Jeksenbi, 25 Tamız 2019
Ädebiet 2095 15 pikir 26 Şilde, 2019 sağat 13:01

Öskemende Wlıqbek Esdäulettiñ 65 jıldıq mereytoyı ötti

Şığıs Qazaqstan oblıs ortalığı Öskemen qalasında aqın, jurnalist Wlıqbek Esdäulettiñ 65 jıldıq mereytoyına oray «Altın wyam – Altayım» attı şığarmaşılıq keşi pen aqın oqırmandarımen kezdesu ötti.

«Qwrmet» ordeniniñ iegeri, «Qazaqstannıñ eñbek siñirgen qayratkeri» Wlıqbek Esdaulet tuğan jerine kelip, oqırmandarı men tvorçestvolıq qauımğa ädemi, mäni men mazmwnı tereñ keş sıyladı.

–  Ärbir azamat tuğan jerine kelip, topırağın iiskep, halqın körgen kezde şabıt aladı. Biz de bügin elimizge kelip, sizdermen kezdesip otırmız. Osınday jılı kezdesu wyımdastırıp, ärdayım ädebiet pen mädenietke qoldau körsetip otırğan oblıs äkimi Danial Ahmetovqa rizaşılıq bildiremiz, – dedi aqın.

Oblıstıq drama teatrında ötken keşte aqınnıñ öleñderi oqılıp, änderi şırqaldı. Oblıs äkiminiñ orınbasarı Äsem Nüsipova sahna törinde oblıs basşılığı atınan aqındı mereytoyımen qwttıqtap, iığına şapan japtı.

– Qazaq poeziyasınıñ eñsesin biiktetip, wlttıq qadir-qasietin arttıruda özindik üles qosıp kele jatqan şoqtığı biik, körnekti aqınsız. Sizdiñ öleñderiñiz zaman ağımına say jazılıp, oqırmanına jol tartuda. Ärdayım şabıtıñız talmay, äli talay şığarmaşılıq eñbekteriñizdiñ kuäsi bolayıq, – dedi Äsem Bekqızı qwttıqtau sözinde.

Sonımen qatar, A.S. Puşkin atındağı oblıstıq kitaphanada Wlıqbek Esdäuletpen «Jırlarım – jüregimniñ jılnaması» attı kezdesu ötti. Kezdesu barısında barşa jırsüyer qauım men şığarmaşılıqqa jaqın jandar aqınğa Jazuşılar Odağına qatıstı kökeyde jürgen saualdarın qoyıp, avtordıñ aldağı josparlarımen tanısıp, erkin swhbattasa aldı.

Kezdesudi Qazaqstan Jazuşılar odağı Şığıs Qazaqstan oblıstıq filialınıñ törağası Älibek Qañtarbaev jürgizip, aqınnıñ jaqın dostarınıñ biri, belgili qoğam qayratkeri Tüsipbekov Tüsiphan Tüsipbekwlı, körnekti aqın Rayısova Baqıtjan Mwhtarhanqızı jäne mädeniet salasınıñ ökilderi jılı lebizderin arnaydı.

Kezdesu barısında avtordıñ «Zaman-ay» öleñi jaylı Roza Rımbaevanıñ beynejoldauı tamaşalandı. Sonday-aq, «Tamşı» şığarmaşılıq jastarınıñ orındauında aqınnıñ lirikalıq öleñderinen monolog oqılıp, barşa qonaqtar avtordıñ jalındı da imandılıqqa tolı jırların öz auzınan tıñdap, «Wlar ündi Wlıqbek» attı kitap körmesin tamaşaladı.

W. Esdäulettiñ eldik, wlttıq, adamgerşilik müddelerge qızmet etetin parasattılığın körsetetin  öleñderi bir töbe. Semey poligonınıñ qasiretine arnalğan «Zaman-ay» öleñi halıqaralıq antiyadrolıq qozğalıstıñ gimnine aynalğan. Qoğamnıñ aşı şındığın körsetetin «Qara pima» poeması zamanımızdıñ ayıqpas auruın söz etip, köpşilikke oy tastaytın, tura joldan adastırmas imandılıq aynası deuge boladı.

Qalamgerdiñ öleñderi bolgar, ağılşın, türik, hindi, qırğız, ukrain, belorus, latış jäne t.b. tilderge audarılğan. Orıs tilinde «Perevalı Altaya» (1988), «Ahillesova pyata» (2002) öleñder men poemalar jinağı, qıtay tilinde «Zaman-ay» (2005), qırğız tilinde «Jüregim – mahabbattıñ astanası» (2011) jır jinaqtarı jarıq körgen. Sonday-aq, W. Esdäuletov A. Blok, N. Rubcov, O. Rifat, A. Rısqwlov, B. Şinkub, P. Movçan, S. Mukkerdji jäne özge de şetel aqındarınıñ öleñderin qazaqşa söyletken.

Äsem Jılqışeva

Abai.kz

15 pikir