Särsenbi, 17 Şilde 2019
979 5 pikir 17 Mausım, 2019 sağat 19:44

Toqaev narazılıq şerulerine rwqsat beriletinin ayttı

Qazaqstanda azamattardıñ köşege şığıp, narazılığın bildiruge rwqsat beretin arnayı zañ qabıldanadı. Bwl turalı memleket basşısı Qasım-Jomart Toqaev Euronews basılımına bergen swqbatında ayttı.

Toqaev köşedegi zañsız mitingter men akciyalardıñ barlığına tosqauıl qoyılatının atap ötti. Biraq, onıñ aytuınşa, zañ äzirlenip, qazaqstandıqtarğa köşege şığıp, öz pikirin bildiruge rwqsat etiledi.

"Bas prokuratura köşelerdegi şerulerdiñ zañsızdığı turalı talay märte eskertti. Zañsız miting, tärtipsizdik mwnday akciyalarğa qatısqısı kelmeytin adamdarğa da kedergi keltiredi emes pe. Sondıqtan zañ äzirlenedi. Narazılıq şeruine şığıp, öz pikirin aytqısı keletinder tiisti instanciyağa jüginedi. Ol adamdarğa jinalıp, oy-pikirlerin bildiru üşin arnayı orın bölinedi", - dedi prezident.

Al prezident saylauı küni jäne odan keyingi zañsız mitingter kezinde wstalğandarmen bas prokuratura aynalısıp jatır.

"Eger olardıñ arasında qoğamdıq qauipsizdikke aytarlıqtay ziyan keltirmegen adamdar bolsa, olar tayau arada bosatıladı, ärine. Mağan olardıñ arasında kezdeysoq wstalğandar da bolğanın habarladı. Biz olardı tez arada bosatamız. Bwl mäsele şeşiledi", - dep sendirdi Toqaev.

Memleket basşısı kezekten tıs prezident saylauın ötkizu kezinde keybir uçaskelerde zañ bwzılğan boluı mümkin ekenin ayttı. Biraq, onıñ pikirinşe, saylau jalpı alğanda aşıq äri ädil ötken.

"Aşıq saylau ötkizuge barlıq jağday jasaldı. Keybir uçaskelerde zañ bwzuşılıqtar bolğan boluı mümkin. Biz tolıq taldau jürgizemiz, ärine, eger rastalıp jatsa, wyımdastıruşılıq şaraları qolğa alınadı", - dedi ol.

Al saylau ädil ötken joq dep qana aytqandar, prezidenttiñ aytuınşa, bosatıladı.

"Ärine, olar bosatıladı, sebebi bwl olardıñ pikiri. Al men, mäselen, saylau, jalpı alğanda, ädil boldı dep sanaymın, bar bolğanı osı", - dedi memleket basşısı.

Toqaev bilik pen halıq arasındağı dialogtı jolğa qoyu qajet dep sanaydı. Bwl üşin onıñ tapsırmasımen qoğamdıq senim komiteti qwrıldı.

"Adamdar köşege narazılıqtarın bildirip şıqtı. Qazir olardıñ talaptarına taldau jürgizilip jatır, negizinen bwl äleumettik sipattağı talaptar. Meniñ mindetim – osı talaptardı saralap, zerttep-zerdeleu. Köşege şıqqan adamdardıñ neni qalaytının biluimiz kerek", - dedi prezident.

Toqaev öz sayasatında jastardı bilikke tartuğa jäne memlekettik mañızdağı mäselelerdi şeşuge basımdıq beretinin qadap ayttı.

Abai.kz

5 pikir