(Ángime)

Tómengi palatagha deputat bolyp, mandat alghan kýnning erteninde әdettegi júmys kýni bastaldy. Kómekshi jigit әldeqashan kelip alghan, auyzghy bólmedegi ýstelinde әlde bir papkilerdi rettep otyr eken. Múny kórgende ornynan úshyp túryp, sәlemdesti de:

-Keshiriniz, jýrgizushi maghan habarlamady. Sizdi birinshi qabattan ózim kýtip alatyn edim ghoy.

- Óitip әuire bolmay-aq qoy! Liftige ózim minip kele alamyn, adasyp ketedi dep pe edin?

-Jogha, ol ne degeniniz, agha! – dep, sypayy ghana ýn qatqan biyazy

kómekshi: -Shay әlde, kofe? – dep, súrauly jýzben kóz saldy.

-Eshtene kerek emes, mәjilis zalyna aparatyn qújattardy dayynda!

-Bәri dayyn, baseke! Otyrys bastalardan bes-on minut zalgha ózim aparyp, ýstelinizding ýstine qoyyp beremin.

Kabiynetine kirip jayghasqan song saghatyna qarasa, otyrys bastalugha әli baqanday bir saghat bar eken. Keshe abyr-sabyrmen kelip, kabiynetin jaqsylap kóre almaghan edi. Endi, jan-jaghyna qarasa, at shaptyrym keng bolmasa da, bir adamgha layyqtalghan әjeptәuir jayly orynjay eken.

Qabyrghanyng ortasyndaghy ýlken ainagha baryp qarady. Keshe ghana qaladaghy eng ataqty da iri sauda ornynan toghyzjýz myng tengege satyp alghan german kostumi denesine qonyp túr. Jarasymdy kórinedi. Bir jaghyna qaray sәl qisayyp ketken galstugin týzep qoydy. Onsyz da siyr jalaghanday bolyp basyna jabysyp túrghan seldir shashyn beyne bir ýrpiyip, úipa-túipa bolyp ketkendey-aq tarap-tarap aldy.

Sәlden song kómekshi jigit kirip, gazet-jurnaldardyng jana sandaryn ýstelining ýstine qoydy. Kompiuterin qosyp, keshegi birlesken otyrys turaly reportajdar jariyalaghan elektrondyq aqparat qúraldarynyng paraqshalaryn ashyp berip ketti.

Gazetterdegi jәne internettegi maqalalargha kóz jýgirtkeni bolmasa, oqyghan da joq.  Negizinen olarda jariyalanghan fotolargha shúqshiya qarady. Bir qatar deputattardyng jalpy otyrystaghy suretteri óte anyq kórinip túr. Ózi otyrghan qatarda dәl qasyndaghy әriptesining fotosy iri planda túr da, múnyng iyghy ghana jyltiyp, týri týsirilmey qalypty. «Oy, atana nәlet, sәl ghana sheginip, meni de tolyqtay týsire salsa, qaytedi eken» - dep ishtey boqtady da, gazetti búryshqa qaray laqtyra saldy. Sayt, portal paraqshalaryndaghy fotolardy týgeldey sýzip shyqsa da óz beynesin kezdestire almady.

Otyrysqa on minut qalghanda kómekshi jigit bas súghyp, jinalys zalyna baruy kerek ekenin habarlady. Jiynnyng kýntәrtibi, zang jobasynyng qaghaz týrindegi núsqasy sekildi bir qúshaqqa tayau qújatty kómekshi jigit kóterip birge jýrdi. Aynalasyna qarasa, jalpy qalyptasqan ýrdis tym tosyndau sekildi kórindi.

Zaldyng ishi abyr-sabyr. Aldynghy birneshe   shaqyrylymda әrbirin derlik jibermey qayta-qayta saylanyp kele jatqan eskilikti mәjilisshiler qúshaqtasyp amandasady jәne azghana әiel deputattar sәlemdeskende mindetti týrde betterin úsynyp, erkekter olardy shópildete sýietin birtýrli dәstýrleri bar eken. Búryn iri lauazym iyesi bolghan, týr túlghalary elge asa tanymal birneshe әriptesine sәlem berip edi. Olar sәlemin almady, tipti, tym qúryghanda bas iyzemedi. «Endi, mynanday úsaq-týiekterge de mandat beretin bolghan ba? Jetpegeni osy ma, endi, búlardyng myna menimen tenesui qalyp edi, qaray gór ózin, sәlemdesip qoyady, taghy...» degendey synay tanytyp, tyjyryna qarady da kerdeng qaghyp óte shyqty.

Sonymen zang jobasyn talqylau bastalyp ketti. Jobany tanystyrghan ministrge birneshe әriptesi súraq qoyyp ýlgerdi. Búl da ózinshe bir manyzdy súraghyn dayyndap otyrghan edi, qyrsyq qylghanda dәl sony artynda otyrghan basqa bir deputat qoyyp kep jiberdi. Dereu rayynan qaytugha mәjbýr boldy. Kelesi súraqty oilana bergende:

-Súraqtar qoyylyp bitken bolsa, endi, talqylaugha kósheyik! – dep, spiyker әngimeni basqa arnagha búryp jiberdi.

Jobany jilikshe shaghyp, suyryla sóilep jatqandar kóp-aq. Bizding deputat әrbirining auzyna bir qarap, shynymen de tandanyp qaldy. Sóileytinderding kóbi ejelden kele jatqan saqa deputattar eken. Bireuleri zang jobasyndaghy bir sóilemning ózinen adamnyng oiyna kirip shyqpaytyn orasan bir qate tauyp, bayandamashyny sastyryp, spiykerdi quantyp tastaytynyn qaytersin. Qay deputat sóz alsa, býkil teleoperator atauly sonyng manyna kelip, ýimelep, sart-súrt týsire bastaydy eken.

Bizding deputattyng qasyndaghy әiel әriptesi sóz alyp edi, qaptaghan operatorlar sol qatargha qaray lap qoydy. Álgi әielding әr sózin tamsana tyndap, bet-jýzining qimylyn da qalt jibermey qarap ol otyr. «E, osylay sóileu ýshin de birshama batyldyq kerek eken ghoy» - dep ishtey oilap qoydy.

Sonymen otyrys ayaqtalyp, bәri zaldan shyghugha ynghaylandy. Kómekshileri zalgha lap qoyyp, qújattaryn jinastyryp, әrqaysy deputattarynyng qasynan bir eli qalmay zyr jýgirip jýr. Dәlizge shyqsa qaptaghan jurnalister. Álginde ghana sóz alghan sanauly deputatty ana búryshta bir, myna búryshta bir ortagha alyp, mikrofondary men diktafondaryn auyzdaryna tósep, súraqtaryn jaudyrtyp jatyr.

Bizding deputat әlgi әriptesterine qyzygha da, qyzghana da  kóz tastady. Ózine qaray birli-jarymy moyyn búryp qala ma degen esek dәmemen jýrisin bayaulatyp, jaltaq-jaltaq qarap qoyady. Biraq, oghan kóz qyryn salghan tiri jan bolmaghan song eriksiz kabiynetine kirdi de:

-Qaneki, shay әkelshi! – dep, kómekshisine búiyra til qatty.

Deputattyqtyng bir tәuiri, týski ýzilis eki saghatqa sozylady eken. Shay iship alghan song ol ketuge ynghaylandy. Kómekshisi ony kólikke deyin jetkizip salu ýshin birge shyqty. Dәlizde kele jatyr edi, qarsy aldynan kezdesken bir jigit ózin jurnalispin dep tanystyryp, súhbat alugha rúqsat súrady. Qasynda teleoperator kórinbegenine qaraghanda, televiziya tilshisi bolmasa kerek. Oghan azdap qomsynyp qaldy da:

-Qay gazetten edin? – dep súrady.

Ózi biletin eki-aq gazet bar edi, onyng eshbiri emes. Sosyn, «qay bir tanymal gazet deysin, bas qatyrmay-aq qoyayyn» degen oigha keldi de:

-Aynalayyn, mende uaqyt joq! – dep, ýzildi-kesildi bas tartty. Sol sәtte qastarynan ótip bara jatqan bayyrghy deputattardyng biri:

-Oy, amansyng ba, inishek? Men súhbat bereyin, jýr bizding kabiynetke! – dep, jata jabysqanyn kórgende taghy da oilanyp qaldy. Biraq, endi kesh edi.

Ol oiyn rastaghanday tysqa shyqqanda kómekshisi:

-Baseke, janaghy tilshige interviu beruden beker bas tarttynyz.

-Nege?

-Sebebi, ol bizding parlament basylymynyng tilshisi. Sonymen qatar óte tәjiriybeli jurnalist. Birdemening shet-jaghasyn aityp, sәl emeurin bildirseniz boldy, qatyryp jazyp, keremet etip jariyalaydy. Tipti, zang shygharushy biylikting ishki qyr-syryn býge-shigesine deyin bilip alghany sonshalyq, mayyn tamyzyp jazghan maqalalaryn bizding spiykerding ózi maqtaghanda, auzyn ashyp, kózin júmyp tamsanady. Ótken shaqyrylymda maghan basshy bolghan deputat janaghy tilshining arqasynda talay ret súhbatqa shyghyp, ózining jaghymdy imidjin sol tilshi jigitke jasatty da, mandatyn viyse-ministrding kreslosyna aiyrbastap ala qoydy. Negizi, múnday mýmkindikti bosqa jibermegeniniz jón bolady – dedi, kómekshisi.

Álginde ghana dәlizde kezdesken әriptesining jylp ete qaluynyng syryn deputat endi úqqanday boldy. Ishtey «qap, әttegen-ay» dep qatty ókinse de, onysyn kómekshisine bildirmegen synay tanytyp:

-Qazir týski tamaq kezinde bir manyzdy kezdesuim bar edi, soghan asyqtym – dey saldy. Shyn mәninde, ýiine baryp, semiz jylqynyng etine toyyp alghan song bir saghat myzghyp aludan ózge manyzdy eshtenesi de joq edi.

Týsten keyingi júmystary kәkir-shýkir otyrystardan túrady eken. Komiytet jiyny, júmys toby degendey birdemeler. Degenmen, júmystyng qyzatyn túsy da osy jerde sekildi. Janadan kelip týsken zang jobalaryn býge-shigesine deyin taldap-tarazylap, talay qúndy úsynys, pikirler osynda aitylatyngha úqsaydy. Jalpy, otyrysqa shygharylghanda aitylatyn әngimelerdi osynda pysyqtap alugha bolatyn siyaqty.

Sonymen birge jalpy otyrysta ne aitatynyndy, kimge qanday saual tastaytynyndy da, fraksiyasy bar, basqasy bar, osy jerde kesip-piship beredi.

Al, baspasózge súhbat beretin, manyzdy kezdesuleri bolsa, oghan komiytet tóraghasy da qoldau kórsetip, arnayy uaqyt bóletin kórinedi. Negizinen, qoghamdyq pikirding kez kelgen mýmkindikterin barlyghy da  qalt jibermeytinderin kórgende týski ýzilistegi  әreketine ókininkirep qaldy.

Ókingenning kókesi eki kýnnen keyingi otyrysta boldy. Jinalys zalyna kirse, barlyq әriptesteri әlgi dәlizde kezdesken deputatty qyzu qúttyqtap, mәz-meyram bolysyp jatyr. Ár ýstelding ýstinde әlgi gazet. Onyng aiqara betinde әriptesining kórnekti fotosymen birge jariyalanghan kóldey súhbat. Jiyn bastalardyng aldynda spiykerding ózi mәni men mazmúny tereng súhbat bergen әlgi deputatqa alghys aityp, barlyghy du qol soqqanyn qaytersin. Bәrinen búryn keshkisin kórshi oblysta túratyn baldyzynyng telefon soghyp qyjyrtqany әbden zyghyrdanyn qaynatty:

-Jezdeke-au, deputat bolghan ekensing baspasózde bir kórinip, bizdi quantyp qoysanshy! Teledidar janalyqtaryn kýnde qaraymyz. Tym qúryghanda, bir pikir bildirmeysin, jalqy súraq ta qoymaysyn. Ana joly bir ret qana teledidardan jylt ettin. Onyng ózinde qasyndaghy әielge kózing týsip, sonyng auzyna kirip keterdey ólip-talyp otyrsyn! – dep, qarqyldap túryp kýledi.

-Áy, ketshi-ey! – dep, telefonyn ýze salghannan ózge amaly qalmady.

Kezekti otyrystardyng eshbiri televiziyanyng týsiriluinsiz ótpese de, qaptaghan telearnalar operatorlarynyng birining obektiyvine ilige almay jýrgende jarty jyl zu etip óte shyqty. Endi, azghana uaqytta kanikul bastalady. Auylgha bara qalsa, «teledidarda bir ret te tóbe kórsetpegen seni de deputat deydi-au» dep, mazaq etetin yrjaqay qúrdastary da jetkilikti. «Dostyng kýlkisi, dúshpannyng tabasyna» qalmau kerek. Azghana merzimde ýlgerip birdeme jasau kerek. Onyng ishki oiyn aitqyzbay-aq bilgendey kómekshisi oghan birde bylay dedi:

-Baseke, teleoperatorlardyng qolyna birdeme ústatpasanyz, olar sizdi «krupnyi» túrmaq «dalinyi» plangha da iliktirmeydi. Solar arqyly tilshilerge shyghyp, aldymen, sinhron, odan keyin súhbat ta berip jiberuge  bolady.

-Aynalayyn-au, sony bayaghydan beri nege aitpay jýrsin?

-Alghashynda men sizdi publikagha shyghugha asa әuestigi joq adam shyghar dep oilap qaldym...

-Jaraydy, eshten kesh jaqsy. Al, men myna deputat basymmen qaydaghy bir operatorgha qalay endi, neghylyp...

-Oghan esh qam jemeniz, agha! Maghan berseniz, ózim bәrin retteymin.

Kómekshi rasymen de qatyryp túryp rettedi. Deputat apta boyy birneshe telearnanyng basty janalyqtarynda iri planda kórsetilip qana qoymay jalpy jinalystyng ýzilisinde sinhrongha shyqty. Ony sol kýiinde eldegi onshaqty telearnasy birinen song biri alma-kezek kórsetip shyqty. Janadan kelip týsken zang jobasy boyynsha aitqan pikiri men әleumettik mәseleler jóninde ýkimetke joldaghan saualy ainalasy eki aptanyng ishinde efir arqyly birneshe ret berilip jiberdi.

Osydan keyin jaghday jaghymdy jaghyna qaray birtindep ózgere bastady. Álgi ózderinshe kerdeng qaghyp, bergen sәlemin almay bes qap bolyp jýretin әriptesteri bas iyzeytin boldy. Keybiri ernin jybyrlatyp, «sә...» degendey bir óshkindeu bolsa da әlde bir dybys shygharyp, úsynghan qolyna sausaghynyng úshyn tiygizip qoyady. Kezdese qalghanda spiykerding ózi kýlimsirep qaraytyny, kóniline quanysh úyalatady.

Birneshe qoghamdyq birlestik ony ózderining dóngelek ýstelderi men konferensiyalaryna shaqyryp, qúrmetti meyman etti. Olardyng jiyndarynda kósilip úzaq sóileuine mýmkindik asa zor kórindi. Onday oqighalardyng bәri de baspasózding nazarynan tys qalmaydy eken. Gazet betterinen, efir janalyqtarynan deputat osylaysha oryn tauyp jatty. Ózi de әjeptәuir marqayyp, kónili ósip, jadyrap qaldy. Álgi oblysta túratyn baldyzy:

-O, jezdeke! Bәrekeldi, jarap túrsyn. Naghyz sayasy qayratkerge ainaldyn! – dep, birde maqtauyn asyryp, kónilin kóterip tastady.

Jaqynda ataghy darday bir mekemening mereytoyy dýrildep túryp ótti. Oghan shaqyru bergen mekeme basshysy atalmysh is sharany belgili telearna týgeldey týsirip, keyin jarty saghattyq arnayy baghdarlama jasalyp, efir arqyly kórsetiletinin eskertti.

«Qoragha kelgen tóbelesten qúr qalma» demekshi, múnday mýmkindikti bos jibermeudi aldyn ala oilastyrghan deputat baryn kiyip, sóileytin sózin ainanyng aldyna túryp alyp dayyndalyp alghan song saqaday say kýiinde jetip bardy.

Mekeme basshysynyng qysqa ghana sózimen is shara ashyldy da, dýrkirep jalghasyp ketti. Shaqyrylghan qonaqtar da ónsheng «sen túr, men atayyn» deytindey-aq, kileng marqasqalar eken. Mәjilisting bildey bir deputaty bolghan song ol da jay bir qarataban bireu emes qoy. Tórdegi bas alqanyng qatarynda qasqayyp otyra ketti. Arnayy baghdarlama jasalatyny ras bolsa kerek, eki birdey teleoperator jantalasa týsirip, jurnalist pen rejisser de eki iyghynan dem alyp, zyr jýgirip jýr.

Sóz kezegi tiygende, bizding deputat tizgin-shylbyrdy jiberip, kósile úzaq sóiledi. Reglamentpen shektemeytin, orta joldan sózin bólmeytin jerde ayanyp qalsyn ba, biraz shapty dersin. Jinalghan júrttyng әlsin-әlsin qol soghyp, oghan sózin qysqartudy, tipti, toqtatudy menzep otyrghanyn ol qaydan bilsin. Sózim túshymdy bolyp, júrt razy bolyp otyr dep oilap, qyza shabatyn qazan attay toqtausyz tarta berdi. Aqyry, du qol shapalaqpen sózin ayaqtap ornyna jayghasty.

Qos teleoperatordyng eki jaqtan alma kezek toqtausyz týsirip jatqanyn kórip, baghdarlamanyng kem degende teng jarty uaqyty óziniki bolatynyna bek senimdi boldy. Odan keyin de kóp adam sóiledi. Olargha júrttyng qol soghyp әuirege týspegenine qaraghanda asa tartymdy bola qoymaghan shyghar dep, bizding deputat topshylap qoydy.

Is shara sonynda sol baghdarlamanyng efirge shyghatyn merzimin saghat, minutyna sheyin tilshi men rejisserden pysyqtap súrap aldy. Kýntizbesin ashyp qarasa, kelesi aidyng basyndaghy aptanyng sony senbige kelip túr eken. Dәl osy kýnning uaqytyna sәikestirip, ol barlyq tuys-tughandaryn ýiine qonaqqa shaqyrudy әieline tapsyrdy.

-Nening qúrmetine? – dep, әieli tandana súraq qoydy.

-Deputattyng ýiin kórsin. Sol kýni men teledidardan úzaq uaqyt sóz sóileymin. Men qayratkerligime kóz jetkizsin, osy quanyshymyzdy tuystarymyzben bóliseyik, bәrimiz birge arqa-jarqa bolyp otyryp kóreyik, onasha qaraghannan góri әlde qayda kónildi ghoy.

Áyeli dereu alys-jaqyndaghy tuystaryna habar berip ýlgerdi. Al, deputat mejeli kýndi taghatsyzdana kýtti.

Bir kýni kezekti jinalys zalynan shyghyp kele jatyr edi. Anandaytyn jerde әlgi parlamenttik jurnalist jigitting túrghanyn kórip qaldy. Jýrisin bayaulatyp, qasyna kelgende basyn iyzep amandasty. Ol da sәlemdesti. Biraq, qasynan ótip ketip, artynda kele jatqan ózge bir deputatty qolqalap ala jóneldi. «Ana joly uaqytym bolmaghan edi, endi, súhbat beruime bolady» dep aitqysy kelgen. Alayda, ol jigit te qyrsyqqan pәle eken. Jolamay qoydy.

Kómekshisining aitqany shyn eken. Deputattarmen jýrgizgen súhbattaryn, taldau maqalalaryn jii oqyp jýr. Jazuda qamshy saldyrmaytyn-aq jigit eken. Aqysyn berip, óz atynan bir kitap ta jazdyrmaq oy tudy. Alayda, sóilesuge de qúlqy joq adammen qalay til tabysarsyn.

«Tughan ay – turalghan ettey» demekshi, sóitip jýrgende әlgi bir tele baghdarlamanyng da efirge shyghatyn kýni kelip jetti. Qonaqtardyng uaqytynan bir minut ta keshikpey keluin әieline tapsyrghandyghynyng arqasynda tuystary ýzdik-sozdyq bolmay bir sәtte jinala qaldy. Qonaqtardyng basy bolyp, qayynatasy men enesi esikten kirdi. Aman-sәlemnen keyin enesi:

-Kýieubalanyng kinosy kórsetiledi degen song auyldaghy mal-súldy kórshige tapsyryp, shal ekeuimiz beri qaray tartyp kettik – dep, sambyrlap otyr.

-Kino emes, apa! Tele baghdarlama ghana ghoy. Men jay sóz sóileymin. Bastysy, ol emes. Sizderdi saghyndyq. Kelip ýiden dәm tatsyn degenimiz – dep, deputat juyp-shayghan bolyp qoyady.

-Auylda teledidar qaraugha múrsha bola bermeydi. Kelin keyde jylan shaghyp alghanday oibay salatyny bar, As-su әzirlep jýredi de, syrtqy esikten basyn qyltityp alyp: «Áne, teledidardan jezde aghany kórsetip jatyr!» dep aighaylaydy. Shal ekeuimiz daladan jýgirip jetkenshe bitip qala beredi, әlgi qúrghyry. Osy joly bir jaylanyp otyryp kóreyik – dep, enesi ózgelerdi teleekrangha shaqyrghanday әngimelep qoyady.

-Jezdeyge qozghau salghan men edim. Deputat bolghan song sayasy qayratkerge ainalu kerek qoy. Teledidardan jii kórinbesen, gazetterge súhbat bermesen, qazir júrt syilamaydy. «Qolbala deputat», «úiqyshy deputat», «Ýndemes deputat», «Lәppayshyl deputat» dep neshe týrli at qoyyp, aidar taghyp tastaydy. Ótkir mәselelerdi batyl kóteru kerek – dep, kórshi oblystan kelgen ýlken baldyzy bilgirsip qoyady.

-Agham bala kezinde-aq sayasatker bolatyny bilinip túratyn. Múghalimderding bәri onyng belsendiligin aityp maqtaytyn – dep, qaryndasy da qalysatyn týri joq.

-Artymnan ergen jalghyz inim ghoy. Deputat bolatynyn osydan eki jyl búryn bilgen edim. Bir kýni týsimde inim biyik taudyng basyna shyghyp túr eken. Kóp júrt taudyng eteginde oghan qarap túrghanyn anyq kórdim. Erteninde meshitke baryp, týs sadaqa berip, deputat boluyn qúdaydan tiledim. Sol tilegim mine, qabyl boldy – dep, deputattyng birge tuysqan әpkesi maqtanyp otyr.

-Jiyenim janadan tәi-tәy basyp jýrgende kórshi ýige bir deputat kelgen edi. Men әdeyilep kóterip baryp әlgi kisige: «Myna úldyng auzyna týkirinizshi, sizdey deputat bolsyn» dep aittym. Ol kisi de myng bolghyr jaqsy adam eken, dereu aitqanymdy eki etpey auzyna ýsh ret týkirdi. Sosyn, әpkem men jezdeme kelip aittym «myna úldaryng keyin deputat bolady». Mine, sol aitqanym keldi. Qayran әpkem men jezdem osy kýndi kórmese de, qabir ishinde bir aunap týsken shyghar – dep, naghashy apasy kózine jas aldy.

Ángime úzaqqa sozyla bastaghanda, telehabardyng shyghatyn uaqyty kelip jetkendikten bәri kýrt doghardy da, ekrangha kóz tikti. Belgili mekemening mereytoyyna arnalghan saltanatty jiynnyng kórinisteri shygha bastaghanda balalar jaghy shulasa ketti:

-Áne, otyr!

-Mine, kórsetti!

Deputattyng tórde otyrghan beynesin tilshi mәtini arasynda jәne mekeme basshysynyng sózi jýrip jatqanda birneshe ret iri planda kórsetip qoydy. Bir-eki ardager sóz sóiley bastaghanda deputat:

-Myna kisiden keyin mening sózim beriluge tiyis – dep eskertip qoydy.

Otyrghandar dybys túrmaq demderining ózin shygharmay ishterine tarta otyryp asygha kýtti. Biraq, әlgi ardagerden keyin basqa bir adam sóilep ketti.

-Búl qalay bolghany? Myna kisi menen keyin sóilegen sekildi edi ghoy? – dep, deputat tandana ýn qatty.

-Úmytyp qalghansyng ghoy. Senen búryn sóilegen shyghar.

-Osydan keyin sen shyghatyn bolarsyn.

-Televiziyadaghy sóz sóilegenderding retin auystyra beredi. Búlar montaj jasaydy ghoy – ýlken baldyzy taghy da bilgirsip qoyady.

Arasynda, deputatty birneshe ret kórsetip qoydy. Biraq, onyng sóilegen sózin bermegen kýii baghdarlama ayaqtalyp ketti. Endi, deputattyng ózinen búryn ózgeler ynghaysyzdana bastady.

-Jinalysta otyrghanyng sol qalpynda jaqsy kórsetildi – dep, qayyn atasy esh riyasyz pikir bildirdi de:

-Qazirgi zaman keremet qoy. Ýiinde otyryp-aq keshe qatysqan oqighany kóre beresin. Áy, ókimet-ay!

-Teledidardy sóndirmey túra túryndar! Jalghasy bar shyghar – dep, naghashy apasy bәiek bolyp otyr.

-Tehnika bolghan song birdemesi bolmay qalghan shyghar. Onday-onday hannyng qyzynda da bolady degen sóz bar. Qane, deputattyng densaulyghy ýshin alyp qoyayyq! – dep, ýlken baldyzy әngimeni basqa jaqqa búryp, otyrystyn  kórigin qyzdyryp әketti...

Quandyq Shamahayúly

Abai.kz