Израиль кейінгі 50 жылда алғаш рет соғыс жағдайына көшкенін ресми түрде жариялады.
БҰҰ-ның есебі бойынша, Израильдің қарымта шабуылдарынан Газа секторында кемінде 790 үй қирап, тағы 5 мыңнан астамы бүлінген. Инфрақұрылым бұзылғандықтан 400 мыңға жуық адам сусыз қалған, кәріз желісі істен шыққан.
Дүйсенбі күні Израиль Газа секторын толық құрсауға алатынын жариялап, электр қуаты мен судан ажыратқан. Израиль қорғаныс армиясы сенбі күні ел аумағына ХАМАС радикал тобының қарулы адамдары тұтқиылдан жасаған шабуылға қарымта ретінде Газа секторын соққының астына алды. Израильдіктер сенбіде болған шабуылды 2001 жылғы 11 қыркүйекте АҚШ-қа қарсы жасалған террорлық шабуылға теңейді.
АҚШ президенті Джо Байден сейсенбі күні Израиль премьері Биньямин Нетаньяхумен телефон арқылы сөйлесіп, Вашингтонның Израильді қолдайтынын жеткізген.
Ресей президенті Владимир Путин сейсенбі күні Израильдегі жағдайға пікір білдіп, жағдайдың ушығуына АҚШ-ты кінәлаған. Путиннің сөзінше, АҚШ палестина-израиль жанжалында өзінің мүддесіне жұмыс істеді деген. Ол ХАМАС тобын шабуылы үшін айыптамады.
Abai.kz
