Särsenbi, 14 Qaraşa 2018
Qwyılsın köşiñ 1789 15 pikir 14 Mamır, 2018 sağat 09:47

Qıtaydağı qazaqtar mäselesi Europarlament nazarında bolmaq!

Astanağa 10-11 mamır künderi Europarlamenttiñ deputattarı keletini jaylı ötken jolı aqparlağan ek. Mine, sol deputattar keldi. Alqa-qotan jiın ötkizdi.

Europarlamenttiñ deputattarımen kezdesuge azamattıq qoğam belsendileri de barıp qaytqan edi. Olar Qazaqstannıñ işki sayasi jağdayı jaylı söz etip qana qoymay, qazirgi aktualdı mäseleniñ birine aynalıp otırğan Qıtay biliginiñ öz elindegi az wlttarğa jasap jatqan sayasi qısımı jaylı da aytqan eken.

Ötken ayda Bryussel'ge barıp, "Jaña Qazaqstan" forumına qatısıp qaytqan belgili sayasatker Ämirjan Qosanov mırza Europarlament deputattarına Qıtaydağı qazaqtardıñ qısım körip, qudalauğa tüsip, keybiri sayasi üyretu lagerlerine, keybiri türmege qamalıp ketkeni turalı tolıq bayandalğan üşbu hattı tabıstadı. Bwl turalı sayasatker öziniñ Feysbuktağı jeke paraqşasında habarladı.

"Qıtaydağı qazaq mäselesi Europarlament nazarında bola bermek. Eldiñ amanatın orındau kerek. Keşegi kezdesu aldında Qıtaydağı qazaqtardıñ qiın jağdayı turalı da Europarlament delegaciyasına ayttım. Europanıñ halıqaralıq arenadağı ornı bölek qoy. Onı da biz qazaq müddesine üşin paydalana biluimiz qajet. Ol turalı biz ötken jolı Bryussel'de de söz etken edik. "Jaña Qazaqstan" forumı atınan Bashir Canaltay öte ornıqtı äri mıqtı aytıp edi. Osı mäsele boyınşa arnayı hattı qazaq üşin asa mañızdı mäselede belsendilik tanıtıp jürgen jigitterden, sonıñ işinde Irıs Toqtasın, Jwmabek Älimhannan alıp, deputattarğa berdim", dep jazdı sayasatker.

Ayta keteyik, Qıtaydağı qazaqtardıñ jağdayı tım auırlap ketti. Qırıq jılğı körşi, geosayasi seriktesimiz dep sengen Qıtay ükimeti qazaqtı terrorist, ekstremisterdiñ sapına qostı. Qwjattarın tartıp alıp, Qazaqstanğa kelip-ketken är qazaqtı türmege japtı. Üyinde Qwran wstağan, dini oqulıqtı wstağan, eski kitaptardı saqtağandar saqşılardıñ jetegine tüsti. Jäbirin kördi. Qazaq jazuşılarınıñ kitaptarın oqığandar oqu-tärbieleu lagerlerine aydaldı. Sebepsiz tergelip, naqaq tayaq jedi. Tipti, molda-qojalardıñ keybiri türmede qaytıs boldı degen aqpar da taradı. Qolıñnan kelse şauıp al degen bwl arandatuşılıqtı, äperbaqandıqtı, älimjettikti Şi twtqasın wstap otırğan Qıtay biligi küni büginge deyin jasap keledi.

Ämirjan Qosanov, sayasatker:

-Ökinişke qaray, biz 27 jıldıñ işinde Qıtayğa kiriptar bolıp qaldıq. Oğan bilik kinäli. Biz Qıtayğa tek mwnayımızdı satıp jibergen joqpız. Namısımız ben ruhımızdı da qosa sattıq. Qazaqstan biligine qoyatın alğaşqı talabımız – köştiñ kölemin wlğaytıp, Qıtaydağı qandastarımızdı tolıq köşirip alsın! Memleket aqşağa kende emes. Bwğan wlttıq kapitaldı da jwmıldıruımız kerek. Bay-bağlandar şetelden ärtis äkelip, keude soqqanşa, järdemge mwqtaj qandastarımızdı öz elimizge jetkizip, üy salıp bersin. 

Ekinşiden, Qıtay bizdiñ mwnay men gazımızğa, basqa da tabiği resurstarımızğa zäru bolıp otır. Osını paydalanıp, bizdiñ bilik körşi memleketke aytsın: "Jazıqsız qamalğan otandastarımızdı bosatıñdar, äytpese senderge şikizat bermeymiz!" – dep. Osınday ul'timatum qoyu kerek!

Üşinşiden, halıqaralıq wyımdardıñ nazarın osı mäselege audaruımız qajet. Kontrnasihat jasap, Qıtayda "sodır", "separatist" degen jeleumen türmege jabılğan otandastarımızdı bosatıp alayıq. Europarlamentke şığıp, şeteldik beldi telearnalardıñ kömegine jügineyik. Qazaqta "bwğa berseñ, swğa beredi" degen jaqsı tämsil bar.

Törtinşiden, şetten kelgen qandasımızdı "oralman" dep atap, özekten tebudi doğaru kerek. Olar bizdiñ otandastarımız!

Qıtayda quğınğa wşırağan qandastarımızdıñ jadau küyi osığan deyin de birneşe ret aytılğan. Tipti bir top belsendi ötken jılı Astanada arnayı jiın ötkizip, elimizdiñ Sırtqı ister ministrligine 100-den asa arız-şağım ötkizgen edi. Alayda vedomstvo äli künge eşqanday şara qoldana almay otır.

(26-kökekte Almatıda «Qıtay-Qazaqstan qatınası: qandastarımız nelikten quğınğa wşıradı?» degen taqırıpta qoğamdıq tıñdau ötken edi. Sol jiında Ämirjan Sağidrahmanwlınıñ söylegen sözi, bwl.)

Abai.kz

15 pikir