Düysenbi, 23 Qırküyek 2019
Osı ğoy endi... 1497 5 pikir 7 Mausım, 2019 sağat 13:27

Membyudjettiñ 138 milliard teñgesi tiimsiz jwmsalğan

«Janı aşımastıñ qasında basıñ auırmasın» degen söz bar. Byudjet qarjısın qalay-bolsa solay paydalanatın keybir jauaptı şeneunikter turalı solay demeske şara joq.

Bügin Senatqa kelip 2018  jılğı respublikalıq byudjettiñ atqarıluı turalı esep bergen Ükimeti pen Esep komitetiniñ esep-qisabındağı keybir qisınsız twstar senatorlardıñ sınına ilikti. Senat deputatı Älimjan Qwrtaev Esep Komitetiniñ derekterine süyene otırıp,  2018 jılı jarımjan byudjettik şeşimderdiñ kesirinen 138 milliard teñgeniñ tiimsiz jwmsalğanın, onıñ işinde 26 milliard teñge qarjılıq bwzuşılıqtarğa soqqanın aşıq ayttı. Senator eñ aldımen jekeşelendirudiñ Keşendi Josparın iske asıru ayasında kvazimemlekettik salanıñ jalpı işki önimdegi ülesi azayıp bara jatqanın ayta kelip, bwdan basqa, esep Komitetiniñ mälimetine säykes, kvazimemlekettik sala sub'ektileriniñ tiimdiliginiñ tömendigi bayqalatının, bwl osı salanıñ jalpı taza kirisi 2018 jılı 18 payızğa ğana ösip, al şığıstarı 5 esege artqanın atap ayttı.

«Bügingi küni, kvazimemlekettik sala sub'ektileri qızmetindegi nätijeniñ jetkiliksizdiginen byudjetke divindentterdiñ tüsimi dwrıs qamtamasız etilmey otır. Osılayşa, soñğı 4 jılda divindentterdiñ jäne taza kiris tölemderiniñ kölemderi 2 esege juıq qısqardı. Al jıldan jılğa osı salağa memlekettik byudjetten kölemdi mölşerde qarjılar bölinip keledi.

Qazir bizge ekonomikadağı kvazimemlekettik salanıñ röli men naqtı qatısu parametrlerin anıqtau qajet. Ükimetke kvazimemlekettik sala sub'ektilerine berilip otırğan resurstardı wtımdı paydalanu jäne olardı tiimdi basqaruğa qızıqtıru maqsatında tiisti şaralardı äzirleui  jön»,- dedi senator.

Ä.Qwrtaev byudjet qarajatın tiimsiz paydalanu jäne byudjet bağdarlamalarındağı kemşilikterdiñ jıl sayın qaytalanuınıñ sebebi onı jibergen basşılardıñ tiisti jauapkerşiliginiñ bolmauında jatqanın, yağni, kinäliler tek tärtiptik jauapkerşilikke tartılatınında ekenin aşıq ayttı

Sondıqtan bwnday keleñsizdik jıl sayın qaytalanbauı üşin qoldanıstağı zañnamağa qarjılıq bwzuşılıqtar üşin, sonday-aq memlekettik aktivterdi jäne byudjettik qarajattardı tiimsiz josparlau jäne tiimsiz paydalanu üşin lauazımdı twlğalardıñ jauapkerşiligi men tartatın jazasın küşeytudi wsındı.

Sonday-aq senator Industrialdı üy qwrılıs kombinattarı boyınşa naqtı bağdarlama kerektigin alğa tarttı .

«Qazirgi uaqıtta, Qazaqstanda zamanaui tehnologiyalarmen tolıq cikldı 16 zauıt bar. Olar tek 30-40% jüktelgen. Tolıq kölemde jwmıs istemeudiñ nätijesinde öndiris kölemi tömendeydi, twrğın üydıñ özindik qwnı köbeyedi, nesielerdi uaqtılı töley almau, jwmısşılardıñ qısqartıluı jäne tağı da basqalarorın aladı.

Ükimetke ärbir öñirge qwrılıstıñ industrialdı üy qwrılıs kombinattarın öndiriske tarta otırıp, 5 jıldıq jospar äzirleu mümkindigin qarastıru kerek. Bwl industrialdı üy qwrılıs kombinattarın qajetti jwmıs kölemimen qamtamasız ete otırıp, twrğın-üydi paydalanuğa beru men qoljetimdi twrğın-üy bağasınıñ tömendeuine jol aşadı» ,- dedi senator.

Bwdan bölek senator qazirgi uaqıtta ärbir qazaqstandıqqa jaña säbilerdi qosa eseptegende 330 mıñ teñge qarızdan keletinin,  bankterge halıqtıñ qarızı olardıñ jalaqılarınan köri 4 ese tez ösip bara jatqanın atap ötip, elimizdiñ ekonomikasın damıtu üşin bankter orta jäne şağın biznesti köbirek nesielendirui qajet ekenin, alayda bizde şağın biznesti nesielendiru 18 payızdan ğana keletinin sınğa aldı.

Osı jäne bwdan da basqa birşama sın pikir aytqan senator Ä. Qwrtaev Ükimet joğarıda atalğan ürdisterdi tüzetu boyınşa auqımdı şaralar qabıldap jäne aytılğan wsınıstardı nazarğa aluı kerektigin eskertti.

Ädilbek Qaba

Abai.kz

 

5 pikir