Ұлы қазақ ақыны, ағартушы және ойшыл Абай Құнанбайұлының 180 жылдығын атап өту аясында Қарағанды облысы «Адамзаттың Абайы» атты республикалық онлайн-челленджге белсенді қатысты.

Аймақтағы челленджді алғашқылардың бірі болып белгілі ақын, журналист, Халықаралық «Алаш» әдеби сыйлығының лауреаты Бағдат Мүбәрак бастады. Өз сөзінде ол Абай мұрасының тек мәдени қазына ғана емес, сонымен қатар моральдық бағдар екенін атап өтті.

«Абайдың сөздері ғасырлар бойы жаңғырып, адамдардың білімге, адалдық пен ар-ожданға ұмтылысын оятады», – деп, ұлы ойшылдың поэтикалық мұрасын қазіргі заман тұрғысынан зерделеудің маңыздылығын ерекше атап өтті.

Республикалық акция үлкен қолдау тапты, онлайн-челленджге 1000-нан астам адам қатысты. Олардың қатарында оқушылар мен студенттер, педагогтар, ғалымдар, мәдениет пен спорт қайраткерлері, жастар бірлестіктерінің өкілдері және өңірдің белсенді тұрғындары бар.

Челленджге қатысушы – Н. Нұрмақов атындағы облыстық мамандандырылған мектеп-интернатының 11-сынып оқушысы Жақсыбаева Әлия Бауыржанқызы. Әлияның айтуынша, ол бала кезінен Абай поэзиясына қызығады, ал челленджге қатысу ұлы ақынның шығармашылығына деген сүйіспеншілігін білдіруге мүмкіндік берді: «Абай Құнанбайұлының шығармалары әрдайым өзектілігін жоғалтпайды. Жастардың көбірек осы мұрамен танысып, сусындағанын қалаймын – себебі онда терең даналық, адамгершілік және Отанға деген махаббат жатыр».

Қатысушылар «Қара сөздерден» үзінді оқып, Абай шығармашылығының қазіргі өмірдегі маңызы туралы өз ойларымен бөліскен бейнероликтер түсірді.

Қарағанды облысы «Адамзаттың Абайы» эстафетасын ұлы ақынның тарихи отаны – Абай облысына жолдап, бұл арқылы ұрпақтар сабақтастығы мен өңірлер арасындағы рухани байланысты айқындады.