Jwma, 20 Qırküyek 2019
Bizdiñ şeneunik 3261 8 pikir 31 Şilde, 2018 sağat 07:49

Ahmetov, Jaqsıbekov, Qwlıbaevtarğa federaciya nege kerek?

Qazir bizde sport salasındağı jetistik el damuınıñ erekşe belgileriniñ biri sanaladı. Nege ekenin qaydam, bizdiñ är jeñisimiz memlekettiñ damuınıñ, sayasat kemeldiginiñ körinisi retinde nasihattaladı. Biz halıqtıñ ruhani aştıqtıñ ornın älemdik arenalarda jeñip alğan jüldelermen toltırıp, wlt abıroyın sportşılar arqılı asqaqtatudı közdeytin elmiz. 

Ras, halıqaralıq bäsekelerden bäyge alatın sportşını dayındap şığu oñay şarua emes. Bwl jerde sporttıñ är salasın basqarıp otırğan federaciyalardıñ atqarar röli de erekşe. Sportşınıñ talantın tanıp tärbieleytin de, tomağasın tartıp turnirlerge qatıstıratın da solar.

Jüz jüyriktiñ arasınan şın twlpardı tanıp, wlttıq qwramanı kil mıqtılardan jasaqtau üşin käsibi biliktilik kerek. Sol üşin sporttıñ kez-kelgen türin sol salanıñ mamanı basqarğanı oñ emes pe? Alayda, bizdiñ elde bäri basqaşa. Sport federaciyaların äkim-qaralar men ministr-millionerler basqarıp otır.

Sözimiz däleldi bolu üşin attarın atap, tüsterin tüsteyik.

QR futbol federaciyasınıñ prezidenti Qazaqstan Respublikası Prezidenti Äkimşiliginiñ Basşısı Ädilbek Jaqsıbekov.

Jaqsıbekov pen futboldıñ arasında qanday baylanıs bar? Aytıñızşı. Onıñ elimizdegi irgeli banktiñ birin uısında wstap otırğanı az ba? Elbasınıñ senimdi serigi boludıñ özi Jaqsıbekov üşin jetpey me? Futbol federaciyasın naq mamanğa basqartuğa ne kedergi? Ömiri dwrıs dop tebe almaytın ayaqdopşılarımız Jaqsıbekovke qanday abıroy äperedi?

QR jeñil atletika federaciyasınıñ prezidenti Şığıs Qazaqstan oblısınıñ äkimi Danial Ahmetov.

Ahmetov jeñil atletikamen aynalısqan adam ba? Joq, ärine! Bir kezderi Ükimet basqarıp, bası dauğa şatılıp, birer jıl el nazarınan tıs ketken sayasi twlğa osı federaciyanı basqaratının özi bile me eken? Bilse, bir oblıstıñ qıruar şaruasınan qolı bosamaytın adam ol jwmısın qalay atqarıp jür? Swraq bar, jauap joq.

Al Timur Qwlıbaev bir özi QR Olimpiada komitetiniñ, QR boks federaciyasınıñ, QR su sportı türleri Federaciyasınıñ prezidenti. Täkeñe osınıñ bäri artıq jük emes pe? Bir sport bolsa jaraydı, birneşe federaciyanıñ tizgini o kisige nege kerek? Osı salanıñ jiligin şağıp, mayın işken mamandar joq pa?

Bwlardan bölek, QR auır atletika federaciyasın basqarıp otırğan Janat Tüsipbekov, QR küres federaciyasınıñ basşısı Sauat Mıñbaev mırzalardıñ da sportqa qarağanda bilik pen bizneske jaqın ekenin jwrtşılıq jaqsı biledi.

Osığan qarap bwrınğı qazaqtıñ «şımşıq soysa da qasapşı soysın» degen sözi bügingi qazaqtar üşin qwnın joyğanın bayqaysız. Jer kölemi jağınan elimiz boyınşa üşinşi orında twrğan Şığıs Qazaqstan oblısın basqarıp otırğan Danial Kenjetaywlı men Prezident Äkimşiliginiñ Basşısı Ädilbek Rıskeldiwlınıñ «japakeştigine» tañğalmauğa amalımız joq. Bwl eki kisiden bölek, joğarda biz söz etken federaciya prezidentteriniñ qay-qaysısı da qos qolın qaltasına salıp bos jürgen jandar emes. Memlekettik mañızı bar iri qızmetterde otırğan kisiler.

Biz üşin sport federaciyaların kim basqarğanı mañızdı emes. Mañızdısı el sengen basşınıñ el sportı üşin istegen jwmısı bolmaq. Endeşe, sportqa üş qaynasa sorpası qosılmaytın osı basşılar özi basqarıp otırğan federaciyanıñ damuı üşin üles qosa alma ma? Mısal üşin aytayıq, ömiri jwmsaq kresloda otırıp kele jatqan Danial Ahmetovtı jeñil atletika salası üşin taptırmas twlğa deu qiın. Sol sekildi Ädilbek Jaqsıbekovtıñ da alğan bilimi men eñbek jolı futbolğa mülde qatıssız.

Däl osı ayuğa qoy baqtıratın qılığımız qazaq sportınıñ damuına twsau bolıp keledi. Basınan dauı arılmaytın futbol federaciyasına osıdan bes jıl bwrın Erlan Qojağapanov degen basşı keldi. Ekonomist, qarjıger, zañger mamandıqtarına ie, eñbek jolında eşqaşan sportqa qatıstı qızmet atqarmağan adam. Qazaq futbolınıñ qos tizginin Qojağapanov qolğa alğan üş jılda el futbolı dau-damay men özara kelispeuşilkterden köz aşpadı.

Bärimiz biletindey, 2016 jılı elimizde ülken jer dauı orın aldı. Qazaq jwrtı jerdiñ şeteldikterge jalğa berilmeuin aşıq talap etti. Sonımen qatar, qazaq jerine köz qızartqan Qıtay eline köpşiliktiñ öşpendiligi erekşe bolatın.

Osı kezde qıspaqta qalğan qazaq biligine kömektesip, Qıtaymen «dostıqtı» beyneleu üşin Erlan Qojağapanov bastağan futbol federaciyası qiınnan qiıstırıp qıtay qwramasımen joldastıq kezdesu wyımdastırdı. Bwlay deytinimiz, halıqaralıq joldastıq kezdesu ötkizetin arnayı uaqıt boladı. Al FIFA küntizbesinde belgilenbegen uaqıtta joldastıq matç ötkizudiñ eş jöni joq.

Al bwğan qarağan Qazaqstan futbol federaciyası joq. Eşkimniñ qarsılığına qaramay degenin jasadı. Bwl şeşimdi qoldamağan «futboldıñ mamanı bolğanımen, sayasattan habarı joq» käsipqoy futbol ligasınıñ basşısı Oljas Abraev qızmetinen quıldı. Mezgilsiz belgilengen joldastıq kezdesu üşin Prem'er liga oyındarı oñdı-soldı jıljıtılıp, çempionat küntizbesinde köptegen özgerister orın alğanı sport janküyerlerin qattı qınjıltqan bolatın.

Odan da jamanı, 7 mausım küni Qıtayda ötken joldastıq kezdesude Qazaqstan qwramasınıñ beldi oyınşısı Wlan Qonısbaev auır jaraqat aldı. Talanttı futbolşı sodan eki jıl boyı jasıl alañğa şığa alğan joq. Wlannıñ jaraqatı qazaq futbolı üşin auır joğaltu bolğanın janküyer qauım jaqsı biledi.

Basta aytqanımızday sporttağı jetistik sportşınıñ talantı men talabınıñ arqasında ğana kelmeydi, oğan alañ sırtındağı bapkerler qosını, basşılıq alqası, qoldauşılar qolpaşı - bäri de auaday qajet. Alayda qazaq sportınıñ eki tizgin bir şılbırın qolğa alğan qazirgi basşılar qosını köz quantpaydı. Bizşe, sport federaciyaların är salanıñ öz mamanı basqarsa oñ bolar edi. Käsiptik maman öz isin jaqsı biledi. Bwğan qosa, öziniñ süyikti käsibine janaşırlıq tanıtatını tağı bar.

Quanış Qappas

Abai.kz

8 pikir