شىعىس قازاقستان وبلىس ورتالىعى وسكەمەن قالاسىندا اقىن، جۋرناليست ۇلىقبەك ەسداۋلەتتىڭ 65 جىلدىق مەرەيتويىنا وراي «التىن ۇيام – التايىم» اتتى شىعارماشىلىق كەشى پەن اقىن وقىرماندارىمەن كەزدەسۋ ءوتتى.

«قۇرمەت» وردەنىنىڭ يەگەرى، «قازاقستاننىڭ ەڭبەك سىڭىرگەن قايراتكەرى» ۇلىقبەك ەسداۋلەت تۋعان جەرىنە كەلىپ، وقىرماندارى مەن تۆورچەستۆولىق قاۋىمعا ادەمى، ءمانى مەن مازمۇنى تەرەڭ كەش سىيلادى.

–  اربىر ازامات تۋعان جەرىنە كەلىپ، توپىراعىن يىسكەپ، حالقىن كورگەن كەزدە شابىت الادى. ءبىز دە بۇگىن ەلىمىزگە كەلىپ، سىزدەرمەن كەزدەسىپ وتىرمىز. وسىنداي جىلى كەزدەسۋ ۇيىمداستىرىپ، ءاردايىم ادەبيەت پەن مادەنيەتكە قولداۋ كورسەتىپ وتىرعان وبلىس اكىمى دانيال احمەتوۆقا ريزاشىلىق بىلدىرەمىز، – دەدى اقىن.

وبلىستىق دراما تەاترىندا وتكەن كەشتە اقىننىڭ ولەڭدەرى وقىلىپ، اندەرى شىرقالدى. وبلىس اكىمىنىڭ ورىنباسارى اسەم ءنۇسىپوۆا ساحنا تورىندە وبلىس باسشىلىعى اتىنان اقىندى مەرەيتويىمەن قۇتتىقتاپ، يىعىنا شاپان جاپتى.

– قازاق پوەزياسىنىڭ ەڭسەسىن بيىكتەتىپ، ۇلتتىق قادىر-قاسيەتىن ارتتىرۋدا وزىندىك ۇلەس قوسىپ كەلە جاتقان شوقتىعى بيىك، كورنەكتى اقىنسىز. ءسىزدىڭ ولەڭدەرىڭىز زامان اعىمىنا ساي جازىلىپ، وقىرمانىنا جول تارتۋدا. ءاردايىم شابىتىڭىز تالماي، ءالى تالاي شىعارماشىلىق ەڭبەكتەرىڭىزدىڭ كۋاسى بولايىق، – دەدى اسەم بەكقىزى قۇتتىقتاۋ سوزىندە.

سونىمەن قاتار، ا.س. پۋشكين اتىنداعى وبلىستىق كىتاپحانادا ۇلىقبەك ەسداۋلەتپەن «جىرلارىم – جۇرەگىمنىڭ جىلناماسى» اتتى كەزدەسۋ ءوتتى. كەزدەسۋ بارىسىندا بارشا جىرسۇيەر قاۋىم مەن شىعارماشىلىققا جاقىن جاندار اقىنعا جازۋشىلار وداعىنا قاتىستى كوكەيدە جۇرگەن ساۋالدارىن قويىپ، اۆتوردىڭ الداعى جوسپارلارىمەن تانىسىپ، ەركىن سۇحباتتاسا الدى.

كەزدەسۋدى قازاقستان جازۋشىلار وداعى شىعىس قازاقستان وبلىستىق فيليالىنىڭ توراعاسى الىبەك قاڭتارباەۆ جۇرگىزىپ، اقىننىڭ جاقىن دوستارىنىڭ ءبىرى، بەلگىلى قوعام قايراتكەرى تۇسىپبەكوۆ ءتۇسىپحان تۇسىپبەكۇلى، كورنەكتى اقىن رايىسوۆا باقىتجان مۇحتارحانقىزى جانە مادەنيەت سالاسىنىڭ وكىلدەرى جىلى لەبىزدەرىن ارنايدى.

كەزدەسۋ بارىسىندا اۆتوردىڭ «زامان-اي» ولەڭى جايلى روزا رىمباەۆانىڭ بەينەجولداۋى تاماشالاندى. سونداي-اق، «تامشى» شىعارماشىلىق جاستارىنىڭ ورىنداۋىندا اقىننىڭ ليريكالىق ولەڭدەرىنەن مونولوگ وقىلىپ، بارشا قوناقتار اۆتوردىڭ جالىندى دا يماندىلىققا تولى جىرلارىن ءوز اۋزىنان تىڭداپ، «ۇلار ءۇندى ۇلىقبەك» اتتى كىتاپ كورمەسىن تاماشالادى.

ۇ. ەسداۋلەتتىڭ ەلدىك، ۇلتتىق، ادامگەرشىلىك مۇددەلەرگە قىزمەت ەتەتىن پاراساتتىلىعىن كورسەتەتىن  ولەڭدەرى ءبىر توبە. سەمەي پوليگونىنىڭ قاسىرەتىنە ارنالعان «زامان-اي» ولەڭi حالىقارالىق انتيادرولىق قوزعالىستىڭ گيمنiنە اينالعان. قوعامنىڭ اششى شىندىعىن كورسەتەتىن «قارا پيما» پوەماسى زامانىمىزدىڭ ايىقپاس اۋرۋىن ءسوز ەتىپ، كوپشىلىككە وي تاستايتىن، تۋرا جولدان اداستىرماس يماندىلىق ايناسى دەۋگە بولادى.

قالامگەردىڭ ولەڭدەرى بولگار، اعىلشىن، تۇرىك، حيندي، قىرعىز، ۋكراين، بەلورۋس، لاتىش جانە ت.ب. تىلدەرگە اۋدارىلعان. ورىس تىلىندە «پەرەۆالى التايا» (1988), «احيللەسوۆا پياتا» (2002) ولەڭدەر مەن پوەمالار جيناعى، قىتاي تىلىندە «زامان-اي» (2005), قىرعىز تىلىندە «جۇرەگىم – ماحابباتتىڭ استاناسى» (2011) جىر جيناقتارى جارىق كورگەن. سونداي-اق، ۇ. ەسداۋلەتوۆ ا. بلوك، ن. رۋبتسوۆ، و. ريفات، ا. رىسقۇلوۆ، ب. شينكۋب، پ. موۆچان، س. مۋككەردجي جانە وزگە دە شەتەل اقىندارىنىڭ ولەڭدەرىن قازاقشا سويلەتكەن.

اسەم جىلقىشەۆا

Abai.kz