Senbi, 20 Şilde 2019
Anıq 4501 18 pikir 15 Säuir, 2019 sağat 20:57

Qazaq atauınıñ qaytarıluı turalı...

Bügin qazaq tarihındağı eñ eleuli datalardıñ biri. Sebebi osıdan tura 94 jıl bwrın, yağni 1925 jıldıñ 15 säuirinde Qızılordada ötken AKSR Qırğız (Qazaq) Keñesteriniñ V s'ezinde halqımızğa «qazaq» degen ataudı qaytaru turalı tarihi şeşim qabıldandı. Sodan bastap barlıq resmi qwjattarda bizge qatıstı «qırğız» degenniñ ornına «qazaq» atauı qoldanılıp, jazıla bastadı. Bwl täuelsizdik jolında jasalğan eñ batıl äri asa mañızdı qadamdardıñ biri edi.

Osı bir wlı istiñ bastauında wlttıñ wlıq wstazı Ahmet Baytwrsınovtıñ twrğanın eşqaşan esten şığarmauımız kerek. Ahmet atamız joğarıda atalğan sol bir jiında qırğız ben qazaqtıñ eki bölek wlt ekenine nazar audarıp, wlt atın jasırudı ötken zaman köterse de, endigi tarihtıñ onday jañsaqtıqtı qwp körmeytinin aşıp ayttı. Sonıñ arqasında tarihi ädilettilik saltanat qwrıp, qaytadan qazaq atandıq.

Iä, bir kezderi til, dil, din siyaqtı qwndılıqtarımızben birge atımızdan da ayırılıp qala jazdağan zamandar boldı. Qazir sonıñ bäri artta qalıp, bükil älemge täuelsiz Qazaq eli retinde tanılıp otırmız. Bizdiñ endigi bastı mindetimiz – tamırıñdı qiıp, tanımıñdı özgertip jiberetin qazirgidey jahandanu jağdayında qazaqtıñ atın mäñgilikke saqtap, wltımızdıñ otın öşirmeu.

Ol üşin jas buınnıñ sanasına wlt tarihın tereñ siñirip, wlttıq kodtan när alatın qwndılıqtardı däripteudiñ mañızı zor dep bilemin. Tipti älemniñ ozıq jañalıqtarınıñ wlttıq bolmısımızben bite qaynasuına da jağday jasauımız kerek. Eñ bastısı, barlıq is-äreketimizden qazaqtığımız ayşıqtalıp, wlttığımız wlıqtalıp twrsa igi. Öytkeni wlt üşin ömirin qiğan ziyalılarımızdıñ bastı közdegeni sol bolatın.

Osığan baylanıstı kelesi jılı 95 jıl tolatın atalğan oğiğanıñ mañızın arttırıp, 15 säuirdi tarihi ädilettilik saltanat qwrğan kün retinde atap ötsek te eş artıq emes dep esepteymin. Mwnday bastama «Ruhani jañğıru» bağdarlamasın da jaña mazmwnmen toltıra tüsetini sözsiz.

Mäulen Äşimbaev

Abai.kz

18 pikir