Seysenbi, 26 Naurız 2019
Tağayındau 6687 16 pikir 9 Tamız, 2018 sağat 08:26

Qayıqşı kelip, kemeşi sudan şıqtı..

Bilikte jii orın alatın auıs-tüyiske mıñq etpeytin qazaqstandıqtardı osı aptada orın alğan tağayındaular bey-jay qaldırğan joq. Köpşilik Qorğanıs ministrligine kelgen jaña basşını küdikpen qarsı aluda. Elbasınıñ bwyrığımen orın alğan tağayındaulardıñ dwrıstığına köz jetkizip twrsaq ta, mamandar äskeri salanıñ tizginin Nwrlan Ermekbaevtiñ wstağanına ekiwday sezimde qalğanday körindi. Mwnı jasırıp-jabudıñ qajeti şamalı.

Halıqqa Din isteri jäne azamattıq qoğam ministri bolıp twrğan kezinde tanılğan Nwrlan Baywzaqwlın biliksiz basşı dey almaymız. Biraq, bwrın-soñdı arnayı äskeri qızmette bolmağan kisige bükil eldiñ qorğanıs qızmetin senip tapsıra salu säl köñilge küdik wyalatatını şın. Ermekbaev eşkimniñ ala jibin attamasa da el-jwrttıñ enjar pikir bildiruiniñ sebebi de osı bolsa kerek. Äytpese, wzaq uaqıt boyı lauazımdı qızmetter atqarıp kele jatqan Nwrlan mırza qolınan is kelmeytin jan emes edi.

2016 jıldıñ qırküyek ayınan beri Qorğanıs ministri qızmetin atqarıp kelgen Säken Jaswzaqovtıñ jwmısı köp köñilinen şıqqan bolatın. Auğan soğısınıñ qan maydanın körgen general-polkovnik Säken Jaswzaqov basqarıp twrğanda eldiñ äskeri salasında oñ özgerister köp boldı deydi sarapşılar. Sol üşin de halıq käsibi mamannıñ ornına özge qızmetten kelgen Ermekbaevqa senimsizdik tanıtıp otır. Bolmasa äskeri isterdi birinşi ret özge salanıñ mamanı basqarğalı otırğan joq. Bwğan deyin Qorğanıs ministrliginiñ kreslosına Danial Ahmetov, Ädilbek Jaqsıbekov, Serik Ahmetov, Imanğali Tasmağambetov qatarlı kisiler jayğasıp körgen.

Atalğan vedomstvonıñ Säken Jaswzaqov basqarıp twrğan kezdegi jetistigin tökpey-şaşpay äri qaray jalğap äketu Nwrlan Ermekbaevqa sın. Osınday jauaptı qızmetke kiriskeli otırğan Ermekbaevqa qoyılar talaptıñ tım joğarı bolatını sözsiz. Sebebi, «kemeşi kelse qayıqşı sudan şığadı» degen qazaq qayıqşı kelip kemeşini kölden quağanın körmese kerek.

Qazaq halqınıñ bir wlın maqtasa aspanğa biraq şığaratın, jamandasa jerge kirgizetin ädeti bar ğoy. Nwrlan Ermekbaev Din isteri jäne azamattıq qoğam ministrligin basqarğan eki jılda el nazarında naşar obrazın qalıptastırıp alıp edi. Sebebi, onıñ keybir wşqarı pikirleri eldiñ patşa köñiliniñ qatal pärmenine wşırağan bolatın. Nwrlan Baywzaqwlınıñ jaña jwmısqa kirispey jatıp sınğa wşırauınıñ tağı bir sebebi osı dep oylaymız.

Su jaña Qorğanıs ministriniñ jürip ötken eñbek jolına köz salsaq äskeri salağa mülde qatısı joq adam emes (söyte twra qatısı da keremet emes) ekenin bayqaymız. 23 jasında KSRO Qorğanıs ministrliginiñ Äskeri Qızıl tu institutın qıtay jäne ağılşın tilderin meñgergen oficer mamandığı boyınşa bitirgen. 1986-1991 jıldarı KSRO Qarulı Küşteriniñ qatarında qızmet etken. Ermekbaevtiñ äskeri saladan habarı bar ekenin Elbası da eske saldı.

«Qorğanıs ministri lauazımına azamattıq twlğanı, yağni, qauipsizdik jönindegi kömekşim - Qauipsizdik Keñesiniñ hatşısı Ermekbaev Nwrlan Baywzaqwlın tağayındauğa şeşim qabıldadım. Sonımen birge, N.Ermekbaev kadrlıq oficer, äskeri qızmette täjiribesi bar, sonıñ işinde şielenis aymaqtarında bolğan. Ol halıqaralıq mäseleler jönindegi kömekşi, Qıtayda jäne Oñtüstik Şığıs Aziyanıñ birqatar elinde elşi, ministr jäne eki ret Qauipsizdik Keñesiniñ hatşısı qızmetterin atqardı», - dedi Nwrswltan Nazarbaev Qorğanıs ministrliginiñ basşılıq qwramımen ötken jiında.

Eñbek jolınıñ teñ jarımın şetelderde elşilik qızmetke arnağan Ermekbaev endi eldiñ qauipsizdigi üşin erinbey eñbek etedi degen senimdemiz. Qıtay tiliniñ mamanı, Qıtay elinde wzaq uaqıt elşilik qızmette bolğan. Şığıstağı körşimizdiñ işki-sırtqı jağdayınan habarı az bolmasa kerek. Institutta oqıp, qızmet barısında jiğan täjiribesi qazaq dalasınıñ şetinde ireleñdegen aydaharğa qarsı qauipsizdik qızmetin sauattı jürgizuine kömegin tigizse, qaneki.

Quanış Qappas

Abai.kz

16 pikir