Senbi, 19 Qazan 2019
Anıq 1046 5 pikir 4 Qazan, 2019 sağat 11:00

Mwğalimniñ märtebesi qaşan artadı? 

Büginde boy salıstıratın zaman emes, oy salıstıratın zaman keldi. Onı kün sayın özgerip jatqan jaña tehnologiya men jasandı intellekttiñ qarıştap damuınan da añğaruğa boladı. YAğni, qazirgi küni bäsekege qabiletti bolğıñ kelse, tek jas kezinde ğana emes, ömir boyı oqıp, bilimiñdi jetildirip otıru kerek. Täuelsizdik alıp, ayaqqa twra bastağan elimiz az ğana 30 jıldıñ işinde köbi jartı ğasırlap uaqıt ketiretin ülken qadamdar jasadı. Zamanaui astanasın salıp, «köşten qalmauğa» tırmısqan jap-jas el jaña tehnologiyanıñ sırın meñgerude de biraz jetistikke jetti. Bwğan dälel önertapqış talanttı jastarımızdıñ basın qosqan Astana Hub pen bükil memlekettik qızmetti üyden şıqpay-aq qoljetimdi etken E-Gov-tıñ özi jetkilikti bolar. Aytpaqşı, älem boyınşa 5G internetin qosatın 10 şaqtı eldiñ qatarında Qazaqstan da bar. Bwl qadam elimizdiñ tehnologiyalıq damuına tağı da orasan zor mümkindikter bereri anıq. Tayauda älemdegi eñ jüyrik internet jelisine eñ aldımen, respublikalıq mañızı bar Nwr-Swltan, Almatı jäne Şımkent qalaları qosıladı. 

Osınday tartıstı zamanda «öz degeniñdi boldırıp,bedeliñdi saqtap qalu üşin» bilimdi wrpaq qajet. Al, ol wrpaqtı qalıptastıratın eñ aldımen wstazdar qauımı. Halqımızdıñ wlı batırı Bauırjan Momışwlınıñ  «Wstazdıq - wlı qwrmet. Sebebi, wrpaqtardı wstaz tärbieleydi. Bolaşaqtıñ basşısın da, danasın da, ğalımın da, eñbekqor eginşisin de, kenşisin de wstaz ösiredi... Ömirge wrpaq bergen analardı qanday ardaqtasaq, sol wrpaqtı  tärbieleytin wstazdardı da sonday ardaqtauğa mindettimiz»,- degen sözderi  mwğalimniñ wlı qızmet atqarıp jürgenin körsetedi.  

Ökinişke oray, soñğı jıldarı wlı qızmetpen qosa wstazdarğa bitpeytin esep beru, är üydi aralap, neşe bala, qaysı oquğa, qaysı kolledjge baratının tirkep, saylauğa da, stadionğa da jügiretin, onıñ üstine balağa söylep qalsañ «basıñ dauğa wşıraytın» psihologiyalıq stress sındı qosımşa auır jük artılıp qoydı.  

«Bolaşaq - bilimdi jastar qolında» dep jii aytatın Elbası Nwrswltan Nazarbaev 2018 jılı Halıqqa joldağan Joldauında osı «jağımsız trendti» qattı sınğa alıp, şwğıl türde pedagog märtebesin ösiretin zañ qabıldaudı tapsırğan bolatın. 

«Kelesi jılı «Pedagogtardıñ märtebesi» turalı zañ äzirlep qabıldau qajet dep sanaymın. Ol mektepke deyingi wyımdar qızmetkerleri men mwğalimderdi ıntalandıratın şaralar qarastırıp, jüktemeni azaytuı tiis. Mwğalimderge barlığın üyip-tögedi: saylaudı da mwğalimder ötkizedi, ügit-nasihat ta solardıñ moynında, birdeñe isteu qajet bolsa, tağı mwğalimder. Bwl üşin olarğa eşkim aqşa tölemeydi, olardı artıq jwmıstan bosatu kerek, olar sabaqqa dayındaluı kerek»,- dedi N.Nazarbaev. 
Bwl bastamanı wstazdar da, halıq ta jılı qabıldap, birden qoğamdıq qızu talqılau bastalıp ketti. Deputattar da, wstazdar da öz oyların aşıq bildirip, nätijesinde zañnıñ jobası dayın boldı. 

192 bap, auqımdı 5 bağıttan twratın zañ jobasın 2019 jıldıñ tamızında Ükimet birauızdan bekitti. Qwjat materialdıq jäne materialdıq emes ıntalandıru, äleumettik kepildikter, wstazdardıñ qwqıqtarın keñeytu, mwğalimderdiñ jüktemesin azaytu sındı özekti mäselelerdi qamtidı. 

Onda qwjatqa kömilip, üydi aralap, adam men januarlardıñ esebin jürgizgen wstazdar barlıq qoğamdıq şaralardan bosatılatını aytılğan. Qwjatqa säykes, wstaz käsibi qızmetinen tıs jwmıstıñ bärinen arıladı. Öz qalauımen istese, oğan qosımşa aqı tölenedi. Al, mwğalimdi erkinen tıs jwmısqa tartqandarğa ayıppwl salınadı.

Ükimet bekitken zañ jobasın Parlament Mäjilisine alıp kirgen QR Bilim jäne ğılım ministri Ashat Aymağambetov zañ jobasında pedagogtardı artıq jwmısqa tartqanı üşin nemese artıq esep beruge mäjbürlegen jağdayda 20-dan 120 AEK-ke deyin ayıppwl qarastırılğanın ayttı. Sonımen qatar, osınday ayıppwl jwmıs uaqıtınıñ normasın zañsız asırğandar üşin de eskerilgen. 

«Bwl şaralar öziniñ ülken septigin tigizedi dep oylaymın. Mısalı, direktorlar, äkimdikter jäne basqa memlekettik organdarğa qatıstı. Büginde mektepke kimder kelmeydi? Tekseruşi organdar da az emes. Kerek emes ärtürli aqparat swrasa, mwğalimderdi jwmısına tän emes şaralarğa tartatın bolsa, onda tiisti jaza qoldanuğa mümkindik tudı. Zañ jobası qabıldanğannan keyin biraz jaqsı özgerister boladı dep sanaymın», - deydi bilim ministri. 

Deputattar talqılauına tüsken zañ jobası tağı tolıqtırıladı. Soñğı nüktesi jıl soñına deyin qoyılıp, jospar boyınşa zañ kelesi jıldan küşine enui tiis.   

«Pedagog märtebesi turalı» zañ jobası qoğamda eñ köp talqılanğan joba boldı. Nätijesinde qaytkenmen de mwğalimniñ abıroyı artatını anıq. Mağjan Jwmabaev aytpaqşı: «Qazaqtıñ tağdırı, keleşekte el boluı da mektebiniñ qanday negizde qwrıluına barıp tireledi. Mektebimizdi taza, berik häm öz janımızğa üylesetin negizde qwra bilsek, keleşegimiz üşin tayınbay-aq serttesuge boladı». 

Abai.kz

5 pikir