Senbi, 21 Qırküyek 2019
Kübirtke 4131 19 pikir 7 Tamız, 2018 sağat 16:15

Resey azamatı Petroviçtiñ piri Ahmetovtiñ özi şığar!..

Danial Kenjetaywlı Ahmetov tizginin wstap otırğan Şığıs Qazaqstan oblısı jaylı jazamız bügin.

ŞQO-nıñ ortalığı Öskemenniñ tap irgesinde ornalasqan sayajaylı auıldı «Reseydiñ guberniyasına» aynaldırıp jibergen jwrt bar eken.  Auıl emes, bau-baqşa qoğamdastığı. «Vostoçnik 3» dep ataladı. Aumağında 200-dey sayajay bar.  Mine, şu osı «Vostoçnikten» şığıp otır.

Keşe «Feybuk» jelisindegi jeke paraqşasında sol «Vostoçniktiñ» twrğını Ayım Qasımbekova esimdi kelinşek jazba jariyaladı. Janayqayın jetkizdi. Biz qwlaq türdik.

Al bügin Qasımbekovanıñ özine  habarlasıp, mäseleniñ män-jayın swrap bildik.

Ayım Nwrlanqızı Qasımbekova bizdiñ äriptesimiz bolıp şıqtı.Audandıq  «Wlan tañı» gazetiniñ Bas redaktorı eken. Atalğan sayajaylı auıldıñ, dwrısı bau-baqşa qoğamdastığınıñ twrğını. Otbası, bala-şağasımen birge 7 jıldan beri sol jerde twrıp keledi.

Olar älgi «Vostoçnikke» köşip barğan jılı qoğamdastıqtı Şuşannikov deytin orıs zeynetker basqaradı eken. Qazir de bilep-töstep otırğan sol kisi körinedi.

«Qazaqşağa kerek bolsa, özderiñ audarıp alıñdar»

Ayım Qasımbekova, jurnalist, sayajay twrğını:

- Biz sol «Vostoçnik 3» bau-baqşa qoğamdastığına köşip barğanımızğa 7 jıl boldı.  Ol jerde 200-dey sayajay bar. Onıñ 60-tan astamı qısta da sol jerde twradı. Qısta twratındardıñ deni - qazaqtar. Negizi orıs wltınıñ ökilderi basım. Sol 200 üydiñ äri ketse 30-40-tayı ğana qazaqtardiki.

Qoğamdastıqtı Şuşannikov Grigoriy Petroviç degen kisi basqaratın. Qazir de sol kisi. Basqarma müşeleri de tügel öz adamdarı. Biz birli-jarım qazaqtı basqarmağa kirgizgen edik. Äyteuir ebin tauıp şığarıp tastadı.

Bwl bau-baqşa qoğaamdastığı bolğandıqtan, jıl sayın müşelik jarna töleymin. Biıl 5300 teñge dep bekitilipti. Oğan qosa, jer teliminiñ kölemine baylanıstı, är sotığına 2000 teñgeden tağı töleymiz. Mısalı, men biıl uçaskeme 14 mıñ teñge töledim.

Bwl kelisimşartta körsetilgendikten, sayajaydıñ barlıq twrğını onı töleydi jäne töleuden bas tartqan joq. Al jıl sayınğı müşelik jarnanı jañağı Şuşnnikovtıñ basqarması özderi belgilep, bekitedi.  Biıl byudjeti 6 million teñgege jetti. .

Bau-baqşa qoğamdastığınıñ elektr energiyası da sol bir törağanıñ ieliginde. Eger onıñ qalauı bolsa, ol kez kelgen twrğındı jarıqtan ajırata aladı. Ol sol qwzıretin asıra paydalanıp, qanday da bir qwjatqa kelisim jinau barısında, qarsılıq bildirgenderge «elektr energiyasın qiyamın» dep qoqan-loqı jasaydı. Aqırında öz degenine köndiredi. Qiılğan quattı qayta qostırudıñ özi 8 mıñ teñge twradı ğoy... Al qisa, onı oñaylıqpen qosa qoymaydı.

Osılay öz bilgenin jasap jürgen Şuşannikov Grigoriy Petroviç degen kisi  Resey azamatı eken. Söyte twra, Qazaqstanda twrıp, qaraköz qazaqtarğa ielik etude. Jası jetpistiñ aynalasında bolsa da, oğan eşkimniñ ämiri jürmeydi. Ol da özin bwl jerdiñ Qwdayı sezinedi-au. Jergilikti qazaqtardı mensinbeytinine özim talay ret kuä boldım. Talay ret äkimdikke, prokuraturağa arız jazdıq. Biraq, qimıl joq.

Al tipti, habarlandırudı da tek orıs tilinde jazadı. Biz talay ret ayttıq. «Biz memlekettik mekeme emespiz. Sondıqtan qazaqşağa kerek bolsa, özderiñ audarıp alıñdar» dep jauap qattı.

Twrğındardıñ atınan arız jazıp, bau-baqşa qoğamdastığınıñ basşısın auıstırayıq desek, twrğındardıñ basım böligi orıs wltınıñ azamattarı. Qoğamdastıqtıñ problemaların birlese şeşu üşin qwrılğan alqa da bar, biraq ol alqanıñ özine öz qazağımızdı tañdap twrıp qossaq ta, şığıp qaladı! Bwl bassızdıqtı qalay toqtatuğa boladı?

Habarlandıru

Biz Şuşannikov äkimşiligindegi habarlandırulardı kördik. Söytip, Ayım Qasımbekovanıñ sözine sendik. Senbesimizge bolmadı. Mine, köriñizder.

«Qwrmetti sayajaylıqtar» dep bastalatın habarlandırudıñ 4-bölimine köz jügirtiñiz. «Ne finansirovat' iz smetı Tovarişestva perevod informacii na gosudarstvennıy yazık» dep jazıptı. Qazaqşağa sözbe-söz qotarsaq, «Aqparattı memlekettik tilge audarudı Seriktestik smetasınan qarjılandırmau kerek» deydi.

2018 jıldıñ 12-mamırında, osıdan üş ay bwrın ğana ötken jiında Şuşannikov esep bergen eken. Söytip, qayta saylanğan. Şuşannikovtıñ esep-qisabın «mwqiyat» teksergen reviziyalıq komissiya arnayı akt tüzip, Petroviçtiñ jwmısına oñ bağa bergen.

Aytpaqşı, «Vostoçnik 3-tiñ» 2018 jılğa jasağan smetalıq jobası 6 238 810 teñgeni qwraptı. Är sotıq jer üşin tölenetin aqı mölşeri biıl 2 380 teñge dep bekitilgen.

Tüyin

Şuşannikov deytin Resey azamatınıñ Öskemende öz «guberniyasın» qwrıp alğanın Ahmetov bilmey me? Joq älde, bilse de, bilmegendey bolıp otır ma? Äyteuir, Şuşannikov anau-mınaudı qoyıp, prokuraturanıñ özin pısqırmaydı. Ol memlekettik tildi mensinbeydi. Mensinse, Seriktestik qarjısınan aqşa bölmese de, eki auız söz habarlandırudı qazaq tilinde jazar edi ğoy.

Bwnıñ sırtında bütin bir «auıldı» jalğız özi bilep-töstep otırğanı tağı ras. Elektr jarığınıñ aqısın, jıldıq müşelik jarna aqısın, är sotıqqa belgilenetin somanı Şuşannikov komandası özderi belgileydi. Bwl qalay sonda? Şuşannikovterge şekteu bolmağanı ma?

Sonda Täuelsiz Qazaqstannıñ memlekettik tilin kerek qılmağan Şuşannikovtar sekildiler kimge arqa süyep otır? Bälkim, basqa-basqa Petroviçtiñ piri Ahmetovtiñ özi şığar!.. Äytpese, birinşiden Resey azamatınıñ Qazaqstan aumağındağı eldi-mekendi basqaruğa qanday qwqığı bar! Ekinşiden, Resey azamattınıñ Qazaqstan azamattarınan aqşa jinauı zañğa tompaq emes pe? Üşinşiden, Qazaqstan azamatı emes adamğa az  da bolsa eldi basqartuğa kim mümkindik berdi? Ahmetov pe, basqa ma?

Nwrgeldi Äbdiğaniwlı

Abai.kz

19 pikir