Jwma, 6 Jeltoqsan 2019
Anıq 4552 10 pikir 10 Qırküyek, 2019 sağat 14:46

Wlı Dala silkindi. Wlı Qazaq oyana bastadı...

Bir şındıq bar, ol - XIX ğasırdıñ orta şeninen bastap Resey imperiyasınıñ basqınşılıq şabuılı kesirinen tuğan eli men jerinen ayrıla bastağan Wlı Dalanıñ Wlı qazağınıñ ne isterin bilmey, eseñgirey bastağandığı.

Jalğız ümiti - nağız jaujürek, elin-jerin jan-tänimen berile süygen, wlt köşbasşısı Kenesarı hannıñ wlt-azattıq soğısı bolatın. Sengen batırı jeñilis tapqan soñ erkindikti añsağan Qazaqtıñ twla boyın uayım-derti müldem meñdedi.

XX ğasırdıñ basında danışpan Mirjaqıp Dulatwlı:

- Köziñdi aş, oyan, qazaq, köter bastı,

Ötkizbey qarañğıda beker jastı.

Jer ketti, din naşarlap, hal haram bop,

Qazağım, endi jatu jaramas-tı, - dep «Oyan, Qazaq!» attı patriottıq öleñimen Wlı Dalağa jar saldı. Alayda Wlı Qazaq maujırap wyqığa ketken nauqastıñ keypine engendey edi.Qazirgi medicina tilimen jetkizer bolsaq, halıqtıñ köbi «komağa» tüse bastağan-dı.

Älqissa, orısı bar, ağılşını bar, basqaları da Wlı Dalada oyrandap, oylarına kelgenin istep jattı. Mirjaqıp Dulatwlı, Ahmet Baytwrsınov, Älihan Bökeyhanov, Mwstafa Şoqay, t.b. köptegen qazaq ziyalıları öz wltın qızğıştay qorğap, onıñ bolaşağı üşin ayanbastan küresip baqtı. Alayda qanişerler Lenin men Stalin orıs şovinizmin tu ğıp wstap, qazaq patriottarın qwrbandıqqa şaldırdı. Osı kezeñnen bastap jer-jahannıñ jartısınan astamın has äskeri şeberligimen jaulap alğan qaharman wlttıñ wrpağı tügelge derlik «komağa» tüskendey halde edi.

Kollektivtendiru, qoldan jasalğan aşarşılıq, repressiya tärizdi «ataña nälet» näubetterden soñ Alla Tağalla qazaqqa näsip etken jerdiñ astı men üstindegi san aluan baylıqtarın «qaraqşılar» süyekke talasqan qañğıbas itterdey ırıldasıp, talap ala bastadı...

Ökiniştisi sol, Wlı Qazaqqa jasalğan qastandıq joğarıdağı näubet ataulımen ayaqtalğan joq. Atap aytqanda:

- Qazaq jerine özge wlt ökilderin eriksiz qonıstandıru;

- Qazaq elinde deni sau azamat qaldırmay, tügelimen nemiske qarsı soğısqa aydap salu;

- Hirosimo men Nagasakidegi zwlmattan mıñ ese artıq atom bombasın qazaqtıñ qaq ortasında aşıq jarudı bastauı:

- repressiyanıñ Stalin ölgenge deyin jalğasuı;

- Kreml'diñ «tıñ jäne tıñayğan jerler» degen qwytırqı sayasattı oydan şığarıp, köptegen wlttıñ jüz mıñdağan adamın Resey şekarasına tayau ornalasqan ortalıq jäne soltüstik oblıstarğa qoyşa toğıtuı;

- orısta jer jetpegendey, Bayqoñırda ğarış aylağın aşuı;

- aqırında Qazaqstandağı orıs tektes wlttardıñ ökilderine «artıqşılıq» berip, jergilikti jwrttı Mäskeudiñ «aşsa alaqanında, jwmsa jwdırığında» wstap otıruı – bäri-bäri qastandıq emey nemene?! Jauızdıq emey nemene?!

Bizdiñşe, qazirgi Resey Federaciyasınıñ Prezidenti Vladimir Putin joğarıdağı qaskünem qılmıstar üşin Wlı Qazaq halqınan keşirim swrauğa tiis!

Aqiqatı sol: sönip qalğan janartaudıñ özi jüz jıldan soñ qayıra atqılaydı!

Allağa şükir, wyqıdağı Wlı Qazaq oyana bastadı.

Wlı Dala dür silkingendey. Dübir sezildi.

Wltımızdıñ joyılıp ketpey, aman qalğandığı üşin Alla Tağallağa mıñ da bir şükirşilik aytamız!

- Alıstan Alaş dese attanamın,

Qazaqtı qazaq dese maqtanamın.

Bolğanda äkem qazaq, şeşem qazaq –

Men nege qazaqtıqtan saqtanamın?! – dep Mirjaqıp Dulatwlı atamız aytqanday, jas wrpaqtıñ öz wltınıñ patriottarı bola alatındığına senemiz.

Aytbay Säulebek,

Qazaqstan Respublikası twñğış Prezidenti sıylığınıñ laureatı.

Abai.kz

10 pikir