Бұрынғы президентке қарсы қылмыстық іс ауыл шаруашылығы бағдарламасына сәйкес бөлінген қаржыны ұрлауға байланысты қозғалған. Саргсяннан басқа бұл іс бойынша төрт адам жауапқа тартылып жатыр. Олардың арасында ауыл шаруашылығы министрі Серго Карапетян да бар.
Сейсенбі күні Еревандағы Аван және Нор Норк аудандық соттарында процедуралық мәселелер талқыланды.
Серж Саргсян өзіне тағылған айыптарды мойындамайды. Ол бұл істің саяси астары бар деп біледі.
Арменияда екі мерзім қатарынан президент болған Саргсян 2018 жылы отставкаға кетті. Оның премьер-министр қызметінде қалу әрекеті халық наразылығын туғызып, соңында үкімет басына бұрынғы журналист Никол Пашинян сайланған.
2019 жылы желтоқсанда Саргсян коррупциялық схема құрды деп айыпталып, Армениядан шығуына тыйым салынған. 65 жастағы экс-президент кінәлі деп танылса, сегіз жылға дейін бас бостандығынан айырылуы мүмкін.
Abai.kz
