Särsenbi, 14 Qaraşa 2018
Mäñgilik el 2983 1 pikir 4 Mausım, 2018 sağat 09:11

«Wlı Jibek jolı boyındağı dostıq jäne äriptestik» estelik-belgisi aşıldı

Qazaqstan Respublikası Mädeniet jäne sport ministrligi «Esik» memlekettik tarihi-mädeni qorıq-muzeyindegi Qazaqstan Respublikası men Koreya Respublikasınıñ birikken «Wlı Jibek jolı boyındağı Dostıq jäne Äriptestik» estelik-belgisi eskertkişi aşıldı.  Bwl turalı ministrliktiñ baspasöz qızmeti habarlaydı.  

Qazaqstan Respublikası Mädeniet jäne sport ministrliginiñ qoldauımen «Esik» Memlekettik tarihi-mädeni qorıq-muzeyi aumağına Qazaqstan Respublikası men Oñtüstik Koreya elderiniñ birikken «Wlı Jibek jolı boyındağı dostıq jäne äriptestik» estelik-belgisiniñ aşılu salatanatı bolıp ötti. Bwl estelik-belgisi Koreya Respublikası tarapınan 2013 jıldan bastap Koreya, Qıtay, Iran, Özbekstan, Türkiya, Ündistan sındı Wlı Jibek jolı boyındağı elderde qoyılğan. Qazaqstanda twñğış ret qoyılğalı twrğan estelik-belgini ornalastıru märtebesi ejelgi Jibek jolınıñ boyında jatqan QR Mädeniet jäne sport ministrligi «Esik» Memlekettik tarihi-mädeni qorıq-muzeyiniñ enşisine bwyırdı.

Esteriñizge sala keteyik, bwl şaranı Almatı qalasında 2018 jıldıñ 1 mausımı küni Koreya Respublikasınıñ Kensanbuk-do aymağı ekonomikanı damıtu wyımınıñ wyımdastıruımen ötetin «Wlı Jibek jolı jäne soltüstik bağıttağı äriptestik» attı Halıqaralıq forumnıñ saltanattı jalğası deuge boladı.

Saltanattı şarağa Qazaqstan Respublikası Mädeniet jäne sport ministri Arıstanbek Mwhamediwlı, Koreya Respublikasınıñ Kensanbuk-do aymağınıñ gubernatorı Kim Kvan En, Almatı qalasındağı Koreya Respublikasınıñ bas Konsulı Jon Sın Min, Kensanbuk-do aymağınıñ halıqaralıq qatınastar elşisi Jo Zuñ Çol', Örkenietter almasuı institutınıñ direktorı Zon Su Il, Kenbuk universitetiniñ professorı Pak Çon Su, Kenhi universitetiniñ professorı Kan Inuk, Zunan universitetiniñ oqıtuşısı Zon Inpen, Kemen universitetiniñ oqıtuşısı  So Zon Su jäne  Sırtqı sayasat institutı qızmetkeri Min Zi En  şeteldik delegaciya ökilderi qatıstı.

QR Mädeniet jäne sport ministri Arıstanbek Mwhamediwlı:

«Wlı jibek jolı adamzattıñ ekonomikalıq twrğıdan ğana emes, eñ bastısı mädeni qarım-qatınas twrğısınan da bir-birimen aralasuına zor ıqpal jasadı. Halıqaralıq sauda jäne diplomatiya jolı retinde qızmet etken bwl sauda jolı sonday-aq mädeniettiñ taraluına, örkeniettiñ damuına jäne qalalar men eldi mekenderdiñ örleuine tiimdi ıqpal etip otırğan. Ärine örkenietter men mädeniettiñ almasularına män bergen Wlı Jibek jolınıñ äsirese qazaq jeri arqılı ötken tarmaqtarı bizdiñ qızığuşılığımızdı tudıradı. Öytkeni anağwrlım tınış äri qauipsiz sanalğan bwl tarmaqtağı sauda jolı äsirese türki däuirinde erekşe swranısqa ie boldı. Bwl aldımen türki qağandarınıñ osı aymaqtarda jürgizip otırğan sayasatınıñ nätijesinde ornağan tınıştıq pen qauipsizdik faktorı dep sanaymız.

Bügingi  estelik-belgi aşılıp otırğan «Esik» qorıq-muzeyiniñ aumağı da ejelgi Jibek jolı ötetin aumaqqa jatadı. Tek «Esik» qorıq-muzeyiniñ ğana emes jalpı Qazaqstan Respublikası Mädeniet jäne sport ministrligine qarastı köptegen qorıq-muzeyler ornalasqan aumaqtar da osınau ejelgi Wlı ekonomikalıq, mädeni-ruhani häm diplomatiyalıq joldıñ boyında ornalasqan. Sizderdi elimizde twñğış ret iske asqalı otırğan osınday aytulı şaranıñ alğaşqı kuägerleriniñ biri boluğa şaqıramız».

Kim Kvan En, Koreya Respublikası, Kensanbuk-do aymağınıñ gubernatorı:

Bügin men üşin öte mañızdı kün. Sebebi, osıdan mıñdağan jıldar bwrın ata-babamız negizin salğan «Jibek jolın» büginde jañaşa jañğırtu baqıtına ie bolıp otırmın. Men eñ äueli jılı qonaqjaylığı men qazaq mädenieti tarihın jeke özi tüsindirgeni üşin Qazaqstan Respublikası Mädeniet jäne sport ministri Arıstanbek Mwhamediwlı mırzağa, osınau baylanıstarğa erekşe eñbek siñirgen, «Esik» qorıq-muzeyiniñ direktorı Gülmira Muhtarovağa alğıs aytqım keledi.

Bügin osında menimen qatar köptegen professorlar men ğalımdar kelip otır.  Olardıñ köbi keşegi ötken Halıqaralıq forumğa qatıstı jäne sol forumda köptegen pikir-talastar jasadı. Ärine, ğılımi twrğıda onday boluı zañdılıq.

Men büginde Qazaqstandıq mädeniet salasınıñ as ajıldam qarqınmen damıp kele jatqanın körip otırmın jäne ol twrğıda Mädeniet jäne sport ministri Arıstanbek Mwhamediwlınıñ eñbegi men äseri öte zor dep bilemin.

Däl osı jerde Silla patşalığınıñ tarihi-mädeni mwraları men osındağı tarihi-mädeni mwralardıñ öte qattı wqsas ekenine közim jetip otır. Sondıqtan da men bügin «Altın adamnıñ» bir müsini men köşirmesin arnayı tapsırıspen jasatıp Sillağa aparıp qoyamın dep şeştim. Koreya Respublikasınıñ jaña Prezidenti jaqın arada «Jaña soltüstik sayasat» attı joba wsındı. Osı arada soltüstik bağıt boyınşa jwmıs jasaytın komitet basşıları da qatısıp otır.

YAğni, eki el arasında äsirese, Silla men Esik mädenietteri arasında bolaşaqta birige otırıp atqaratın zertteu jwmıtarı köp dep bilemin jäne ataqaramız dep senemin.

İs-şara barısında qwrmetti qonaqtar «Esik» qorıq-muzeyiniñ ekspoziciya zaldarımen, «Esik» qorıq-muzeyi men Oñtüstik Koreya ğılımi mekemeleri arasındağı qarım-qatınastarğa arnalğan fotokörmemen tanıstı. Oğan qosa Jibek jolı boyındağı osınday erekşe belgilerdiñ mäni men mañızı turalı egjey-tegjeyli bayandalıp, Kemeng universitetiniñ taekvondo komandasınıñ, «Arqayım» etno-fol'k-tobı men «Torpi» körkemöner tobı sındı eki eldiñ wlttıq dästürdegi än-küy öneri ökilderiniñ şeberligin düyim jwrtqa paş etti.

Abai.kz

1 pikir