Нұр-Сұлтанда ауа-райының қолайсыздығына байланысты төтенше жағдай режимі жарияланды. Бұл туралы ҚР ІІМ өкілі мәлімдеді.

"Бізде Нұр-Сұлтан бойынша төтенше жағдай жарияланды. Ол әділет басқармасының тіркеуінен өтті, қазіргі уақытта алты өңірде ТЖ комиссияларының отырысы дайындалып жатыр. Бірінші кезекте Ақмола, Шығыс Қазақстан, Павлодар облыстары. Ол жерлерде елді мекендерге қатынау мүмкіндігінің қиындауына байланысты ТЖ жарияланады.

ТЖ жариялау себебі - өмір сүру мүмкіндіктерінің қиындауы, адамдарды тұрғылықты жеріне және жұмыс орнына дер кезінде жеткізу, сондай-ақ азық-түлікпен және медициналық қызметпен қамтамасыз ету мәселесі", - деді ішкі істер министрінің орынбасары Юрий Ильин.

Ал осыған дейін Нұр-Сұлтан қаласы әкімдігі мен құзырлы органдар қала тұрғындарына үндеу жариялаған. Нұр-Сұлтан қалалық Полиция департаментінің басшысы Ержан Сәденов, ТЖД басшысы Бауыржан Сыздықов және қала әкімінің орынбасары Алтынбек Қайсағалиев ЖОО-лар мен орта білім мекемелерінде сабақтар өтпейтінін хабарлаған. Ал бизнес-құрылымдар мен жекелегене ұйымдарға, мекемелерге жұмыс күнін қысқартуды, сондай-ақ қауіпсіздік үшін қоғамдық көліктермен жүруді, аса мұқтаждық болмаған жағдайда ешқайда шықпауды сұраған.

Abai.kz