Särsenbi, 26 Mausım 2019
Bäse... 2240 9 pikir 9 Qañtar, 2019 sağat 10:22

Öskemendegi drama teatrğa Rüstem Esdäulettiñ atı berilsin!

Öskemendegi ziyalı qauım ökilderi osınday wsınıs aytıp, Şığıs Qazaqstan oblısınıñ äkimi Danial Ahmetovke wsınıs-hat jazdı. Hattıñ mätinin nazarlarıñızğa wsına otırıp, qoldau bildiruleriñizdi swraymız!

Qwrmetti Danial Kenjetaywlı!

Elbasımız Nwrswltan Nazarbaevtıñ bastamasımen, tikeley mwrındıq boluımen qolğa alınğan, bügingi küni respublikamızdıñ tükpir-tükpirinde mümkindiginşe jüzege asırılıp jatqan «Ruhani jañğıru», «Wlı dalanıñ jeti qırı» attı jobalarğa Siz basqarıp otırğan Şığıs Qazaqstan oblısınıñ sübeli üles qosıp jatqanına ünemi marqayıp jüremiz. Äsirese, älem tarihında, onıñ damu tegerşiginiñ ünemi progrestik bağıtqa bet bwruında, jalpı adamzat damuı evolyuciyasında eresen ülken röl atqarğan Altay, onı meken etken türkilerdiñ ötkenine käri Europa men mwhittıñ arğı betindegi Amerikanıñ jiti nazar audaruı, tikeley Elbası men Siz ıqpal etip, jağday jasağan ğalım-zertteuşilerdiñ arqası. Öñirimizden tabılğan Altın adam, tağı da basqa qwndı jädigerler – osı sözimizdiñ ayğaqtı däleli.

Ärine, kez kelgen iri tarihi qwbılıstı tuğızatın da, onı jüzege asıratın da – halıq. Naqtılap aytsaq, halıqtıñ arasınan suırılıp şıqqan asa talanttı jeke twlğa. Al, adam faktorın qalay qadirleu, onı madaqtau men marapattau, eli men jwrtınıñ abıroyına abıroy, dañqına dañq qosqan twlğalardı mäñgilik este qaldıru mäselesinde, Siz erekşe qarımdılıq bayqatıp jürsiz. Oğan halıqtıñ közi äldeqaşan jetken. Mäselen, Elbasımızdıñ «Ruhani jañğıru» jobasına oray, señi mäñgi bwzılmay kelgen Şığıs Qazaqstan oblısındağı äbden eskirgen, tozığı jetken, ötken qoğamdıq formaciyalardıñ qañsıq mwrası sındı jer-su, qala-auıl, köşe, mektep, t.b. ataulardıñ soñğı eki jıl işinde asa şapşañ jañğırıp, özderiniñ bwrınğı tarihi ataularımen qaytara tabısıp nemese el men jwrttıñ kökeyinde jürgen esimderge ie bolıp jatqanı, osılardıñ işindegi şüydelisi - Zıryannıñ Altay ataluı, Sizdiñ qayratkerlik twlğañızdı asqaqtata tüskeni ras. Ämanda tileulespiz!

Endigi wsınıs-tilegimizdiñ tizgini de Sizdiñ qolıñızda. 2009 jıldıñ qara küzinde qazaq öneriniñ şıñına örmelep şığıp, küni boluğa qızmet jasap jürgen alaştıñ asa darındı jas rejisseri Rüstem Esdäuletov kenetten dünieden ozdı. Orda bwzar otız jasında. Ol oblıs öneriniñ qara şañırağı - oblıstıq drama teatrınıñ, onda bwrın-soñdı bolmağan qazaq truppasınıñ aşılıp, örkendep damuına eren eñbek etken azamat edi. Aldımen oblısta bwrın-soñdı bolmağan qazaq truppasın aşıp, jüre-bara sol teatrdıñ direktorı qızmetinde jürip respublika sahnalarında Şığıs Qazaqstannıñ atın, önerpazdarın ayşıqtadı. Respublikada wlttıq twrğıdan alğanda bwrın atı men zatı beymağwlım Şığıstıñ abıroyı köterildi. Tanımaldılıqqa ie boldı. Rüstem Orazbaywlı onmen de şektelgen joq, şığıstıñ teatrın halıqaralıq deñgeyge şığardı: oblıstıq teatr artisteri öz şığarmaşılıqtarınıñ san qırlı ekendigin Resey, Qırğızstan, Europa sahnalarında meylinşe däleldedi. Ol – Täuelsiz Qazaqstannıñ müldem jaña formattı rejisserleriniñ köşbasşısı boldı.

Rüstem Esdäuletov äri san qırlı rejisser, äri lirik aqın, äri mıqtı dramaturg, äri ülken pedagog bolatın. Eñ bastısı, ol – Adam edi. Wlı Abaydıñ «Adam bol!» degen bastı qağidasın keudesinen şıbınday janı pır etip wşıp ketkenşe mültiksiz orındadı. Öle-ölgenşe halqına, öziniñ tuıp-ösken Şığısına jankeştilikpen eñbek etti. Soñğı demi de teatr sahnasında üzildi.

Qwrmetti Danial Kenjetaywlı!

«Jerdiñ atın el şığaradı, eldiñ atın er şığaradı» deydi kemeñger halqımız. Keşegi küni osı tuğan Şığısı üşin jarğaq qwlağı jastıqqa timey, boyındağı Allası sıylağan barlıq mümkindikteri men arda qasietterin eline sadaqalağan Rüstem Esduletovtay rejisserdiñ dünieden ötkenine 2019 jılı on jıl toladı eken. Sol ataulı jılğa jäne keşegi küni Elbası şegelep aytqan Jastar jılına oraylastırıp oblıstıq drama teatrına özi ıstığına küyip, suığına toñğan, mwqım sanalı ğwmırın qazaqtıñ öneri men teatrına bağıştağan Rüstem Esdäuletovtıñ atın bersek degen ötinişimiz bar. Oblıs biligi teatrğa osı azamattıñ atın beru arqılı «Ruhani jañğıru» jobasınıñ eki babı boyınşa mwratqa jetedi: birinşiden – halıqtıñ talap-tilegi üderisinen şığadı; ekinşiden – jas wrpaqqa öziniñ şınayı patriottarın qwrmetteudi üyretedi! Eger de Öziñiz tarapıñızdan bwl wsınıs qoldau tauıp jatsa, öñir halqınıñ quanışpen qoldaytınına kepilmiz.

İzgi nietpen:

Älibek Qañtarbaev – jazuşı, QR Jazuşılar Odağı ŞQO filialınıñ direktorı;

Tüsiphan Tüsipbekov – qoğam qayratkeri, «Qazaqstandıq mädeniet, sport, turizm jäne aqparat qızmetkerleri salalıq käsiptik odağı» QB-niñ ŞQO filialınıñ törağası;

Jañabay Äşimov – eñbek ardageri, ŞQ oblıstıq Aqsaqaldar alqasınıñ törağası; 

Serik Qwsanbaev – aytısker aqın, «Altay asu» qoğamdıq birlestiginiñ atqaruşı direktorı, QR Mädeniet qayratkeri;

Abai.kz

 

9 pikir