Қазақстандық аккредитациялық агенттік Орталық Азия университеті, Ақтау гуманитарлы-техникалық университеті және "Астана" университетінің аккредитация куәлігін кері қайтарып алды. Заңға сәйкес лицензиясы мен аккредитациясы жоқ университеттер диплом бере алмайды. 

Білім және ғылыми министрлігінің ақпаратынша, аккредитациялық орталық өзінің шешімі жайлы Ақтау гуманитарлы-техникалық университеті мен "Астана" университетін ескерткен.

"Біздің ұйымымыз оқу орындарын аккредитациялаумен айналысады, яғни біз оқу орындарының оқыту бағдарламасының талапқа сайлығын тексереміз. Аталмыш оқу орындары біздің постаккредитациялық мониторинг жүргізуімізге қарсы болып, ғимараттарына кіргізбеді. Сондықтан да біз акрредитациялық куәлікті кері қайтару туралы шешім шығардық" , – деді "Қазақстандық тәуелсіз аккредитациялау орталығының" директоры Бегалы Қалмұратов.

Бұл оқу орындары Білім және ғылым министрлігі тарапынан да жүргізілетін жоспарлы тексеруге қарсылық білдірген еді. Оқу орындарына қатысты сот ісі жалғасып келеді.

Abai.kz