Jwma, 15 Qaraşa 2019
Dep jatır 1238 9 pikir 15 Qazan, 2019 sağat 14:40

Käribay Mwsırman: «Nwrlı köş» künin belgilesek...

QR Mäjilis deputatı Käribay Mwsırman mırza «Nwrlı köş» künin belgileu turalı wsınıs aytıp, «Egemen Qazaqstan» gäzetinde maqala basıptı.

Bwl turalı deputat Käribay Mwsırman mırza bügin öziniñ Facebook paraqşasında habarlap, qoğam talqısına salıptı. Deputattıñ jazbasın biz öz oqırmandarımızdıñ talqısına wsınğandı jön kördik.


Käribay Mwsırman:

«Nwrlı köş» künin belgilesek». Osınday taqırıp qoyılğan maqalam bügin «Egemen Qazaqstan» respublikalıq gazetinde jariyalandı.

Elbası Nwrswltan Nazarbaevtıñ tapsırmasımen 1991 jılğı 18 qaraşada Qazaq KSR Ministrler Keñesi «Basqa respublikalardan jäne şetelderden selolıq jerlerde jwmıs isteuge tilek bildiruşi bayırğı wlt adamdarın Qazaq KSR-inde qonıstandıru tärtibi men şarttarı turalı» №711 Qaulını qabıldağan bolatın.

Sodan keyin Twñğış Prezidentimiz 1991 jılğı 31 jeltoqsanda Qazaq radiosı arqılı «Alısta jürgen ağayındarğa aq tilek» ündeuin joldap: «Qandas bauırlarımızdı bayırğı ata qonısına tartu maqsatında adam qwqığı turalı elaralıq erejelerdi basşılıqqa ala otırıp, Qazaqstan Ükimeti «Basqa respublikalardan jäne şetelderden selolıq jerlerde jwmıs isteuge tilek bildiruşi bayırğı wlt adamdarın Qazaqstanda qonıstandıru tärtibi men şarttarı turalı» arnayı qaulı qabıldadı. Sondıqtan atamekenge kelemin deuşi ağayındarğa jol aşıq,»-dep mälimdegen edi.

Şet elderdegi qandastarımızdı atameken – Qazaqstanğa oraluğa şaqıru – el bolaşağın oylağan Elbasınıñ batıl da tarihi mañızı zor, dana şeşimi bolğandığı sözsiz. Sonıñ arqasında Täuelsizdik jıldarı tağdırdıñ jazuımen Moñğoliya, Qıtay, Türkiya, Iran, Auğanstan, Özbekstan, Resey, Täjikstan, Türkimenstan jäne basqa elderde twrıp jatqan 1 millionnan astam etnikalıq qazaq atajwrtqa qaytıp oralıp, jas memleketimizdi nığaytuğa ölşeusiz üles qostı. Halqımızdıñ qwramındağı qazaqtardıñ ülesi 40 payızdan 67 payızğa deyin ösip, memleket qwrauşı wltqa aynaldı.

Elbası «Täuelsizdik däuiri» kitabında: «Qazaqtardıñ atamekenine bet alğan tarihi köşin biz beyneli türde «Nwrlı köş» dep atadıq. Qazaqstan memlekettik repatriaciya sayasatın jalğastı jürgizgen älemdegi sanaulı elderdiñ birine aynaldı» dep jazdı.

Joğarıda bayandalğan jaylardıñ negizinde jäne qandastarımızdıñ ötinişterine oray «Qazaqstan Respublikasındağı merekeler turalı» Zañnıñ 4-babına («Käsibi jäne özge de merekeler») säykes Ükimet öz qaulısımen 18 qaraşanı «Nwrlı köş» küni dep belgileu mäselesin qarastırsa, igi bolar edi.

«Nwrlı köş» künin merekelik data retinde belgileu Elbasınıñ köşi-qon salasındağı el men jer tağdırı üşin mañızı zor bastamaların nasihattau jäne olardı däyekti jalğastıru isine oñ ıqpalın tigizedi dep oylaymın.

Osı merekelik datanı atap ötu ayasında etnikalıq qazaqtardı Qazaqstanğa repatriaciyalau tarihı, şet elderden köşip kelgen qandastarımızdıñ jäne jwmıs küşi artıq öñirlerdiñ twrğındarın jwmıs küşi tapşı öñirlerge qonıs audaru bağdarlaması men «Serpin» äleumettik jobasına qatısuşılardıñ elimizdiñ äleumettik-ekonomikalıq damuına qosqan ülesi, olardıñ jaña ortağa beyimdeluiniñ özekti mäseleleri, sonday-aq sırtqı jäne işki köşi-qon problemaları turalı ğılımi-praktikalıq konferenciyalar, «Döñgelek üstelder» jäne basqa merekelik is-şaralar ötkizu, sonıñ işinde eleuli jetistikterge qol jetkizgen qandastarımız ben qonıs audaruşılarğa qwrmet körsetu jön bolar edi.

Abai.kz

9 pikir