kelgen ekenmin ğoy. Bäse, osı pensiyağa şıqqım keledi de twradı. Järäydi. Al, jigitter, jwmıstarıñdı isteñder. Äkemniñ ölgenin estirtuge kelgendey topırlap jetip kelesiñder de twrasıñdar. Tarañdar, tüge! Iä, aytpaqşı, älgi pätiñki keldi me, biliñderşi! – dep Bolğan bärimizdi tırqıratıp quıp şıqtı.
«Oynasa balası jeñedi, şındasa äkesi jeñedi» degen osı-au. Oy, jarıqtıq-ay, aman bol, äyteuir!

Jurnalist Säken Sıbanbaydıñ facebook paraqşasınan alındı.

0 pikir